Ihnn gades namenn amenn thovorenn, ernttvester unnd gelertter her Augustinnus Erich, jur ernnttvester unnd erbar gunstenn gesundthedt, unnde wolvardt sampt des herenn frundenn iß my leff, vor my sampt denn mynenn dannck ick godt hoichlikenn wider so voge ick jur e. unnd erbar gunstenn tho wetenn, datt de lockemann, Joynn Joynßenn begeredt, datt menn eynn scip mach senndenn inn de have Rutevor inn Isslanndt, unnde hefftt dar umme geschrevenn, na Kopenhagenn inn de kentzelie, umme eynn pass vann k. m. wenn menn nu erlangenn mochtte vann k. m. eynn pass, up de have Ruteforde, up wenn datt mynn gunstiger her datt pass woll makenn solckes stelle ick tho mynes herenn gefalle, unnde wenn k. m. darmydt vorleynenn will, dess lockemans naim is Joynn Joynßenn, unnde dusse mann so affgesundt is, synn name is Jurgenn vann Wynßenn, unnde mynn name is Hanns Elers watt mynenn groitgunstigenn herenn hyr inn tho radenn dunckett, densulvigenn will wy volgenn denn ick kann jue e. w. unnd erbarhedt nicht vor enttholdenn, datt idt uns vann denn wordt holdende herenn borgemeister wass na gegevenn uns eyne vorschrifft, mydt tho delennde, unnd eynenn erbarenn hoich wysenn rade, nu vorneme wy dan Laurens Schroder eynn pass schall hebbenn, datt Jochym Holste anno 1591 heffet gehalett,¹ unnde hebbenn datt pass inn de kistenn gelechtt datt de armenn lude inn ohrer have de nodttrufft nichtt hebbenn bekamenn, datt derwegenn de lockemann dar begerdt eynn scip tho habbenn, nu woll ick nicht gewenn datt idt Engelskenn offtt anderenn scholde vor gundt werdenn, idoch wenn jue ernttvestet unnd erbar gunstenn, dar inn holdenn wollenn dattsulvige were wy woll tho fierdenn, nu seynn hyr 2 personenn alss Jurgenn Viltter unnd Jochym Holste, denn iss de have Schavestrandt vorleynett² vann k. m., tho befarennde desullvigenn, synn dussenn Jurgenn vann Wynße tho wedderennde, unnde wollenn mydt ohrer have gerenn Isslandt alleyne hebbenn, unnd wollenn woll datt nemandt up Isslandt vore als se alleyne, als ick vann dussenn Jurgenn vann Wynnßenn hore, so begerdt de lockemann nicht, datt Jochym Holste offtt Jurgenn Viltter dar schollenn kamenn, dewill datt he se nicht begerett, so bidde ick datt dussenn Jurgenn Viltter offtt Jochym Holstenn offtt Lauerennss Schroder, anvorderinge wordenn donn vann dusse have Ruteforde, datt ohnn solckes mach affgeslagenn, werdenn, denn dusse have lichtt 15 myll weges vann denn Schavestrantt dusse have Ruteforde licht der have Isseforde neger alss denn Schavestrannder. Vor 6 jarenn iss de have Ruteforde besegelltt vann Jochym Warnekenn, datt iss denn Ißevorders woll tho wedderenn gewesenn, unnde ock denn Schavestranders, de koiplude so dar up hebbenn gevarenn, hebbenn datt nicht werenn konnenn, unnde dewill datt dusse Lauerenss Schroder mydt denn pass nicht iss vordt gevarenn unnd heftt de armenn lude nicht vorsorgett so vorhap ick my menn werde unnss dutt pass gonnenn, unnd so vernn dess hernn will unnde tho neginge iss darmydt inn tho holdenn solckes konne wy woll lidenn, wenn wy gude lude hebbenn, de ohr geldt tho rechtter tidt konnenn leggenn, offtt wy dutt gudt schepenn tho Kopennhagenn, offtt up der Stor, offtt tho Hamborch, darna schall dusse mann erkundenn wor menn de guder vor gelltt best bekamenn kann, denn wenn datt scip wedder uth dem lannde cumpt, so synn de guder ann bestenn inn Hamborch vorkofftt, dusse mann werdtt jurer e. unnd e. gunstenn alleynn beschedt vormeldenn, gedt idt unnss woll unnd datt godtt unnss bewartt, so will wy dannckbar synn sennde jur hyr inn eyne kleyne vorerunge tho der gedechtenisse, bidde willett solckes vor leff up unnde annemenn, wor wy i. e. unnd erbar gunstenn wedder deynenn konnenn noch unßerenns vormogenns, datt do wy gerenn, inn dem datt dusse have, tho unßerenn hanndenn cumpt, so vorhap ick my datt wy idt willenn makenn, datt nemandt schall tho klagennde hebben sunst wedt ick mynenn gunstigenn herenn, nichtt mer tho schryvennde, denn ick befell i. e. gunstenn denn almechttigenn gudigenn godt inn gnadenn mydt wunskunge vell guder nachtt. Dattum uth supra per m(e) Hannss Elerss i. w. a.