Vnnsze gantswillige vnnd vnuerdratene denste mith erbedinge alles gudenn touorenn Erszame forsichtige vnnd wolwysze herenn beszundergunstigenn gudenn frunde Wo an lastuorgangenem jare de Engelskenn sick gewaltzamer auerfarynge Jn Jszlande Juwer wisz. ock der Erszamenn van Bremenn Schipperenn Coplude vnnd Schepesuolcke by ku. mt. to Engelandt hogem rade beclageth, vnnd wo derhaluenn de Copman hir residerende to dher tyde bemoyeth weten sick Juwe Er. wisz. vth vnszem schrifftenn disuluest ahn Jw gelangeth ane twyfell toerinrenn darjnn wy ock vnder andern fru(n)thlick vnnd hochlick bedenn vnnd gesunnenn Juwe Er. wisz. den ohrenn de hauen jnn Iszlande vorsokende vnnd gebrukende sulkenn beuell vnnd gebott medegeuen woldenn dath di sick mith denn Engelskenn szouele mogelick ynn frundtschopp verdragenn deme szo vnses verhapens vann Juwenn Er. wisz. (vth.) bewage wath dussem gudenn Cuntore vnnd denn Juwern hervorkerende darann gelegenn ane twyfell woll mach gescheenn synn Szo is dennoch auer luthkenn Smith J. Er (alsze wy berichtet) borger vnnd hans synenn broder vnnd ohre geselszkopp eynes Johan browne Willm Kenet vnnd Johan Sowermer van bisshopps lyn Jm hertochdome Northfolck gelegenn Coplude, auermals nige Clachte ahn Ko. w. gescheen, vorthgesettet vnnd gelangeth Wo dath eyn Schipp van genanter Stadt lynne dhe Thomas vann hull genoemeth des de gedachtenn Johan browne willm Kennet vnnd Johan Sowermere tobehoren vnnd vthredere, vnnd eyner Johan wyler schipper geweszenn van gemelten luthken smede vnnd synem volcke Jamerlikenn auerfallen vnnd gehandelt vnnd darnha alsze dher Engelsckenn ethlike gewundeth vnnd erslagenn. dath schipp geenterth de gudene vnnd wath dar susts Jnne geweszenn wech genamenn vnnd darna dath Schipp dar eth ein ouer an grundt gelegenn mith exen, bylen vnnd dergeliken Jnstrumentenn durch gehauwenn vnnd geszengketh hebbenn schall. Alsze Juwe Er. wisz. vth hirbyuerwarter Copye der clachte der Engelsken wider vernhemen werdenn. Darupp de aldermann sambt ij der oldesten des huszes vnnd etlikenn copgesellenn vnnd iiij Schipperenn van Hamborch vor gedachtem hogen rade ko. w. to erschinen syn verbadeth vnnd to mherenalenn vorboscheidenn wordenn. Vnnd is densuluenn gemelte clage mith forder vmmestendicheit vorgeholden, vnnd thom lasten na rede vnnd wedderede den vnszen beualen vnnd gebadenn vpgerurte szake an Juwe Ersz. wisz. am forderlikesten to der behoff uerschriuenn dath Juwe wisz. vpp gemeltenn luthkens smith schipp gudt vnnd pershone richlick kummer vnnd arrest woldenn leggenn bet for tydt der shakenn gelegenheit vnnd wo eth sick Jm grunde darum erhelde wider erkant wurde, Darupp De vnszenn geanthwordeth Dath de Copman eth gerne Ahn Juwe Er. woldenn mittem bestenn verschriuen, Dar Eth auer den partyen darbouenen eynen vulmechtigenn anerschigken wurden de szake aldaer vor Juwen wisz mith rechte to uoruorderen ock ko. mt. darby mede gnedichlike to schriuen tolaten gelouede twyuelden wy nicht Juwe Er. wisz. wurden Eyner Ko. w. vnderszatenn auer de ohren vppgeboerlick anszokene (wo billick) gerne rechtes verhelpen. Worupp den vnszenn weddderum angetoget dath k. mt. ersten sheen wolde wath wy hirjn ohren vnnd wath der wo gerurt by Juwen Ersz. gescheen kunde wath denne darnha k. mt. to donde geneigeth wustenn ohre herlicheit nict wurde sich auer to syner tyde wolfynden vnnd syn darmede alszo vpp berurtenn auescheidt verloueth Dewile nu hiranne deme Copmane hir residerende drefflick (wo J. E. wisz. vth hogem verstande tobetrachtende) gelegenn hebben wy gegenwardigenn Mathiam van Emerzen vnsen Secretarnn an Juwe Er. wisz densuluen de szaken wider vnnd forder na notturfft vortodragenn¹ uthgeferdigeth. Bidden derhalven iuwe er. Demesulven in anbringijnge sullicher unßer gewerve upp dithmall gelick unns sulvest fullenkamen geloven stellenn unnd gevenn unnd bavengemelte szake szo behertigenn berathslagenn unnd verhandelen willenn, dath dith gude cuntor dardurch nicht yn schadenn unnd uterlick verderff geforet werde, unnd wath iuwe er. Hirinne to doende gewegeth unns wedderum toschrivenn dath sy wy und iuwe er. wisz hirmede deme almechtigen befalenn henwedder toverdenen gantswillich unnd unverdratenn. Schreven unde gegeven in London, den XVII dach julii anno etc. XXXII.

Alderman unde gemeine kopman Dudescher Anze to Lunden inn Engelant residerende.