Christoffer Grave unnd herr tho Oldenborch vnnd Delmenhorst Gubernator der Rike Denmargkes.

Unnsernn gunstwilligen grudt mit erbedunge mehr leves unnd gudes alletidt thovornne, Erszame unnd hochwise, Insonder gunstige frunde, Nachdem wy umb sunderliker gunst, ock der truwen vlitigen dennste willen, szo szick izo jn dessem unsem kriegszhandell tho erleddigunge unsers frunthliken leven hern vnd Vetters konningk Christiernus etc. der Gestrenge unser liever besonderer Marcus Meier bewiset hefft, unnd nachmals tho donde gneigt und erbodich ist, dat land Iszland etlike tidt nach lude ehme unser darover gegevenen Vershrivinge im nhamen unnd van wegen hochgemelts unsers hern und Vedders gnedichlikenn gegont vnd verlehent hebben, Und ehme nu villichte van andern die solhs (doch mit unbillicheit) thogebrukend gedencken darjnne mutwilligen Indracht vnnd verhinderunge gescheen mochte, so ist derwegenn an Jw unnser gnedigs geszinnen und ersoken, gy willet mit Juwen Schippers und andern kop- vnd boszluden, szo van Jw, darhenne segeln werden dermaten beschaffen, und verordnen, dat szie niemants anderst dan bemelten Marcus Meiern, und szinem Brudern Gerdt Meiern gnant, den he Jnn vnnser gegnwart an szine stede volmechtich darhenne tho tehende vnd szine Stede tho vorwesende affgeferdigt, inn solke possession, und vagedes ampt tho kamende byfhall, fordernussze vnd hulpe doen willen, und Jw hirinnen, guthwillich vnd unbeshwert erthogen, Dat szint wy gegen Jw henwedder mit besondern gunsten vnnd allem gudem thoerkennend. Datum Coppenhagen denn 29 dach Januarii Anno etc. xxxv.