Item so bekenne wy alse vnsze nahmen volgen In dusse breue dat vnsze handell so gescheen vnnd gepflogen is twisken Ludtken Schmidt vnd alle sinem volcke vnd vns alse wy Ruberth Legghe vnd Willem hoppe vnd Tomas hirlack vnd harije fijtzerth vnnd bartram faror dath wy sinth Jnth Jar vnses heren dussenth wiffhundert darna Jn dem tweund dortigesten Jare Jm dage paskenn,1 hebben geschigket to dem vorgenomptden Ludtken Schmidt Jn bussande dar he lach vertogeth vnd En fragen laten, Effte he des to fredenn were so wolde wy to Em Jn de haue leggen darup he antwort gaff den Jennen de wy to Em schigkeden he wolde vns dar nicht Jn hebben Orsake he hadde eynen tosaghe gedan de hete hinrick berndes de sulfftige scholde to em Jn leggen, denn wolde he de haue to gude holdenn so touede wy szo lange dat ick noch eynen to my krech de hette Jon willers do beschlote wy vnder malckander dat wy prouos Jn de haue wolden wesen vnd lopen alsze des dinxtedages morgens vorgenompt in denn paskenn to Ludtke smyth Jn de haue, vnnd lopen Em dwers stuerbort vppet schip vnd schotenn vnd schlogen to Em Jn na vnse besten vermogen vnd de andernalso ock vorgenompte Jon willers lep em vor vppet schip vnd lep Em dat borchspreth aff wnd lach em so dwers vor steue vnd scot vnd sloch to Em Jn gelick wy, so schelde he vns aff dat wy beid quemen Jn den stranth vnd helth vns dar liggen den dach Wente des anderen morgens, do geue wy em vp schip vnd gudt, dat wy vnse halsse mochten beholden vnd das hebbe wy geschreuen an de Ersamen schippers vnd koplude Jn de hauesforde also to tönyes jenixten vnd hinrick martens schippers dat se wolden so wol don vnd wolden doch kamenn in bussande vnd wolden handeln twisken Ludtken smydt vnd synen folcke vnd vns, dath wy muchte vnse schip doch wedder krigen, wy wolden sus myth gude in Eynen fruntliken handell van Em scheden so hebben se twisken vns vnd Ludtken Schmidt mith alle synen folcke de he by sick hadde vppet schip vnd ock de lantliggers de den wynter ouer dar gelegen hadden So hebben se twiscken vns vnd Em so gehandelt, dat wy Em vnd synen volcke scholden geuen Jn ware gelick se in Islandt gangkbar is vppe twe hundert nabell so to rekende In Islanth uppe fervich last fiskes des wart ock gehandelt twiskenn vns vnd Ludtken smidt dat wy em ock scholden vnse bussen ouer leueren vnd de scholde he vnd syne frunde hebben vor synen schadenn, den wy em deden Jn synen schepe, des haue wy alle semptliken alse vnse nhamen bauen geschreuenn stan, dath hir nemant schall vppe orsaken van vns edder den vnsen tor tuchnisse der warheit hebben wy vnse in gesegele hirunder gedrucket mit vnszen guden vnd fryen willen.