Forma confirmationis priuilegiorum mercatorum Bergensium

Wy Frederick von gots gnaden etc. bekennen vnde betugen openbar jn vnde myt crafft dusses breues dat wy vth sunderger gunst gnade vnde toneginge so wy vnde vnse ryke tho den ersamen borgermeisteren radtmannen borgeren copluden deneren vnde jnwoneren der Wendesschen stede alse Lubeke Hamborg etc. vnde vort allen anderen steden van der Dudesschen Hense hebben, ock vmme mergliker vnde mennigerleye denste vnde wyllen so se vnsen vorfaren vns vnde vnsem ryke gedan vnde noch don mogen myt fryem wolberadem mode ock na rade vnde vulborde vnser vnde vnses rikes Norwegen reder hyr naben. alse der erwerdigester erwerdigen gestrengen¹ hochgelerden² gestrengen vnde erbaren heren heren N. ertzebisschuppe to Drontheym pawestliker hilliger legat. heren N. etc. vnde mer anderen vnses vorscr. rykes Norwegen rederen, den vpgenanten steden oren borgermeisteren radtmannen borgeren copluden deneren vnde jnwoneren alle vnde jslike ore priuilegia rechticheyde fryeheyde olt herkoment vnde gewonte so se sampt vnde besunderen van vnsen zeligen olderen vnde vorfaren koningen to Norwegen gehat gnedichliken gegeuen vorsegelt vnde vorbreuet Dat se der to orer vnde gemelten vnses rykes wolffart vnde nutticheyt na jnholde aller vnde isliker orer puncte vnde artikel van vns vnsen vnde vnser nakomelinge vogeden amptluden vnde tolneren hyr namals gnedichlick³ vngehindert geneten vnde gebruken mogen vnde scholen, bestedyget vornyet beuestet ratificert vnde confirmert hebben. Bestedigen vornyen beuesten vnde confirmeren also jegenwordich jn vnde myt crafft dusses vnses breues. Willende dar neffen, vnde vth sunderger myldicheyt gemelten steden den oren vnde oren nakomelingen vor lenende dat se hen vorbath darsuluest to Bargen de Dudesschen ampte vnder des copmans rechticheyt hebben vnde dar to ore egen huse auer Strant belegen na older gewonte rowlich beholden scholen etc. Cum alijs et singulis articulis retentis.

Ock scholen de alle⁴ vorscr. stucke puncte vnde artikel scholen den⁵ allen anderen priuilegien rechticheyden van vnssen vorfaren koningen to Norwegen den steden vorhen gegeuen vnuorfenglich syn dan desulue by vullenkoemer macht vnde werde blyuen allet sunder argelist vnde geferde⁶ offt ock van vnsen vorfaren koningen to Norwegen off . . . . s enige⁷ jemande enige priuilegia offt breue des erscr. steden [um?] oren priuilegien fryeheyden vnde rechticheyden to vorfange gegeuen dat de myt dusser vnser confirmation gedodet cassert vnde ene vnschedelich scholen syn allet sunder argelist vnde geferde. Gebeden darum allen vnsen vogeden amptluden vt in fine articulorum. De Dudeschen ampte etc. huse auerstrant etc. rowlich beholden. Ock schal de copman to Bergen darsuluest gnedichlich gehanthauet vnde myt neynen vmplichten offt volck vth tomaken belast edder ock sust in seiner rechte walt van gestliken, offt wertliken⁸ nicht vorhindert werden.

Wy wyllen ock de priuilegia wo vnse herre vader ko: Cristiern dem copmanne tegen der Hollander vnde ander butenhensessche vnwontlike segelatie vnde hanteringe jnt rike to Noruegen jnt iare . . . .⁹ gegeuen by gantzer vullenkomener macht vnde werde, geholden, vnde wes dar¹⁰ den Hollenderen offt¹¹ van vnsen vorfaren ko. to Norwegen entegen gegeuen genslick cassert vnde vornichtet hebben so wy ock casseren etc. in crafft dusses breffes also dat gemelte hynfurder nicht anders dan vpt olde allene myt twen schepen to Bergen kamen vnde jn twen garden by stucken vnde summen vnde neyner cleynen wycht offt mate touorkopen by vnser ko: gn.¹² vnser vngnade vnde swerer straffe.

Jtem der schippbrokigen vnde zedrifftigen guderhaluen willen wy den artikel in etwan ko. Cristiern priuilegien anno xiij dar vp gegeuen hijr myt vornyet vnde ratificert hebben. Wy willen ock de vorsegelinge dem copmanne vp de Islandesschen reyse jnt jar . . . . . ¹³ gegeuen vmme¹⁴ vth orsake dar jnne vnder bogeren angetogen ernstlick geholden hebben¹⁵ vnde hijr myt ock ratificert hebben¹⁶ vnde offt van vnsen vorfaren dar tegen enige ander schre¹⁷ breue edder scriffte gegeuen van neyner werde geholden hebben vnde scholen sick¹⁸ Dergeliken der eylande Hetlande vnde Verho nicht tobesoken by verlust der priuilegia vnde fryheyt nicht tobesoken¹⁹ entholden vnde Bergen alse dat rechte market besoken by pene vnde straffe in dem priuilegio dar²⁰ vorgen. priuilegio begrepen.

Wy willen vnde beden²¹ ock dat des copmans schulde vor heren(?) broke scholen²² gan sunder arghelist edder exceptie²³ vnde dem copmanne van sinen schulderen se syn Nordensch offte Dudesch syne schulde na gebor betalt scholen werden Dar by neyner list exceptie edder²⁴ exceptie togebruken²⁵ edder vorboth heyme(liken?) offt openbaren to gebruken.

Jtem alse sick²⁶ denn itlike Dudeschen dem kopmanne schuldich synde²⁷ to Bergen ock in Dudesche lande schuldich synde, sick vaken van der Brugge by de Nordenschen geuen vnde nichtes to²⁸ betalen so willen vnde beden wy alle vnsen vogeden vnde anderen vndersaten geistlich vnde wertlick dat sick numment vndersta desuluen jm rike²⁹ tegen des copmans willen vptoholden dan dersuluen myt rechte straffen vp sy[ne]³⁰ vp geborlige³¹ forderinge myt rechte straffe edder genslick vth dem rike wise Ock [schal] de copenschup allen Nordenschen vnde Dudesshen fry syn so dat [anders] numment enige copenschup egen maken. Dar to schal sick vnse vog[ede] vnde ander entholden vth den schepen vp dem lede liggende wes tokopen dem gemeynen copmanne to uorfange³². Ock schal vnde mach de gemeyne copman in allen vnsen hauen fry kopen vnde ghedan wes eme van noden sunder vorletinge eyns yderen³³ Dergeliken dat sick³⁴ scholen³⁵ de Hollan[de]r Schotten vnde ander vth den boten vnde norderfare schepen offt boden blyuen ore copenschop myt besemeren offt der geliken todryuen.