In Godes namen Amen. Witlick sy alle den jennen de dusse schriffte zehn edder horen lezen, dat wy, Hermannus Meyger in der hilligen schrifft doctor vicarius, Ludolphus Lemmeke prior, Gerardus Twelhoff supprior, unnde alle ander broder prediker orden Sunte Johans klosters bynnen Hamburg mit den ersamen mennen Henningh Raven, Hinrick Vramen, Hans Help, Hans Hobingk, Hinrick van Wynßen, Hinrick Rumeherd, Kersten Lübben, Detleff Honesschen, Bernd Engelken, Everd Smyd unde allen andern kopluden unde guden gezellen der gesellschup der Yßlandesfarer. So se uth milder herten weren bewagen Gode almechtich unnde syner benedieden leven moder Marien tho lave unnde tho eren unde sundergen der leven hillighen patronen sunte Annen, Thorlaci unde Olavi, to troste der levendighen unde doden, to funderende unde tostifftende ene broderschupp genannt Sunte Annen der Ißlandesfarer, sint avereyngekamen in dusse unse interste, hebben wy ere milden andacht unde herten mit wolbedachten mode unnde rypem rade to synne genomen, unnde en vorlovet gegunneth unde bestedighet vorloven ynnen unde bestedigen en jegenwerdigen in kraft dusses breves eyn altar mit enem rume, belegen tusschen den veer pileren, de utersten in unser kergken int nortwesten, mit ener fryhen grafft, dar in se mogen lathen begraven alle de jenne de ere grafft aldar begehren, unnde in ere brodersschup horen welker altar unnd rum de olderlude der brodersschup mit vulbord unnsses priors tor ere Gades megen tzyren, flyhen vnnde schigken na erem willen, averst müren, fenster unde dagk, schal holden unnse kloster unde betern wanner dat is von noden. Wy scholen unnde willen ok nene tzyrheid grafft edder stene dar inne hebben edder leggen lathen. In allen tokamenden tyden, id sy mit der brodersschup willen unnde vulbord, uppe dat denne, sollicher angehanen brodersschup halven de almechtige God mit synen utherkorn moge gelavet unde gebenedyet, de levendigen unde doden getrostet werden, hebben wy nach bede willen unnde begerte der erbenannten olderlude unde gemenen broder, en gelavet unde togeseyht, so wy jegenwardighen dhon alle weken twe missen, de ene des mandages in de ere alle Cristen zelen, de ander des dinghstages in de ere der hillighen frouwen sunte Annen, to ewighen daghen thoholdende, jedoch hoghefeste unnde noth uthgenommen, darto jewelikes jares twe begengknisse mit vigilien vnde zelemissen, nomliken de ene ummetrend mitfasten wanner de schipher von hyr na Ißland gedengken tosegelende, unnde de ander des mandages vor sunte Andreas daghe, so verne up densulven dagh sunte Kathrinen dagh nicht en queme, anders up den dinghstagh darna, alle Christen zelen unde sundergen allen uth dusser brodersschup verstorven to hulpe vnnde troste thoholdende. Ock schal men in allen festen unde sondagen by namen uth dusser brodersschup verstorven, vor denn sermone gedengken unnde God almechtich truweliken tobiddende. Hyrto maken wy alle de jenne de jegenwardigh in dusser brodersschup syn unnde noch dar in kamende werden, mede delhafftich aller guden wergke de God almechtich durch uns unde alle unnse nakomelinge unnses closters, dagh unnde nacht to ewighen tyden, leth gescheen. Alse denne de erben unnse guden frunde bavenschrevenn de gude willen unnde truwe toveginge bavenschreven hebbn gezeen unde gemergket, sint se worden bewagen unnde tosynne geworden, dat up dat sulche godesdinste in bestendlichen unde ewighen wesende bliven mogen, unnß unnde unnsen kloster umme Gades willen in redem gelde hebben gegeven unnde togekeret vyfundesoventich margk penningk. Darto schollen unde willen uns de olderlude der brodersschup alle jar geven voffteyn margk penningk, de alle jar uppe de tyde der begengknisse bavenschreven tobetalende. De wyle se den hovetstoll nicht uthgeven de kor doch sall by enn stan, de by unß unde by unßem closter to ewigen dagen toblivende unde der to unßem besten nuth unde profyte tom dinste des almechtighen Godes togebrukende, des wy en boven godeslon hochliken bedangken. Wert ok dat sulche missen unde ander vorschrevenn artikell so vorberort nicht wurden geholden, so schollen de brodersshup sulche renthe nicht uthgeven. Alle unde itzliche puncte unnde artikell in dessem breve begrepen, belaven wy Hermannus doctor prior unnde supprior unnde gantze convent bavenschrevenn deger unnde alle wol tobeholdende in allen tokamenden tyden, sunder alle argelist und behelpinge der rechte, unde hebben der to groter vorwaringe unses closters ingesegell mit frihem willenn witliken an dussen breff heten hangen, unnde wente uns Detleff Bremer burgemester unnde Bartelt von Ryne rathmann to Hamburg, alle dusse dingk mede witlick synth, also hebben wy umme beyder parte bede willen unnser jewelyck syn ingesegell tor witlicheid an dussen breff, der twe synt, eyn by dem convente, de ander by den olderluder dusser brodersschup in vorwaringe, heten henghen. Gegeven nach Cristi gebord unnses hern voffteynhundert, am dage sunte Ambrosius.