Unsen fruntliken grut mit vermoge alles guden tovorn.

Ersamen wysen heren unde besundern guden frunde, de hovetlude unde procuratores des copmans to Bergen in Norwegen residerende hir hynnen Lubeke synde hebben uns des genanten copmans van Bergen Bref, an se gesant, entogen unde lesen laten, dar inne se sik under anderen beclagen, wo in juwere unde ethken anderen steden borgere unde coplude uppe dat nye in Islande unde Veroy uthredinge gedan hebben, dat doch van uns steden afgestellet zij,¹ welliket denne der Nedderlage to Bergen to groten vorvange unde merklikem schaden kome, unde des Rijkes Norwegen Rederen gantz sere entiegen, de ok des gar ontofreden zin. Darumme oft jemand to Bergen beslagen worde dede in Island edder Veroy uth den steden gesegelt gewesen hadde, den en kan noch enwil de copman to Bergen erben mit der stede privilegie unde rechticheid nicht vordegedingen noch beschermen. Dat wij juw alzo in deme besten geven toirkennende, vruntliken biddende, gij juw in den dingen, so id van den steder belevet unde deme gemenen besten nütte unde van nöden is toholdende, so dat derhalven de juwen umbelastet ok furdere moije, schade unde miishegelicheit, dar uth erwassen mochte, vorbliven moge. Dat sint wij umme juw gode dem heren in saliger wolvard toentholdende bevalen tovorschuldende geneget. Screven under der Stad Lubeke secretum, des wy uppe ditmal hir to samptliken gebruken. Ame frigdage na deme sondage Cantate anno etc. Lxxxvi^o.