1. Omme the bewiisen ende the verclaren sulke nywicheyden, bezwaringe ende ordinancien, als die ses Wensche steden, een deel dairof wtter name van den gemenen steden van der Duytscher hanze, ende een deel dairof bii hemselven ende wt boire selfs name gemaect ende opgestelt hebben tot last, schade ende achterdeel van den coopluden van den landen van Hollant, van Zeelant ende van Vrieslant, boven ouden gewoenten ende tegen den gemenen lope van der comanscap ende sonderlinge contrarie den inholden van den bestande, die tanderen tiden tusschen denselven landen van Hollant etc. op deen ziide ende den voirscreven ses Weensche steden op die andere gemaect is geweest, so segghen die voirscreven van Hollant tgheent dat hier naevolcht.

....

30. Item tis geschiet, dat over 2 jaren geleden Marck Symonssoon van der Veer ende Ombehouden van Aemsterdam quamen zeylen mit horen scepen onder Jisland voir die haven geheten Hanevoort, dair die Engelsche mit 4 scepen in waren ende mit noch een scip, dat sii den Oosterlingen genomen hadden. Ende die voirscreven Engelsce, siende dese twee scepen comen, seylden tegens hemluden wtter haven, omme dieselve scepe mede te nemen; also dat si buten der haven comende elck den anderen bevochten ende hoir beste deden, om elck den anderen te nemen. Ende int eynde nae dat si lange tegens malcander gevochten hadden, soe ruumden die 3 Engelsche schepen ende lieten dat een scip after, geheten die Peter van Hul, mit dat Oostersche scip, die welke 2 scepen mit die goeden darin wesende Merck Symonszon ende Ombehouden doe namen. Soe gebuerdet dat in den voirscreven scepen waren beyde Engelsce ende ooc gevangen Oosterlinge. Dit aldus gheschiet, ende dese Engelsce bii Marck ende Ombehouden genomen ende becrafticht wesende, gaven ter stont Marck ende Ombehouden de Oosterlinge van der vangenisse quiit, ende deden so vele meer, dat si de anderen Oosterlinge, die in den anderen Engelschen scepe gevangen gebleven waren, losten van hoirre vangenisse, gevende om enen Oosterlinge 2 Engelsce, ende deden voort den Oosterlinge alle die vrienscap dien sii conden ende mochten, mids dien dat si se gaven teten ende te drincken alle die reyse duer, ende wt Jislant hier int lant overvoerden, sonder yet dairof himluden te eyschen ofte nemen. Twelck die voirscreven scippere, als hi overgecomen was, doe wel bekende, alst scheen, want hi doe willich voir tgerechte van Aemsterdam quam, bedanckende Ombehouden ende Marck Symonszon ende alle hoir geselscap, ende bekennende, dat sii hem ende siin geselscap alle guet ende geen quaet gedaen en hadden ende dat sii ooc siins ende siinre coopluden goeden niet genoten en hadden. Des ist gebuert, dat Pieter Pieterszon, poorter van Amsterdam, die mede een coopmann was in Ombehouden scip, dairna gecomen is in der stadt van Hamburch, dair Herman Roetgerszon, niet tegenstaende al dat voirscreven is, hem dede vanghen ende mit gebonden handen brengen voir den rechtevoocht, dair hi borge stelde, rechts te plegen, ende die sake was gewiist opt beste betooch aen beyden siiden. Ende hoewel Peter Peterszon tot Hamburch seynde certificacye van Dirck van Poelgeest, burgermeister van Leyden, onder derselver zegel van Leyden, item certificacye van den grave van Bochem, ende certificacye van tgheent dat die scippere van Hamburch voir tgerechte van Aemsterdam getuucht ende bekent hadde, soe ist nochtant bi den raedt van Hamburch op die getuuchnisse van 2 mannen, sulck als die siin, die voirscreven Peter Peterszon gecondempneert in die summe van 500 marck op Hermans selfs ede ende nae siins selfs eysche voir sekere cleyne percelen van goeden, niet wairdich wesende tesamen 80 of 90 marck: begeren die gedeputeerde van Hollant, dat bi der stadt van Hamburch den voirscreven Peter hierin remedie ende sulke provisie geschien moge, omme buten schade te bliven, als dat behoort.

....