Ik Cordt Sten vor my vnde myne eruen bekenne vor dem boke, dat ik gelouet hebbe vnde loue Remmerde Vlenhot vnde Dyderyk Lampen c mark lub. pen. vppe desse vorword, dat de erbenomede Remmert sal vnde wil ten in Yslande vmme Hennynge Stene mynen broder, ene ber to bryngende effte enckede bodeschop, effte te leuendich effte dot sij. Weret sake dat de vorscreuene Remmert storue vp der vtreyse vnde nene vaste bodeschop dede effte don konde an mynen broder Hennynge Stene, so sal ik Cord Sten vnde myne eruen vntslagen syn desser vorscreuenen manynge vnde loffte vp desse c mark sunder alle argelist. Weret ok dat de vorbenomede Remmert in Yslande by mynen broder Henninge Stene qweme vnde em de breue brachte vnde my van Hennynge enckede bodeschop dede, dat he ware breue effte bewys van Hennynge Stene efft vt dem lande wedder brachte herwert vnde Remmert storue vp der wedderreyse, vnde de denne de bodeschop brynget van Remmert, dat he dar weset hefft vnde he zyne bodeschop an Henninge Sten dan hefft, so vorscreuen steyt, so loue ik Cord Sten vnde myne eruen, Dyderik Lampen de vorscreuene c mark to dancke to geuende.¹