Hochwurdigster in gott durchleuchtiger undt hochgeborner furst, e. f. g. sein meine underthenigste, gehorsambste dienste, jederzeitt zuvor. Gnedigster herr, e. f. g. mach ich in underthenigkeitt nicht verhalten, was massen in der durchleuchtigsten undt großmechtigsten kon. maitt. zu Dennemarck etc. deren kuningreichen undt insulen Ißlandt zwey haven, als nemblich bei nöerden Ißlandt Schagevor, undt bey osten Ißlandt die Berföer genandt, gelegen, undt dieweill gnedigster herr, dieselbige haven undt insulen itzunder unbesiegelt, undt die Englischen aldar allein vom lande ab in der wilden sehe auf duggerey liggen, undt die innehaber keine sonderliche commertia, undt hendell derohalben haben, ich aber meiner geringen gelegenheit nach, mit denselbigen wharen, so aldäer mugen verhanden sein, uff gott, undt guedt gluck, ob ich aldar wes nutzliches, undt vortregliches mit redlicher, undt aufrichtiger kauffmanschafft ausrichten konte, zuversuchen willens. Als gelanget hiermit an e. f. g. meine underthenige vleissige bitt, dieselbe geruhen an hochstgemelte kon. maitt. zu Dennemarcken etc. mir eine vorbittschrifft gnedigst mitzutheilen, das dieselbe mich mit dreissig jharen freiheit, uff gemelte insulen, undt auch das kein kauffman innerhalb solcher jharen bey mir auf zwolff meilen (wie solches in dem lande gemein undt gebrauchlich ist) keinen kauff zusetzen soll macht haben, allergnedigst privilegieren, undt begnaden mochten, den ich mich zu nutz undt besten gemelter insulen, da ich solch privilegium, undt freiheit erlangen undt sonsten fur unglucke der almechtiger, mich gnediglich behueten wurde, mit allerlei notturfft uff etliche jhäer versorgen muste, es wurde mir sonsten die unkosten so ich darauf wenden mues, nit erstatten, so bin ich dargegen gantz underthenigst erbottig, wie dan auch schuldig undt pflichtig hochstgedachter kon. maitt. den gebuerlichen zollen, mit allem trewen vleis zuerlegenn, undt zubetzalenn, der trostlichen hofnung, undt gentzlichen zuversicht, da e. f. g. mit als derselben gehorsamen diener, die gebottene promothorial undt vorbitschrifft gnedigst mitteilen wurden, gedacht privilegium undt freiheit, von hochstgemelter kon. maitt. zu Dennemarck etc. in allerunderthenigkeitt zuerhalten, undt zuerlangen. Solches umb e. f. g. in underthenigkeitt mit ausserstem vermugenn zuverdienen, bin ich willig undt schuldig, dieselben gottlicher gnaden zu langwiriger furstlicher regierung, undt wolstandt, underthenigst, unndt getrewlich empfelendt. Datum am 14ten octobris anno etc. 81en.

E. f. g.

underthenigster gehorsamer diener

Clawes Stein.