Vor ethlich dagen, erbaren und wolwysen gunstigen hernn, alße wy thosamen geesketh weren, is uns baven alle unsere verwachtinghe van der vordragenen und olden Ißlandischen saken, ßo nhu eyne wyle juwe er. wish. bemoyett hefft angetoegett unnd vorgeholden, wes twischen des durchluchtigsten und grothmechtigsten herrn herrn Hinricks des achten tho Engelandt und Frangkriken koniges, beschermers des geloven und der Engelschen kergken ane middel noegest Christo des oeversten hoevedes, hern tho Irlandt, fursten tho [ ]¹ unsers gnedigsten herrn den werdigen gestrengen und hochgelerden herrn oratorn, und ethlichen juwer er. wisch. verordenten gehandelt und uthgerichtet was, worvan de summa was, dath dhe gemelten herrn oratorn gefurdertt und angeholden heddenn, dath van der stadt edder van den jeningen uth uns de darumm beschuldigeth wurden, der schaden halven, ßo vor ethlich jaren schipper Thomas van Lunden und Peter Gypson wedderfaren weren, durch redelike enthschuldigunghe, edder mith geborliken restitution notturfftighen affdrachtt und erstadunghe geschehen mochte der meynunghe und andacht dath alßo de orsake der beschedigunghe, wrake und averfaringhe, ßo sullicher sake hahnen erwusßen mochten, durch tideliken und ripen radt upgehaven unnd affgesneden, und twuschen ko. w. tho Engelandt underdanen unnd dusßer stadt borgere unnd inwanere eyne bestendighe unnd ewighe eyndracht upgerichtett und erholden werden mochten.²

Und wowoll darup van juwer er. wisch. verordenten, ßo vele alße ahnen gudt geduchtt, und de nottrufft erfurderde geantwordett were, alße dennoch dehalven eyne disputatie sich erhaven, were alßo veraneschedett dath juwer er. wisch. verordenten eyne Latinische instruction der gewalt und unrechtes, ßo ohnen van den herrn oratorn aneranthwordt, und uns dosulvest mith eynen Dudeschen uthleggunge vermeldett wurdt an sick genamen und wes ße gehoeret dathsulvighe an juwer er. wisch. tho bringendhe unnd darup juwen er. wisch. meynunghe unnd bedengkent den konigliken oratorn tho bequemer tidt wedderumme thoverkundigendhe, de kongliken geschigkeden averst darjegen mith antregunge und betekeninghe eynen guden und sunderlichen gemietes tho unser stadt und gemeynem besten nha ohren heymkumpst de sake nicht erger tho makendhe, sonder getruwlich und frunthlich desulvigen ko. maiestat tho befelendhe thogesecht und sick erbaden hedden.

Derhalven alße de sake bynnen rades bewagen were vor gudt angesehenn und beslatenn dewile, de sake unß medebelangede dath wy darvan, gelick wo ock dhe konigliken oratorn sulvest gefurdert hedden, verstondigett werden, unnd darup wes unßere notturfft esckede juwen er. wisch. antoegen, darmith dese billichen und foegliker anthworde den konigliken oratorn gegeven werden mochten, worinne wy uns dorsulvest vorfaden wo eth framen und gehorsamen borgere nicht anders ansteitt juwer er. wisch. willen und meynunge geborlichen gehorsam tho bestendhe und nhato kummen.

Derhalven wowoll wy nicht twivelen juwer er. wisch. werden, nha ohren wischheitt und sunderlichen truwer und sorge tho dusßen guden stadt, und unsen allen volfartt ock ahne unserenn thodonde de sake mith den konigliken oratorn behorlich und nha gemeyner nottrufft und vordele beschaffen und affrichten, dennoch dewile uns befalen is tor enthschuldigunge unsere nottrufft darto gevendhe, und uns unsers gennietes und meynunghe hoeren und vornemen tho latendhe willen wy in betrachtunghe des, dath uns nicht geboerede juwer er. wisch. willen und befehl tho versumendhe dath jennighe wes uns nha moegeliken bewegunghe der sake, ingefallen, unnd uns dachte nothwendich tho syndhe, korthlich dargeven und vortellen.

Und anfengklick is eth uns gantz angeneme dath wy erfaren wo de konigliken geschigkeden mith vermeldinge und antoegunge eynen sunderliken wolmeynunghe thoneigunghe unnd fruntliche guden willens ohre gedangken darto vermocht und gerichtett und vorgenamen hebbenn, wo de orsake des weddervallens beschedegunghe und gewaltzamer handelunghe twischen den Engelschen und uns verkerendhe in Ißlandt upgehaven und bygerumeth und frede und eynicheytt, gestifftett und befestigett werden mochten, und der orsake halven, dath juwe er. wisch. ungetwiveldt sunst nicht nhalaten werden, willen wy ßo sehr gebeden alße thogehardett hebbenn, dath darvor den konigliken oratorn wo der gemeynen stadt halven, alßo ock ßunderlich van unserer gemeynschap wegen geborliche und densthliche dangksagunge geschehen moeghen. Dan wo wy tho rouwe und enicheytt nicht ungenegett sin, alßo achten wy eth darvor, dath wy allen guden luden eyne woldat schuldich syn, de sich umme wege und wyße rouwe und eincheytt tho fundende uptorichtende und tho erholden bekummeren und bemoyen.

All isßer averst dath uns sulliche meynunghe angeneme is und gefallet, ßo verstan wy dennoch nicht, wo dith mith der ordenunge und wyße, alße eth uns voergeholden is moeghe sorglich unde fruchtbarlich voergenamen und gefundertt werden.

Dan so vele der ersten klage Peter Gypsons belangeth, is eth so helle ahm daghe, dath de nicht unsere sondern des koniges van Dennemargken sake is. Dan konig Frederick hochloblicher gedechtnisße hefft de sake, gelick wo eth sich getemede, dewile desulvige durch ohrer ko. mt. vageth geboereth was, an sick genamen desulvigen ock vor de ohren vordedingett. Und der hochgelarde und namhafftigen harre Thomas Lee, ko. mt. orator tho der tidt alße he dusßen ordhes dusßer sulvigen sake halven ein legate was, und mergkede und sage dath he dusße stadt, edder darinne de burgere und inwanere de darumme beschuldigett wurden mith rechte und fogen nicht voernemen und verfolgen keindhe heff he sick sambt juwer er. wisch. radesßendebaden, de darto verordent wurden tho ko. mt. tho Dennemargken nha Segheberge verfoegeth und aldar mith sinen ko. mt. verordenten rheden by den ock den durchluchtigstenn herre hertog Christian nhu erwolter konig tho Dennemargken unser gnedigsten herre personlich was, van dusßen twistigen sake alßo gehandelt, dath he mith nochsamen unnd geborlichenn anthwordenn affgeferdigett, darnach juwe er. wisch. und uns wider unbefurdert beth.

Darnoegest gedengket uns noch woll wo wy erfoeren, alße im jare dreunddruttich juwen er. wisch. geschigkeden in Engelandt weren dath ohren durch den gantz namhafftigen mhan mester Crumell, koniglichenn oeretoren im nhamen und van wegen ko. mt under andern koniglichen und gnediglichen erbiedungen jegen dusße stadt stadthlich verkundiget unnd angesecht were, dath ko. mt. tho dusser stadt eyn ßunderlich gnediges thogenegett und frunthlich gemoete droege und henfurder sullichs beholdenn, ock de ungnade und unmoeth, ßo sine ko. w. dusßersulvigen sake halvenn jegen dusße stadt gefatett hedde, gnedichliken fallenn laten und vergeten wolde.

Alße ock enthlich nun vorgnugnen herre doctor Barnes der koniglike geschigke de etliche ko. mt. begerte unnd furderunghe juwen er. wisch. vordroch syn wy berichtett worden, dath he, wo smy? andere voergenent thom deyle, tho der sulvigen bavengeschreven meynunghe, alßo ock duth uth uthgedrugkedem befele vortellet hebben dath ko. mt. tho Engelandt, dusße stadt dusßer sake verlaten hedde, unnd de schuldt, ßo darinne syn mochte vele lever ohren underdanen, dan den Hamborgeren thoschrivenn und tholeggen wolde.

Derhalven is nicht tho vorhapendhe dath ko. w. eyne fromde, vortegene und vorsuegene sake wille verwercket und des geledenen schaden van uns jenighe erstadunghe gefurdert, und also ohrer ko. mt. vorigen geschigkeden und ambasiaten handelunge und geschrifte durch eyne nyghe commisßion uploßen unnd wedderropen wille.

Dan dath dar schall angetagenn syn ko. w. hebbe woll ohren toen unnd ungnade van sich gelechtt, aver jedoch den underdanen dardorch ohre privaten und sunderge gerechticheitt nicht nhemen konnen, wen gelick nagegeven wurdhe, dath nha forme und gestalt des Engelschenn rykes unnd regimentes, de gemeynen koninges saken, dermaten van privaten saken affgesundert werden mochten, ßo gehoerede sick dennoch sulliche eygene und private gerechticheydtt nicht by uns, wes de sake wo baven genochsam angetoegett, nicht is, sondern by deme koninghe tho Dennemargken gefundertt unnd verfolgett tho werden. Aver van dusßer klage eyn weynich tho lange.

Van Thomas van Londen klaghe watt angetoeget und gefurdertt sy, hebben wy, uth der instruction van den konigliken oratorn averanthwordet und uns gedudet³ ock verstan und ingenamen. Van wellicher, wowol der sake gestalt und gelgenheytt, woll ethwes anders, als uth schint dath dhe konigliken oratorn van deme jegendeyle berichtett und informeret syn, mochte vertellet worden, daruth man van der sake recht und reyne hadde to richten, dewile dennoch de vordedunghen und enthschuldigunge, der jennigen de vor de captenen geachtet unnd angegeven wordenn vormals juwen er. wish. thogestellet, unnd wo wy erfaren dosulvest doctor Lee tho erkennende anerrecketh syn, szo achten wy van unnoden tho synde, sulliche vortellunghe, und disputation wedderumme thovernygende.

Darnoegest nun falle, eth schon nagegeven wurde, dath an der klecht uns jennige gewalt und unrecht, verorsaket unnd hergekamen were, des wy doch mit nichte gestendich, ock dath wedderspill vormals uthfundich gemaket hebbenn, szo achten wy eth doch darvon dath sulliche vormeynte minnen und unrecht, wo alle andere olden, upgeheven unnd vorgeten syn. Dan wy uns nicht anders angan lathen, dan alße vor weynich kort verschenen jaren und frede und enicheytt in Ißlandt tho stifftende und thobewarendhe, twuschen den Engelschen und uns Hamborgeren Ißlandeßfaren ethliche formulenn und statute geordnet und gestelleth werden, wo dath gemeynet und gesocht sy, dat wo erstlich van beyden syden de vorigen und vergangnen minnen und unrecht eynen sulvest willigen und unbenodigden vorgetenissche befalen werden, und darna gewissche gesette syn und stan scholden, de vorbeden und wereden, dath keyne nyghe upgangen und erwisßen in wellicher meyninghe und willen, ßo van uns gefatet wy noch tor tidt syn, und ßo lange eth der Engelschen halven geschehenn mach, gerne verharren willenn.

Wan aver de sake avermals tho klagend gebrocht werden, und van uns van thogefoegeden gewalt und schaden jennighe affdrecht und beterunghe gefurdertt werden scholde, szo wethen sick juwe er. wish. woll thoverjurende, wo vele und mennichen leye klagen unnd beswerunghe wy vormals juwen er. wish. jegen de Engelschen hervorgebrocht und angetoegeth hebben, de wy thom deyle und gemeynen eyndracht willen nicht geachtett, thom deyle woll by ko. w. durch juwer er. wisch. midt gedeylede flitige vorschriffte gefurdertt hebben, alße wy averst ßeghen dath ße dhe vorechtlich vorsumeth wurden, hebben moten liggen und berouwen, der wy itzunder ungern gedengken, dewile averst van den konigliken oratorn deselvigen vornyget syn und unßere nottrufft ane den anders nicht kan erkant werden, szo willen wy dersulvigen alleyne eyn deyll, kortlich und slecht vortellenn, darmith den konigliken oratorn wile dhe, dher ohren gerecht gedengken tho funderen, ßo verne eth nodich voergeholden mogen und syn dusße.

Anfengklich dat de iniurien nicht wider herhalet worden, im jare vofftein hundertt und elven, hebben ethliche Engelschen ahne alle orsake und vorschuldent eynen Cordt van der Heyde unsern medeborger, sich nichtes vranthliches fruchtende, sonder sinen nottrufft ahne allem argen nhatrachten unversehentlich geweldichliken angefallen, und demesulvigen syn schip mith fischen und anderer ware geladen genommen, und de schipper alße he in Engelant geforeth unnd alldar deme dode thogedacht was, is he vermiddelst godtlicher hulpe uth ohren henden enthkamen, de capitene deisßer dath, wurden gemeinet, Jon Belle, und forede eyn schip genoemet Lenis van Hulle, de schade werdt gerichtett tho achte dusent marck Lubsch.

Im sulvigen jare Matthias van Collen eyn borger tho Hamborch noch und levende alße he in siner gewonthliken reyße nha Ißlandt was, und ungewedders halven syn koß nicht holden konte, unnd ann de Engelsche syden gedreven wurdt, und meynede aldar alße by den frundhen, eyne velighe und sekere haven tho fundende, is he van den Engelschen averfallen, und klegeliken getracteret gehandelt unnd sines schepes und gudes berovet geworden meynende noch dath ßer woll by ohme gehandellt were und gade und ohnen dangkende dath he dath levent beschelt, de genamenen guder werden geschattet baven de teyn dusent marck Lubsch.

Darnoegest imm jare XIII is eynn borger van Hamborch Cordt Froedendall, alße he sine hantierunge gedreven, unnd van Ißlandt, wedderumme sine heyme besochte, nicht weyniger dan der frundhe vorliggent, fruchtende, van dren Engelschenn, verbermlikenn averweldigett und gehandellt, he de schipper, aver syn gantze liff pinliken und muth groter mertere verwundett wurdt levendich aver bordt geworpen, und alße dath schyp und gudt genamen und tho Nigencastell in Engelant sambt ohnen geforeth, unnd aldar in de achte weken langk in der haven gelegen was, syn ethliche Engelschen in dat schip gefaren unnd hebben den hoevethboßman in stucken averbordt gehouwen, darto noch twen anderen des schipvolckes dhe kopper in deme schepe up der lukenn affgehouwen darto noch viff manne klegeliken verwundet, dar susts alrede vorhenne, alße dat schipp werdt upgegeven vofftein unschuldige mann mith deme schippere ummgekamen weren, de capitene sullicher barbarischen unmenschliken und tyrannischen mißhandelinghe syn gewesen mester Lewes van Nyghencastell, mestere Withwant und mester Joen, wowoll aver dath schip unnd eyn weynich gudes was weddergegeven worden, szo is doch ßo vele gudes vorkamen, unnd sunst schadens geledenn, dat sich de schade belopen hefft tho ßoeven dusent marcken Lubsch.

Item alße Dirick Moldenhouwer eyn borger van Hamborch thor sulvigen tidt uth Ißlandt kamende, under Engelant beneffens Wintertime stranden moste, darsulvest ock durch godthlike hulpe eyn groth deyll der fische gereddet hadde hebben de Engelschen, ungeachtett der naturliken billicheytt noch rechtes edder gemeyner und pemater verwanthnusße, ohne und sin volck, van den mith groter moye erlangeden und geborgenen guderen tho wikendhe, und desulvigen ohnen thom roue tho latendhe gedrungen, de schade is geachtett worden tho dusent marcken Lubsch.

Item im jare achtundtwintich syn, ßoeven Engelschen, darunder de capitene weren Klawes Buckbrock und Rubert Vete van Lunden und Robkow van Bustrow, wedder alle recht foege und billichheytt, und ane alle orsake eyn Hamborgisch schip, des schipper was Hans Schomaker, tho Grannelwick und deme anker liggendhe anbort gefallen und hebben dar uth alle geschatte loth kruth, und vytallie, des schaden sich belopen tho teyn dusent margken Lubsch.

Im noegestfolgendem jare is Hinrick van Tenne eyn Hamborger, alße he in eyner havene Oeverde geheten lach, und nargent van en wuste van eynen Engelschen Jon Willer genoemet, und sinen verwanten dhe ohme ungetwivelt woll bekant syn tho grundhe gescheten, und der arme keller mith soßunddruttich mannen und allem gude, dath nicht eyn her aver gebleven, gentzlich versapen und gebleven wer mach de unbillicheytt der dath schetten, de schade is geschattet tho XII dusent marcken Lubsch.

Aver eth sy genoch tho dusßer tidt ßo vele alleyne vortellet tho hebbende, wellichs eyn jedes in ßunderheytt, tho samen gefoeget und in eyne summen getagen unnd de iniurien darbeneven gewagen wurden, szo scholde eth nicht dungker syn, dar man thor rekenschop gan scholde, wo wele unsere klage jegen de Engelschen klagen geholdenn, desulvigen, averreynnen wurden, de wy doch noch tho jemandes hoene und vornuglinginge, noch derhalven dath wy darmit eyne wedderstadunge unnd affdracht wolden, furderen sonder alleyne darumme vortellet hebben, dath wy moegen erwyßen und antoegen, dath ock uns nicht enthbreke, dath wy uns woll beklagen mochten, und dath wy ock betekenen moegen, ßo vele eth thor befestigunge und erholdinge gemeynes fredes und enicheytt geherett, dath eth de gemeyne nottrufft erfurdere, und wy gedulden konnen, dath de vormeynte iniurien jegen eyn ander vor gelickspill upgeheven, und in ewighe vorgetenisße gestellet, und uth der memorien und wyße uthgeradet moeegen[!] werden.

Dan dewile eth sunst unßer stadt halben de deme ryke tho Engelant mith eyner olden und nicht geringen vorwanthnusße thogedan is sick nicht ehn themet, dath wy eyner germeyn inssulen halven van den Engelschen mit unfrunthliche gemoete und wyße, stan und uns schigken scholden, ßo syn wy ock nicht die jennigen, de eth vor recht billich und minschlich erachtede und helden, dath jemant, wedder de gemeyne minschliken verwanthnisße, und der gave und woldat willen, ßo, de natura int middel gestalt, hefft frig und gemeyne syn wollen, sick alleyne geweldichlikenn mith eynes anderen beschedigunge tho tho eygende mith jennigem folcke, vrantschep foeren, und mith weren und hate fechten scholde.

Welliche gemuete und willen wy van der tidt der vereynigunghe ehr, nicht dungker mergken laten und ertoeget hebben, dan wy in Ißlandt nicht alleyne uns alles unrechtes gewalt, argen und averfaringe entholden, ßonder ock den Engelschen, alle denste und wille ßo van uns gefurdertt wurden, geleistet und ertoeget und den statuten tho erholdunge gemeynes fredes und enicheit geordent, ßo lange eth uns der Engelschen halven, danlich was, geborlich unnd ßunerlich dermaten nhagelevet hebben dath wy der thoversicht syn, man koene uns derhalven in keynem beschuldigen.

Wowoll de Engelschen sint der tidt uns ethlich mall, alße doch vor ße und uns woll gudt beriff was sulliche statuten und unßere ansoekent ungeachtett mith unßerm groten schaden unnd nadeyle uth den haven uthgewiset unnd gesleten, und doch nichteßdesteweyniger ingenamen hebben, wellicher besweringhe wy noch ethliche mehr hebben, de dewile derselvigen verhandelunge nicht alte lustich is, tho dusßer tidt plegen und berouwen laten willen.

Wath averst de armen Ißlendere belangeth konnen wy uth erbarmigen ohrer gelegenheitt van den wy doch van beiden syden menschlich unße wolfartt hebben, nicht verswegen laten, welliches, woll gudt were, dewile wy eth darvor holden, dat dejenigen den sullichs tho werende und tho beterende geboerede, dathsulvige unberenst sy, dath eth dusßen konigliken geschigkedenn vorgehelden und vormeldet werde, und is dutte.

Umme de inßeten langest herre liggen ethliche Engelschen, up unße spracke de duggers genoemeth, desulvigen undernhemen den Ißlenderen up der dupe ihre visckerye und narunghe, und fangen desulvigen vaker van ohrer up ohrer fischerye, und dringen ße ohrer ane jennige beloninghe fischen tho helpende und ohren eygenen arbeitt thoversumende, je faren ock desulvigen armen lude vaken mith sich henwech und mißbruken ße ohre levelingk vor ohre eygene knechte, welliche mith eynem worde afftomalende recht barbarisch is, darbeneven nhemen desulvigen ohren ock tho vele malen, ohren gefangenen und den witter aver gehegeden und uns verkofften und geguldenen visch, derhalven wy in korten jaren eynen merckliken groten schaden geleden hebben.

Enthlich konnen wy ock nicht unangetoeget laten, alße eth geordent was, dath vor meyddage den kop nicht gemaket werden, ock na deme dage nicht nha deme talle ßonder nha der wicht gekofft werden scholden, hebben de Engelschen nicht desteweyniger den bischopp im landhe mith wath wyße uns unbewust is vermocht ohnen der kop vor sullichem determinerden undt angesetten tidt thomaken und hebben, de olde gewonheytt, nha deme talle tho koepende wedderum ingeforet, und alße ße darum begrotet sullich anthwordt gegeven, deme papen gehuerede syner kergken tho waren, und nicht ohnen gesette tho makende.

Dewile deme nha sullich alles alßo is dath de eyne sake slechtes fromdet, de ander averst oldt und upgehaven is, edder dat de je gefundertt wurde, ßo vele unßer klege deme jegensthan, wy ock uns der enicheytt, besloten und der gestelleden ordenunghe gehorsamlich nhatolevede geneigt und bereitt syn, und darjegen doch ahm daghe, dath van den Engelschenn ethliche beswerunghe herkamen, de woll eyner veranderunghe und beterunghe bedarveden, szo willen wy ersthlich uns verhapen, juwer er. wisch. werden dusße sake mith den konigliken geschigkeden ane sundrige moye unnd unsere widere thodont tachterlich? beschaffen unnd affrichten.

Darnoegest willen wy juwe er. wisch. densthlich gebeden, hebben, dath man by den konigliken oratoren willen anholden, dath ße, nha ohrer heymkumsst ko. mt. dusße sake befelen ut dath de bavenangetoegeden beswerunghe gebetert und geendert moegen werden, vermanen, und sich beflitigen willen.

Thom allerlesten dath juwe er. wisch. de sunst vor dusßer gudt gemeynder wolfart waken und sorgen, de gantze vordedunghe dusßer sake, ßo vele eth uns unde de itzigen antoegunge belangett belangeth[!], an sik nhemen willen, den wy sunst uns tho beschamende nha geboere hirmede willen befalen, und der sake nottrufft uthtorichten heymgestellet hebben mith flitiger und denstlicher erbiedunghe, dath wy unserer plicht nha, densulvigen unsere levelengk geberlichen gehorsam leisten, und unsers vermoegendes tho denen und thowilfaren gantz bereitt und befleten syn und erfinden werden willen. Datum sonnavendes nha reminiscere anno MDXXXV.

Juwer er. wisch.

gehorsame und gantzwillige borgere

de Ißlandeßfarer.