Vnszern fruntlicken groth beuorn, Ersame Wisze hern besundere gude frunde Sumyge vnser borgere hebben vns In klagen to Irkennen gegeuen wo se am Jungest vorgangen vorjar eyn Schip, dat schipper Hinrick Haneman geforet, In Islande In de Kummerwage Tho sinde, frachtet hedden, So nu de Schipper In de apenbare Szee gekamen, des were ome darsuluest eyner Juver schepe, dat Kersthen Junge geforedt angekamen, vnd na bespracke van der vnszen Schipperen, wulde hebben, dat he niyt omhe In de Grindeforde, scholde lopen, des der vnszen schipper na deme darhen nicht vorfrachtet, hedde don willen, derhaluen so hedde genannthe Kersten Junghe, wreuelickes modtwilliges vornemendes, sunder Jenige rede, tho der vnszen Schepe Ingeschaten vnd upgedacht' Schippern Hinricke Hanemanne, den eynen Knaken am lyue affgeschaten, dar van he, bermelick vam leuende thom dode gekamen, des wy vns nicht vorszen, de wile wy myt Juven E. effthe' den erhen, nicht anders dan alle gude vorwethen, den vnszen eyn szodant van den Juven scholde sin bortgendt(?) Szo nu gedachte zelige Hinrick Haneman, auer dat Schipp vnd Jngeschepede gudere beyde Schipper vnd Kopman gesettet, des vnsze borgere, durch sinen dotlicken affganck an orhen guderen tho mergklickem schaden geforedt dar myt ouen, se gy suluest riplick to bedenken hebben, nicht steyt to gedulden Deme Na fruntlick bidden vnd begeren, dat gy vilgedacht' Kersten Junghen. syne Jnnehebbende koplude, schepkindere, sampt sinen rederen dar to willen vor hebben, dat se des zeligen Schippern angebornen frunden de welck jm Stichte van Bremen, belegen sin, vor den doden helsz vorsoninghe don, vnd vnsze borgeren, oren magklicken schaden den se der wegen geleden lesten vnd gelden, uppe dat wider moije vnd vnlust, de der wegen, dar Jd nicht geschege Jrwassen kunde, mage vorset blyuen, dat velichte deme vnschuldigen, de des nichtes tho donde, tho nadell vnd schaden kunde recken, dat wy J. E. guder menyge vppe der vnsze Jrsakent, so fruntlick tho Jrkennende geuen, wor wy den sulfft‘ Ere vnd denste konen bewiszen sin wy geueget, vnd bogerens Juve richtige antfworde Scr(even) vnder vnszer Stadt Se(cret). am dinxstedage na om(nium) S(an)ctor(um) Anno etc xxiij.

Consules Ciuitat(is) Bremenszis.