Ersamen guden frunde tjdjnge vnde besched salde wj jw wol fele schrjffen wa jt füstes vmme lank stejt vnde ok van vnssen schepen so mjsse wj noch ij schepe dar noch nen tjdjnk van is gud geffe se wol sin. jtem ok van Ljffland dar stejt jt njcht wol de Russen hebben jnt land gewest vnde hebben groten schaden dan gad betert. jtem in Sweden wo sjk dat vp den somer for lopen wyl kan wy noch njcht van schrjffen god giffe vns gude tjdjnge van jw vt Norwegen dar vns ser na for langet wy hedden wol gement jw mjt dem ersten en vij ofte viij schepe to sendende men dar wj in betrachten so krjcht de ene dar fele in vnde. de ander altes nycht dar wert den kurrent vnde flok van vnde de mene man wert nycht besorget vnde de jungen maten jo mjt den olden fort sin sal men de nedder lage holden vnde ok mochten de Suderseschen en orsake nemen vnde menden dat jt vp se gedan wer so hebbe wj jt fort beste karen vnde hebben ij flate beleffet jsset dat sjk de tjt anders for strekket den wol so mach men tor kopsteuen dar vp denken. jtem so wj den forfaren dat gj grote moge van den Sudersesschen hat hebben dat vns let is men gj hebben se in dat strjk vp dat njge so wj horen dat nen klen is van der edde halffen dar de kopman to drenget is dat dath nu gebort is sus leuen frunde hebben se hjr send iij baden an den rad van Lubeck jlljk mjt en breff en van Kampen j van Deffenter j van Swulle vnde hebben offer den kopman hoge geklaget dat dath vnborlyk is vnde se ok en smete for egen dat se se achter bakes klagen dar gj wol vp denken wjlt so let vns de rat de breffe lessen de den in holt so desse bj bunden koppjge vt halt¹ dar wj vp antwerden vnde de rat so an se forschreff weddervmme vnde wj dem rade in schrjften offer geffen so dusse ander koppjge ok vt halt men se makeden en groten brask myt den dren baden vnde menden wj em dat gelt fort tellen salden so is dat wol to for antwerdende de kopman kan des wol bekand sin also van den Bremers hebbe wy nen breffe van kregen. jtem also van den Jslandes faren Kjnkel vnde Wjlde louwe vns heft nement wat secht so late wj dat ok hen stan den enen breff hebbe wj noch bj vns ljchte se menen wen de rat for se schrjft dat de rasterjnge wol los wert oft vt lage. leuen frunde jt is dat hogeste dat de kopman heft wen men dat. mjt breffen los krigen mochte so wer des kopmans djnk van nenen werden de djnk moten dor gan vnde men kan jt for antwerden na den jt vt den bormesteren kamen is vnde wj jt en ok for baden hebben vnde ok gebeden vnde se sjk den jegen den kopman in forsse vnde wreffel gestelet hebben vnde de kopman borgen nam vnde stelde jt noch tor fruntschop vnde dar baffen nement fruntschop begerde mjt schrjften ofte worden vp den sulffen vnhorssem vnde wrefften heft em de kopman vt lage lecht he nach jt bekant sin wat sake se begerden recht to donde na gnade njcht na rechte vnde den de kopman en wes gnade bewjsede vnde des kopmans recht alljk wol bj werden bleffe men so sljcht hen wjl wj nycht to raden wer dem kopman j for klenjnk vnde enem anderen wer orsake to makende dat men hyr na na der vt lage nycht fragen solde dar vmme wjl gj den djngen wol recht na gan de vns en part behulpen wessen solt sin vns vntjegen god betert vns dunket geraden dat de kopman gude endracht holde jo bj namen de xviij man so bljft de kopman wol de kopman men schut dat nycht so is jw djnk vte so wj njcht en hapen twjffelt dar nycht an wat wj dem kopman to gude don solt² kant sol gj vns gud wjlljch fynden konde gj jt passen dat gj hyr so fele geldes schjkken machten dat men al djnk vt lossede wer wol geraden dar gj wol vp denken wjlt. Ammelunk is an god for starffen god gnade der selen dar ok den noch so fele bj js vt to lossende wj werden jw in kort mer beschedes shcrjffende wjl god de jw sund spare.

j koppjge de der kopman schref wart anno xv^c ij jnt Hamborch schjp in de fasten.