Fridrich vonn gots gnnadenn zu Denmarck der wendenn vnnd Gottenn konnig et Herzogk zu szlesuig holstenn etc.

Vnnsernn gunstigen grus zuuorn Erszamenn liebengetreuwen Wir haben ewer schreibenn vonn wegenn des abschidts so dem Engelischen Oratorn nach vermuge dem verlas zu Segebarge genomen szoltt gegeben werdenn alles ynnhalts vornomen vnnd ist nicht weniger das solches alles bisher nachgepliebenn auch zu verlasner zeit nicht hatt gescheenn mugen, allein Darumb Das wir vnnsere lieben getreuwen Rethe, so bei mit vnnd ob solche handlung gewesenn, ebenn zur selbigen zeith ynn andere wege vnnser hochen notturfft nach vnbeyuergenglich habenn gebrauchen vnnd ynn andere orthe vorschickenn mussenn Wie nun dem allem do domit dennocht eynn solchem handell euch zuur bestenn nichts ligende pleiben vnnd yr sehenn mugett Das wir euch mit forderung gneigtt habenn wir noch mals solchenn abscheidt verfertigen lassenn Wie yr ansz ynligennde Copienn¹ so wir euch nebenn dem original hirmit zufertigen, zuuernemen habtt Wo euch nun die sachenn ansehenn oder vonn nothen sein wurde solchen abschidtt fhurghen zulassenn Mugtt yr der sachen zum bestenn, beyligenden vnsern vorsigeltenn briff darem der abscheidt vorleibt mit dem dem aller forderlichsten mit einem eignen pothenn vnter vnnszer buchssenn, es sey mit der Erstenn schiffard oder sunst Jn ander Wege Wie yr Dann solche vnnd fuglich Dann wir selbst thun mugett, ann vnsern hern vnnd brudern denn konig zu Engelandt schickenn Also Das er mit dem erstenn souil muglich ahn sein liebde gelangen muge, als wir ghar nit zweiffeln yr zuthun wissenn vnnd darynne vnbeschwert sein werdet Das sein wir mit gunste gnnaden vnnd dem besten zubeschuldenn vnnd zuerkennenn gneigtt

Datum gottorp Dinstags na palmarum Anno etc. xxxiij^o