Friderich der ander vonn gots gnadenn zu Dennemarckenn Norwegenn der Wendenn unnd Gotten konnig herzog zu Schleswig Holsteinn Stormarn unnd der Dithmarschenn grawe zu Oldenburg unnd Delmenhorst.

Unsernn gnedigstenn willenn zuvor. Ersamen liebenn besonndere, unnd hatt unnser einwohner unser stadt Koppenhagenn Heinrich Muhmme bericht, welcher massen ime uber unnser habende begnadung, darmit wir ime die haffenn Ostfyordt genandt auf unserm landt Isslandt verliehen, vonn eurm mitburger Christoffer Meyer geheissen, eindrang widerfahren sol. Nuhn wir euch dann mehr als eins desfals gnedigst vormant, unns begert, bey denn eurn die schiffart der ende hin, ein, unnd abzustellen, hetten wir uns billich versehn sollenn, das dem in underthenigkeit solt gelebt wordenn seinn. Wie aber dem, wolten wir auff gemelten unnsers einwohners ansuchenn unnser gnedigste erinnerung, unnd verwahrnung hirmit repetirt, unnd widerholt habenn, mit gnedigstem begern, solche verbottene schiffart und sigillation abzuschaffenn, unnd sich deren gentzlich zuenthalten. Wirdt jemandts hiruber was begegnenn, inmassenn wir dann notturfftige verordnung gethan, gegen solche verbrecher unnd uberfahrer mit ernst zugebahren, unnd zuverfahrenn. Werden sies niemandts, als inen selbs zuclagen haben, und sich aber vor schadenn zuhuttenn wissen, unnd wir seint auch mit nachbarlichenn willen inn gnaden zugethan. Datum uff unserm schloss Friderichsburgk denn 1 februarii anno etc. im 67.

Friderich.