15320718GRI00

1532, July 18

Reykjavík

Verdict of twelve Icelanders about the violence of the Germans against English merchant Jon Breye in Grindewick, which they deem rightful given the latter's violent behaviour against Icelanders and German merchants, as well as the confiscation of his ship by the bailiff Dirick van Minden.

Created for and published on the HANSdoc website of the German Maritime Museum, Bremerhaven, by Bart Holterman in the context of the research project Between the North Sea and the Norwegian Sea: interdisciplinary Studies of the Hanse. Licensed CC BY.

Hamburg, Staatsarchiv der Freien und Hansestadt Hamburg

111-1 (Senat), Cl. VII Lit. Kc No. 11, vol. 1a (Islandica 1431, 1481-1532)

One bifolio

21,5x31,5cm

Paper

Modern foliation in pencil, 27-28

Translation

Low German

On the back (f.28v): Landthyndinge und ordd der Islander contra Jon Breye und Robert Legge mith sinen schapevorwanten.

Marked b.

Facsimile not (yet) available

Diplomatarium Islandicum 16:290

Allen luden de dussen breff seen edder hoeren senden Narffe Siguuddsz. Raffen Godmonssz. Joen Eriescson biornd annorszon Jon Helgesson Torwarder eynerson snore tormodssz Jon gysselszon halkel torkelszon brander Jonszon Ronolffer hoskausoll vnd spaalte (?) Jonszon godz vnd oren groet tho kennen geuende dat na godz gebordt xvc xxxij Jare were wy thom rechte sproeke gesschet van dem erlycken manne heer elender torwarderszon lochmann vor suden vnd osten in yslant vp Dem alleynghe mandagz negest nae Petry vnd Pauly vmme to besychtyghen tho rychtende vnd vullen kamen recht tho leggen vp De sake Dat yon beren was geslaghen, vnd syne byplychtygers In gryndewyck.

Item thom ersten Dele quam dar vor vnsz sodanne sake vp ergenomde Jon bereen Dat he hadde gegrepen vnd weldichlyken genamen Jn gryndewyck van Dussze mennen ketel Jonsonn torgrymer Halderszon ock dar mede gebunden gepynyget gelyck eyn ander myssdeder so hefft he ock bedrouet turdes Godmonsz dat he em wolde syn houet aff houwen offte he enygen fysse lete welch afforen van Den synen offte ander luden so hefft

he ock gegrepen vnd woldechlyken genamen van den Dutschen kopluden oresz vysse xx last offte mer szo hefft he ock vorhyndert vnd genamen van ander luden myt gewalt ock vorbaden oren ffysk nycht wech tho fforen Szo dyt In der warheyt vor vnsz gekommen hebben wy eyrgenomeden rechtz menne to rechte myt fullen rechte erkant dat eyrgemelten ketel torgrymer vnd turdern weren schuld tho fforen twe nochafftyge tuge vor desz Konygs vnbodz mann In xiiij Daghen sunder ffoer ffall tho rehte Daghen nu de wyle dat hjr szo steyt In vnszem rechte vnd vnszes landeszrecht boke dat roffersz vnd alle mann de den halsz vorbordt hefft synt myt rechte gegrepen vnd geslagen dar vmme hebben wy eyrgemelten rechtz menne tho rechte bekant dat Joen breen myt synen byplychtigersz weren recht geslagen vnd ock alle ander de grypen vnd myt gewalt nehmen vnd myt ouermode ffaren ock hebbe wy tho rechte bekandt dat sulue schyp Daer eyrgedacht Jon breen hadde mede geffaren myt syne ghudt myn‘ hern K. ton handen vnder syne genade vnd synen rechtliken Vnbodzmann Dyrek van Mynden an to tasten.

Item In eynem dele Erkenden wy vaken genomden menne tho rechte dat alle rychtlike schult daer von scholde betalt werden vor sunte latyesz1 myssen negest komen sunder foerffall.

Item szo worden wy ock geessket In Dem sulfftyghen rechtssprecke tho besychtygende vnd tho rychtende vmme Dat schyp vnd gudt dat an lant dreff in Bussande van der slachtynge de dar wordt myt den dusschen vnd engelschen schypper lutken vnd Joen wylers Item quam dar ock vor vnsz gesychte vn ghuder menner bekentesnyssze at de hadden to rechte erkant dat sulue schyp vnd ghudt eermals vnder lant recht myt desz lockmanns vulbordt Dar vmme erkenden wy vaken genomden rechtz menne myt rechte dat schyp vnd ghudt myne hern K. ton handen.

Vnd vnder syne werdygeste genade wat barmherticheyt Offte entsachtynghe he wyl daer an Doen vnd syne vorgenomd vnbodesmann an tho tasten. Item Erkenden wy ock tho rechte In sulfftygen Dele hyr van Dussz ghude alle rychtlyke schult den de syck dar In lenden myt rechte sunder ffor ffall Szo hebben wy ock to rechte Erkandt van beyder ley sake xiij marck myne hern K vor gebraken vrede vnd see rouff volbord' dusszen vnsz rechtesz sproeke myt vnsen hern ellender lochmann vnd myns hern K. vnbodzmann Dyreck van Mynden vnd setten oer Ingesegell myt ergenomden mennen Insegelen vor Dussz rechtessprocksbreff de gescref‘ Is In wyck vp seltares dasz negestn Donerdagz vor ffestum margrete virginis etc mt .... In sulsftygen Jare wo vore gesecht.

Transcript copied from Diplomatarium Islandicum