15400116HAM00

1540, January 16

Hamburg

Hamburg merchants with Iceland to Hamburg: take position with regard to the plundering of the monastery Viðey in 1539, condemn the governor's actions, and point to the court of law at Althing, where conflicts can be settled, and only then will be ready to support the authorities.

Created for and published on the HANSdoc website of the German Maritime Museum, Bremerhaven, by Bart Holterman in the context of the research project Between the North Sea and the Norwegian Sea: interdisciplinary Studies of the Hanse. Licensed CC BY.

Copenhagen, Rigsarkivet

Særligt stillede landskaber og unionsriger: D 11 Island og Færøerne, Pakke 26 (Supplement II, no. 16)

One bifolio

20,5x28,5cm

Paper

Edges have been cut straight.

Sealed with a signet seal.

Low German

15400116HAM00RAK0

Diplomatarium Islandicum 10:224
Grimur Jónsson Thorkelin, Diplomatarium Arna-Magnæanum

Denn Erbaren Ersamen vnd Wolwisen Heren Burgermeisteren vnd Radtmanne[n] der Stadt Hamborch. vnsernn Grotgunstigen Heren.

Erbare Ersame vnnd Wolwijse heren Vnnse Verplichte vnd gantzwillige Denste syn Juwen Erw. mith vlite tho vorne. Erbare Wolwyse grothgunstige heren, De breue kor. Mat. tho Dennemarcken, vnnsers gnedigsten Herren an Juwe Erw. ouergeschicket Belangenden wedderwillen vnd Doethschlag szo kortes in Iszlandt geboeret syn schoele vnnd dat wy syner Mat. vaget Clawese van der Marwitz vp syn ansoeken mochte verhulpen syn Jegen de deder aldar. dat Jenne tho erholden vnnd tho erlangen. dat dessuluen ordes landtrecht js. Hebben wy geboerliker wyse entfangen. verlesen vnd allenthaluen vermercket. Erfaren warlich sodaen vngeschiglicheit des Bischoppes vor suden. de in den schrifften beschuldiget werdt. nicht gerne wolden omhe ock leuer gunnen. dat he sick eynes anderen vnnd beteren bedacht hadde. Vnnd wowoll wy nicht vngewilliget syner kon. Mat. alstedes to behagen. vnd dem Vagede mith leistung begerdes Bystandes wedder syn Jegendeel bytoplichten. Konnen wy vnnsz doch des vp detmaell nicht harde verseggen. Wente de Vaget handelt so woll mith vnnsz alsze mit andern beschwerlich. vnnd wolde in dussem negestuerlede sommer aldar vor Suden den koep des Visches vnnsern koepluden nicht so drade setten. alsz anderen sunder verlettede sze darmede. vnnd hefft ock mith todaeth der Lubschenn Bremer vnnd seynem eygenem volche in vergangener pingestnacht eyn Closter Wydoe geheten jngenamen wes dar an guderen vorhanden gewest. an sich gebrocht vnnd daranne nicht gesadiget. denn ock de arme lude. de tom Closter gehoeren. vnd tho der tijdt darup weren fencklick genamen, vnnd welliche sich an ohn geholden. desuluen loes gelaten. De anderen. so sich des geweigert strackes verwyset. Weten auers nicht. mith wat fugen vnd redenn. vnnd wowoll der doethschlach daruth sick vellicht hefft togedragen vnnd verorsaket. szo mach doch der Vaget woll geneget vnnd noch der meinung syn. dat speell wedderum thovernigen. vnlust anthorichten vnnd vnnsz nicht allene aldar in fare thosetten. Sunnder ock vnnser hantering vnd kopenschop der gestalt tho hinderen vnnd tho schwechen. dat vnns warlich vnnsers deeles tho erwachten vngelegen. Wente wy segelen nicht darhen tho der behoff vele weyniger Jemandes tho vervnrechten. edder dem Jennen by thoplichten. de sodans vorhefft edder oueth. Sunder dryuen vnnsen Cophandell vnnd ock eynes deeles vnnd etliker mathen. glyck mith den regenten vpnd vndersaten. dessuluen Jngenamenen Closters, Scholden wij nhu desuluen vnerkanter sake. na der wyse beschweren edder verderuen helpen. steith vnnsz nicht woll an. Wetens ock noch tortijdt wedder rede noch orsake. Dar auers de Vaget sick wolde benoegen laten. an deme dat syne Vorfarenn aldar gehatt vnnd vpgenamen. Vnnsz ock vnnd de Jennen szo mith vnnsz hanteren bauen olt herkamen vnd wedder syne gedane tosage. nicht beschwerede vnnd in dussersuluen sake na reden vnd recht procederen vnnd vortuaren. Dhe vermeinde selfschuldigen bespreken vnnd Justicie bidden wolde. dat stunde ohme jm alding szo vp Petri vnd Pauli aldar gemeinlich geholden werdt. Ja apen fryg vnd vnverbaden Vnnd scholde sunder twiuell. tho erlanginge der sententie vnnd darup volgender straffe baten. thor eindracht dienen, vnnd ohm tho sekerheit vnnd guden erspriessen vnnd wenner he an des erholdenen ordels Execution dorch Jemandes Je behindert vnd vpgeholden worde. vnnd vnnsz van des wegen requirirde. alszdenn willen wy dem rechten thostuere. ohme gerne byplichten vnnd vnnsz vnsers deeles daran keyne moye edder fhare erwinden laten. wo wy alstedes hieruor gedaen. vnd glikes falles vns an den vaget geholden hebben. Vnnd tom latesten De wile koe: Mat. vnnser gnedigster herre doch Jn andacht vnd meynung js. dat hillige Euangelium vnd Christliche Ceremonien in Jszlandt antorichten. vnd tho forderunge dessuluen vellichte eyne Schoele bestellen werdt. vnd dat Closter Wydoe to Gades ehre vnnd erholding nottorfftiger armen gestifftet, vnnd ock van framen luden tho der behoff ricklich begifftiget. aldar schon vorhanden, Szo willen wy vnns woll verhapen syne Mat. alsz ein Christlich Furste werdt eth in prophan vnnd vnrechten gebruck nicht kamen edder bewenden laten. Sunder mehr verschaffen, dat eth sampt syner tobehoeringe. to vtbredinge Christlicher louens vnd leue henfurder stedes in esse vnderholden blijue. Denn wowoll der Closter vnd begeuener personen nhu tor tijdt aldar weinich. vnnd nicht bauen dree edder veer vngeuerlich. szo werden doch daglikes, mehr denn vertich armer lude daruth gespiset vnnd versorget. vnnd de orth js ock bequemer. also gelegen vnnd des vermoegens. dat mhe mith der vpboeringe de Schoelregenten. wenner eth tho der permutatio gelangeth lichtlich konde versehen vnnd versorgen. Dat Je eyn milde nutthe vnnd gudt werck. vnnd vnnsers einfoldigen bedenckens der fundation des Closters nicht vaste vngemete. Vnnd wyllen Juwe Erw. willenn sodane antoeginge an vnnserm gnedigsten herren den koning gantz vnterdenigen ouerschriuen. vp dat syne Mat. dorch eynen dunckelen. anderen edder vnrechten bericht. mith dem Closter szo uort dat genne nicht late alieniren edder veranderen. dat tho Gadis Ehre vnnd erholding der armen gehorth vnnd beth anher alstedes darhen js angewendet vnd verbruket geworden. wy ick in Jszland am gebruke vnser woentliken hantering. dorch den vaget. an wegerung den koep to setten. vnd anderen nicht ghehindert denn mehr togelaten vnnd vortgefordert werden. Angeseen dat Juwe Erw. wy alle sampt. beneffens gemeiner burgerschop vp syner kon. Mat. begeren to bescherming landt vnd lude mit vnsen schepen vnd volche vnd susts alstedes bereit syn vnd gudwillich erschinen. ock to vnserm eigenen nadel vnd schaden. Alsze Jm negst verledenen sommer js geboeret. Dho vnse vthgeredede schepe vnd gehurde Boesuolck vp der Elue szo lange arresteret vnd an der reisze vertoegert geworden vnd verbeiden hirup ein gnedich vnd gud bescheet wedderum. Vnd syn eth henwedder to verdenen vnsers vermogens schuldich vnd vnuerdraten. Datum vnder vnses einen pitzschafft am Auende Anthonij Anno etc. xl.

J. Er. w. gehorsame vnd gudhvillige Burgere Coplude vnd schipper szo jtzund vp Jszlandt hanteren.

Transcript copied from Diplomatarium Islandicum.