Gravamina dem erszamen coepman Dutscher hanszen to Lunden in Engellandt residerende tegens privilegia unde vryheyde dachlikes geborende.

...

13. Ock, vorsynige, leve heren, is der coepman begerende, jwe wysheyden sodan heren der stede, dewelke jarlickes in Islande uthredynge doen coepenschop halven, warnunge geven, de eren coepluden, schipperen und schipluden laest und beveyl mede geven, de Engelschen aldaer kamende ungetrubbelt unde ungekummert laten in worden, warcken efte enigen dyngen; ock dergliken an ko. w. to Engellandt und synen hogen radt moge gescreven werden, dat ko w. undersaten ock wedderumbe de coeplude und schippern uth den steden ungetrubbelt laten, wente dem coepmanne derwegen jarlikes grote unhulde ko. w. und synes hogen rades dorch andrivent der Engelschen van kamet, szo dat to besorgende is, dar groter quadt uth entstaen mochte.

...

16. Ock beclaget sich der coepman, woh idt geboret is anno 14 laest geleden eyn schypper, borger in Hamborch, Cordt Trawendael genompt, geladenen schepes kamende uth Islande myt stockviscke, syn korss up Hamborch settende und in frigem strome der see mit dreen Engelschen schepen ton orloge utgeferdiget moetende; de welke den gemelten schipperen striken beden in namen des heren ko. van Engellant, und dar de schipper na gebade der Engelschen szo balde nicht striken wolde, hebben de Engelschen to dem schipperen ingeschaten sunder gnade und vele des volkes unde der coeplude gewundet, vormordet unde vorslagen; tho lesten den schipperen, woh sere he ock gewundet was, levendich aver borth geworpen und gemelte schip na eren willen und wolgevalle gebracht in Newcastel haven und de guder spoliert und berovet to grothen, undrechlicken schaden der coplude und rederen gemelten schepes; und wat der coepman beforderynge der saken vor ko. w. hogen rade doet, mach nicht gehoret syn.

...