Unsere frunthlichen groth bevorn, erberen wyse heren besunder gunstige unnd guden frunde, wes de redere schippers Hermen Vurborn, schepes, sich aver ethliche juwer er. wt. burgere in Islanth zegelende dhon boclagen, werden juwe er. wt. uth ohrer, her inne vorslatener supplication,¹ vornhemen dewile den, de segelation in Ißlant, so wol den unsern, alss anderen frig yst und derhalven wy ock, de unsern, darhenne segelende, daran, ock sunsth, in ohrer hanterunge, up (de)m lande ungerne vorletzet segen. Szo wolden wy fruntlich bogert hebben, juwe er. wt. de ohren, der byllicheit, daranne borichten willen, darmith den unsern in ohrer bylligen handelunge und copmanschop, aldar up deme lande, keyne meher hinderunge geschen moge, dan alse den juwen, alhir by uns, bogegeneth, also, dath allenthalven leve unnd fruntschop, moge underholden werden. Solchs kegen juwe er. wt., der anthworde wy wedderumb bogeren, thovordenen vynth men uns allewege guthwillig. Schreven under unserm secret(o) am dage Agathe virginis² anno etc. XXXIX.

Burgermestere unnd rathmanne der stadt Lubegk.