Deme konynge vnssem ouerstenn herrenn

Inn der allerunderdenigstenn wysze schouwen vnn clagen, Juwer allergnedigsten hocheit, Juwe vnderdenige vnnd getruwe vnderssatenn vnd dagelike bidders Joha(n) browne van Bisshops linne Jm lande van Norffolck, copman, Will(iam) Kenneth vnnd Johan Sowermere van dersuluen Stadt ock Coplude Dath woer Juwe vorgenomedenn vnderszatenn weren besittere vnnd tobehorere eynes schepes de Thomas van Hull genoemeth van der bordenn van sostich tunen edder darumtrent Welkere schip Juwe vorgedachten vnderszatenn frachteden vnnd loeden to ohrer groten kost vnnd last mith xxiiij wage saltes vnnd anderer ware vnnd Copmansguderen notturfftich vnnd denstlick auertouorenn vnd to senden ynn de parte edder plecke van Iszland na verlope der copenschupp dhar, vnnd mededen edder hureden ock vnnd geuen hoen to tweundvifftich boszlude vnnd fisckermennen auertouaren vnd to szegelen yn demesuluen schipe Jn Iszlant vorgesecht, Welkere schipp szo gefrachtedt vnd geladenn mith vorgedachter ware vnnd guderenn, vnnd mith den gemelten lij boszlueden vnnd fisckermenen, Juwer vorgedachten vnderszaten, gynck to szegell vann bisshopes lynn vorgenoemeth, vmtrent dem XV dach Martij last erchene(n), towarde Iszlande vorgenoemeth, Vnnd szo is eth allergnedigste vnnd overste herre, dath vorgedachte schip szo gefrachtedt vnnd geladen mith dem vorgedachtenn lij perszonen Juwen getruwen vnd naturliken vnderszaten wesende in demsuluen schepe, vnnd alszo eynander schipp eynes Robbert leige vnd Thomas hamonde van herwiche ynn uwer grauescopp van Essex weszen gefrachtedt vnnd ladenn mith lyker ware vnnd guderen, vnnd ock vher styge vnnd mher perszonenn van Juwen truwen vnd naturliken vnderszatenn weszende yn demsuluen schepe, weren genoediget vnnd gedwungen duch storm vnd vnstumicheit des wedders intolopen vnnd tokamen in de hauen van bousann Jn Iszlande vorgenoemeth, To welkerer tydt eyne luthke Smith van Hamborch Copman synde yn eynem groten holcke hebbende krygesuolk vnnd groth geschutte in demsuluen holcke liggende vor eynem anker in dersuluigen hauen, vnd tykerwysze eyne hans smith luthkens bruder Was ahn landt vppm. ouer geselsschoppet mit Ixxx krygesmennen, welkere werenn verbunden mith deme vorgedachtenn luthkenn, Vpp welkere tydt eyne Jurgen browne wesende eyne van den boszludenn van Juwen vorgeschten bidders gyngk vorwarth In vorgedachten schepe eyn anker vallen tolaten, vnnd eyne van der geselschopp vorgedachtenn luthkens schot alszofort densuluen Jurgen durch de borst mith eyner hanthbüssenn ane Jennich sprekent edder warschawent, Vnnd darnha alsze eyn ander van den vorgedachten boszluden Juwen vnderszaten, wolde hebben geworpenn dath anker van demsuluen schepe Juwer vorgeechten vnderszatenn was ock vorth schamlikenn geschotenn, van eynem dersuluen selschopp durch dhe schulderenn mith eyner andern hanthbussenn, Derhaluen nachdeme de nicht kunden gelodenn werdenn eyn anker vallen to laten in vorgesechter hauen, dreff gemelte schipp durh starkte vnd strengte des waters edder stroms am dath ouer ahn grundt, vnnd denne de boszlude van vorgedachtem schepe Juwer vnderszatenn dewile de vernhemen dath dath gemelte schipp lach in groter vhare vnnd noth vnnd lyck to blyuen, gyngen in dath schepesvolk vnnd woldenn hebbenn vthgeforeth ohr anker in vorgesechte hauen tho der meynu(n)ge vnnd behoff dathsulue schipp wedderum afftowyndenn vnnd dath alszo dardurch to bergenn. Soo wolden gedachte luthke vnnd syne quaden byplichtere vnnd geselschopp in keynerwysze gestadenn vnnd tolaten dath vorgedachte anker vthtoforende Sunder gewaltich vnnd gruszamlich schoten hantbussenn vnnd hagelschott szo digke vpp vorgesechte boszmene dath dhe dar doededenn eynen van Juwenn vnderszatenn, vnd stelleden de andern darna in szo grote vhare vnnd fruchtenn dath dhe nicht dorstenn werpen ohr anker sunder gingen wedderum yn ohre schipp vorgesecht, Worupp de vorgedachte ludtke sendede vor eynen Johan wyler schypper vorgedachten schipes gebeden ohme tokamende to ohme vnnd makede geloueszame vnd getruwe geloffte demsuluen whyler dath he scholde khamen vnd gaen geleithlick ahne Jenige verszerunge vnnd schadenn, Vnnd denne de gesechte wyler gelouende vorgedachtenn bodreghlikenn vnnd vngetruwen gelofftenn des vorgesechtenn luthkens, gyngk to vorgedachtem luthkenn weszende yn deme holcke vorgerurt, Vnnd alszo drade de vorgesechte wyler was bynnen schepesborth, mith vorgedachtem luthkenn, ohme was gebadenn mith groter vustdrouwynge vnnd verschregkkynge van demsuluen ludtken to senden vor de bussenn, geschutte, vnnd where vorgedachtenn schepis Juwer genoemedenn biddere, szo dath gedachte luthke grouwszamlike vnd grymmichlike sede to ergedachtem whyler. Ifft he nicht wolde fynden de anslege vnnd wege dath de vorgesechte bussenn vnnd where wurden geleuert he wolde handtdadichlike houwen aff syn hoeueth, Worupp de vorgesechte whyler durch groten fruchten vnnd fhare synes lyues sendede nha vorgedachte geschutte vnnd were, vnnd vororszakede dath dat gebracht wurdt yn den vorgedachte holck, Vnnd alszo balde alsze de vorgedachte luthke hadde enthfangenn, vnd ahn sick genamen de vorgesechten bussen vnnnd were van vorgesechtenn wyler He wetende vnnd vernhemende dath Juwe vorgedachten vnderszaten hadden nenerleye geschutte edder were yn vorgedachtem schepe makede sick rede vnd gyngk to gemeltem schepe Juwer vpgemelten bidders vnnd dar mith gewalt vnnd gewapender handt growszamlik vnnd spythlik nicht alleyne naem vnnd vorde wech alle gudere ware vnnd vitallie vth demsuluen schepe, Sunder ock spythlikenn vnnd Jammerlikenn houwede van ander datsulue schipp, mith exen bylen vnnd andern gelikenn instrumentenn vnnd szo aldar synked gedachte schipp yn der hauen vorgeschecht, vnnd tor Stundt darnha de vorgesechte boesze growszame vnd vnbermehertige geselschopp den gemelten luthkens gyngen nha vnnd veruolgedenn sodane Juwe arme vnderszatenn alsze vor de beschuttinge vnnd reddung ohres leuendes weren gaen to lande vth dem gedachtenn schepe, vnnd alsze de dar szexenn vnnd warwurdenn eynes Johan stockdaell vnnd eynes Thomas pergkyn weszende twe Juwer gesechtenn vnderszaten sittende vpp ohren kneen vnnd demoedichlikenn biddende vm der bermeherticheit godes willenn ohre leuent to sparende, de gedachte bosze geselsschupp growszamlikenn vnnd wreuelikenn howeden na dem gedachte Johan stockdale vnnd Tomas pergkyn, vnnd eyne van den gruwszamlik vnnd jammerlikenn clouede Johan Stockdalen houet van ander mith eyne byle Vnnd likerwysze eyner Clouede gedachten Thomas pergkyns houet van ander Vnnd szo de vorgedachte bosze vnnd growszame geselschupp gruwlik vnnd Jammerlikenn heuwen erslegen vnd mordeden vpgemeltenn stockdall vnnd pergkyn vnnd darbeueuen lemeden wundeden vnd szerighdenn menige andere van Juwen vorgedachten vnderszaten welkere gyngen to lande vth gesechtem schepe vnnd hebben ock gruwlikenn vnnd defflikenn spoliert vnnd beroueth Juwe gedachte bidders van ohren guderen vnnd ware vnnd van ander gehouwenn vnnd geszengketh ohre schipp vpgemelt, Welkere schipp takell geschutte were vnnd kopmansgudere yffte idt hadde gode almechtich behageth, dath eth muchte hebbenn wedder tohus gekhamen mith beholdenerwysze wolde hebbenn werde west to denn eyn dusent Ib. sterlinge vnnd mheer welkere nu byck is verlouren to synde to grotem verluste hynderynge vnd vterlikem verderue, Juwer vorgesechtenn vnderszatenn, Warum geleuede idt Juwer allergnedigstenn hocheit yn boweginge voriger rede dath nachdeme hir vpp dusser Jegenwardigenn tidt vheer schipe van vorgedachter Stadt hamborch synn, ynn Juwenn ryuere der Themesze, idt will gefallen vnnd behagen Juwer hocheit to gebeden eyne boszate vnnd arrest to leggenn vpp gemelte schepe. Vnnd dath by deme hogen wiszdome Juwer allergnedigsten hocheit sodaen orden vnnd wege vorgenamen werdenn yn ertelleden hendelen dath Juwe vorgedachtenn armen vnderszatenn mogen hebben geboerlike beterynge vnnd restitution der ertelleden nachdeyle vnnd schaden vnnd dath ock ethlike middele mogen gefunden werdenn dath werdige straffe moge gesatt werdenn vor de gedachte clegelike vnnd Jammerlike morderye szo gedhaenn, to Juwen vorgedachten vnderszatenn wo bawen vortaleth vnnd Juwe vorgedachten bidders schollen alle tydt bidden den almechtigen goth vor Juwen meistkonichlikenn staet lange vnd luckzeligen to duren vnnd towarende.