Unsze gudtwillige denste mith erbedinge alles guden tovornn Erszamen vorsichtigen Wolwyszen herenn, beszunder gunstigenn guden frundhe. Wy hebbenn Juwer Er. wisz. breff ahn unns sambt der Copien der anthworde unnd deme extracte Ko. W. to Dennemergkenn breve ahn K.mt. tho Engelant de Iszlandescke szake belangende by syner Ko. w. eigenem badenn avergesant enthfangenn unnd alles inholdes vernhamen, daruth wy nicht anders spoerenn unnd vermergken, denne dath Juwe Er. wisz an keynem arbeide edder flyte (des wy densulven ock frunthlich bedangkenn) hebben latenn mangelenn allent wath thor dempynge dusser sulvenn szakenn van noeden geweszenn, darto wy ock na vermoege nicht ane grote bekostunge (dath Juwe Er. wish. unses verhapens to syner tidt wedderumm erkennen werden) gerne gehulpenn unnd hedden ock wol gehapet, dwyle sich K.mt. to Dennemargken, unse gnedigster herre, der szakenn annympt, dath men uns henfurder derwegen unbemoyet, scholde hebben latenn. Szo hefft eth sich dennoch togedragenn, dath wy dersulven szake halvenn vor Ko.mt. to Engelant hogen Raedt den IIII. Dach decembris latest verschenenn syn wordenn verbodeschoppet. Dar unns van syner mt. reden vorgeholdenn, dath unns ane twyffell gedengkede, dath men uns vor ethlikenn wekenn darsulvest vorgestelledt hadde, wo K.mt., ohres gnedigsten herren, underszatenn inn Iszlandt durch dhe Hamborgere unnd Bremere in verledenem sommer nicht alleyne miszhandelt unnd beroveth, dan ock jammerlikenn unnd erbarmlikenn dhoetgeslagenn unnd inn oren bedden ermordeth werenn etc, mith bovele dath wy darvor werenn unnd de szake szo verschrevenn unnd ock muntlich wervenn leten, dath syner Ko. w. underszatenn des yonnen, des sze dergestalt enthsettet unnd beroveth, geburlike restitutie bekamenn muchten und de morderie inn Iszlandt geoveth unnd begannen richtlick gestraffet wurde. Welkent ock syne Ko.mt. ahn Juwe Er. wisz, unnd dhe van Bremen alszo to gescheende schrifftlick gesunen; darupp nu anthworde van Ko. mt, to Dennemergkenn Juwen Er. wisz unnd den van Bremen gekhamen weren; unnd dath ohre gnedigster herre in keynen wegen mith Juwer Er. wisz. und dher Ers. van Bremen anthwordesschrifften geszediget edder tofreden syn konde unnd sich hochlich vemunderde, dath men ohme sulck eyn slycht antwordt geschreven, dar inne Juwe Er. wisz., ock de van Bremen de dhaet bokendenn, alleyne dath men vermeynde mith deme vagede van Iszlandt de missedaeth to bekledende, dergestalt alsze heddenn dhe Juwen deme vagede uth gebade unnd furderunge in synes gnedigsten herren, des koninges van Dennemergken, nhamen alsze underszatenn unnd de van bremen alsze frunde edder bundesvorwanten in sullichen gechefften bygeplichtedt unnd gehulpenn. Nu beframbde syner Ko. mt. unnd ohren herlicheiden nicht weynich, wath underdanicheit unnd verbunthnisse dath syn muchte; tor eynen tidt werenn dhe Stede fryg unnd keynen forstenn underdhaen; eyn andermhall, wen men miszdaen und ohres gnedigstenn herren underszatenn berovedt, szo were de Eyne under deme Ko. Van Dennemergkenn (wo Juwe Er. wisz. nu syn woldenn), eyn ander under deme konnge van Palen, dhe Stadt under dussem forsten, de under deme, upp dath dhe sze in oren miszhandelungen unnd roverien hanthevedenn unnd uthboerdenn. Wanner de Juwen S. Ko. mt. underszatenn dergestalt under deme schyne, dath sze under deme koninge van Dennemergken werenn, averfallen unnd verweldigenn muchtenn, worumm dath syne mt. denne mith Juwen Er, wiszheidenn in verbunde staen scholde? Wehn men ock syner Ko.mt underszatenn, wo dith jar gescheen, beroveth unnd doeth geslagen, szo triumpherde men daraver, alsze Lutke Smith, dhe beide der Ersten unnd latestenn miszhandlunge schuldig, dith jar gedhaen hadde mith upsteking der Engelsckenn venlyn, pypen unnd trummen slaende unnd dergelikenn frowde, alsze hedde he eyne felthslachtinge gewunnen hatt etc. Dath Juwe Er, wisz. antægen in ohrenn schrifftenn, dath de Juwen darto vam vagede in des koninges van Dennemergke nhamen gefurdert werenn, deme sze keyne hulpe weygerenn kunden noch dorftenn, neme ohre gnedigster herre vor keyne enthschuldigung ahn, sundernn alsze verechtlick, likerwysze ifft men eth darvor achtede dath sich syne Ko. mt. unnd ohre rede sullicher anthworde nicht vernhemen etc. Hadden sze deme vagede keynen bystant gedhaenn (alsze sze sich des woll muchtenn enthschuldiget hebben, angesehen dath Juwe Er. wisz. unnd de gemeynenn anzestede mith orem gnedigstenn herren in verbunde unnd ewygem frede stunde, unnd dhe ohrenn hir imm ryke nicht alleyne ryckliker alse alle andere frombde nation, dan ock alse Ko. mt. eigen underszatenn geprivilegierth unnd begifftedt werenn), szo were dusse unfall nicht geboereth, edder dar de vaget denne jo mith den inwanerenn des landes edder anderen mith ohrem gnedigstenn herren in sullicher verwanthnisse nicht synde, dhe Engelsken verweldigeth unnd doethgeslagenn hedde, wurde men unns des nicht hebbenn to wyten. Aver de Inwanere des landes heddenn de Engelscken leff unnd verkerdenn lever mith ohnen, denn mith den unszenn unnd weren keyne dersulvigen darmede in dher daeth geweszenn, svndernn de Hamborgere unnd Bremere, de men szo frunthlick unnd lefflick hir im ryke tracterede unnd handeldhe, hedden sick jegenn ohre bundesgenotenn, syner mt. underszaten, desulvenn to berovende unnd inn oren beddenn to vermordende szo lichtlick bowegen unnd boredenn latenn, unnd woldenn eth nu mith Ko. mt. to Dennemergken affwiskenn unnd enthschuldigenn; welkere wowoll he alsze eyn beroemder koeningk unnd eddel fuerst geschrevenn, szo kunde men doch woll uth syner mt. breven unnd aller ummestendicheit erkunden unnd vernhemenn, dath desulve nicht anders geschrevenn, alsze syne Ko. mt. van deme vagede unnd Hamborgerenn unnd Bremeren, dhe dher szakenn schuldich unnd de rechtenn hanthdadigenn geweszenn, berichtedt unnd informert were. Ock specificerde Ko. w. to Dennemergken nemant, de dyth edder dat verboereth edder vordenet hedde, dan screve int gemeyne, de Engelscken nemen sick der viskerie ahn, sze beroveden dath landt, sze værdenn dath arme volck mith sick weck unnd brochtenn dath inn eigendom etc. Syne mt. meldede ock nicht, wor Jon Breyen schip unnd gudt hengekamen were, szo men doch woll wuste, dath schip upp der Stur(?) lege unnd dath gudt to Hamborg gekamenn were, daraff dath geschutte unnd ethlike andere ware inn Luthken Smedes husze geseen, alsze eyn Engelscke, de mith ome geherberget, na gesecht hefft. Dewyle nu dath gudt dan bynnen Juwer Er. Wisz. Stadt unnd de daeth in dem breven bokant were, wolde sich geboeren unnd were billich, dath men den Engelscken oren geledenen schadenn uprichtede unnd dath ohnen affgenamenn weddergeve; unnd dar deme szo nicht geschege unnd hir namals dhe frunthschop, frede unnd verbunthnisse vele jar her twiscken deme ryke van Engelant und unszer nation van den unszenn allenthalven mith syner Ko, mt. underszatenn nicht beter unnd vaster geholdenn wurde, szo wurde syne Ko. mt. durch orer underszatenn mennichfoldige unnd boswerlike clagent verorszaketh werdenn syner mt. rykes recht jegenn unns to gebrukende unnd by acte vam perliamente de privilegia und frygheide, de wy hir hebbenn, van unns nemen etc. Ore herlicheide hedden ock erfahrenn, dath men to Hamburch unnd Bremen dith tokamende jar ethlike schepe unnd mheer alsze gewantlick uthrusten wolde unnd desulven dubbelt bemannenn, der meynunge, de Engelscken gars unnd alle uth Iszlandt to verdrivende etc. Vull node wolde Ko. mt. to Engelant, dath de olde verwanthnisse unnd verbundt scolde gebraken werdenn unnd van ander gaen; aver wen men den wech uth wolde, scholde men Hamborch unnd Bremen uth der anze settenn; darnha scholdenn sze dennoch ohrenn muthwillenn upp syne underszatenn inn Iszlandt nicht gebrukenn. Wente ehr de synen sulke hanterung, gebrugk unnd copenschupp, alsze de van oldinges inn Iszlande gehatt unnd geæveth, vergaen unnd enthberenn scholdenn, szo wolde syne Ko. mt. lever ohren harnesck anleggenn, dath swerth inn de hant nhemen und dath sulve verfechtenn unnd verbidden. Dar wy frunthschopp unnd frede mith syner Ko. mt. hebbenn woldenn dath sick denne ock de unsen fredelick und frunthlick iegen ohre underszatenn steldenn unnd holdenn, even alsze men hir jegen unns dede. Ore gnedigster wolde nicht, dath unns edder de unsen jemant dhe synenn verweldigedenn unnd verunrechteden; unnd dhe sich des undernhemen, jegen denn wolde menn na aller billicheitrechts plegenn. Dath men ock den synen dergelikenn dede by unns dar eth in unszer macht were, unnd besluthlich dath wy darto verdacht werenn, dath ohrem gnedigstenn herrenn eyn better anthwordt van Juwen Er. wisz, unnd dem Er. raede van Bremen queme, unnd de Klegers wedderstadinge geledenen schadens unnd nachdeyls bekemen unnd dat de unszenn und de Engelsckenn henfurder sich in Iszlandt frunthlich unnd lefflick verdrogenn unnd vorenigeden, ferner clage unnd ungefugk, szo dar sudts uth erwassenn kunde, bytoleggenn unnd to vermidende etc. Darupp Wy na notturfft unsze unschult nha unszem verstande unnd wath susts tor enthschuldigung der szaken denstlich unnd furderlich vorgedragenn unnd geanthwordeth; unnd enthlich hebben uns de heren Juwer Er. wisz. unnd des Erb. rades to Bremen breve gelevert, desulvenn to aversehende unnd unns wath Wy darto kundenn seggenn unnd darbeneven, wo sich de Engelsckenn hir namals mith den unszenn frunthlich muchten verendigen unnd verdregenn, to beradende unnd des ohren herlicheidenn den VI dach decembris unsze myenunge unnd bodengkent inbringenn. Deme nha liebben wy na besprake den heren amm dage itzgenoemeth inn anthwordenn ingebrocht: Int erste dath wy tor szake nichts anders alsze Juwe Er. wisz. unnd Eyn Er. radt to Bremen darto geanthwordeth wusten to seggenn. Tom anderen dath wy gerne woldenn Juwen Er. wisz., und dem Erb. rade to Bremen schriven, dath dhe denn ohrenn, dhe inn Iszlandt szegelen werdenn, bovelenn unnd gebeden wolden, dath sze sich jegenn de Engelsckenn upt tokamende jar unnd vordhaen fredelick heldenn, unnd twilden nicht, ifft Ko. mt. to Engelant den ohrenn ock sullich bofhell geve unnd de unszenn thor jegenwere nicht genoedigeth wurdenn, dath de unszenn sullichem bofhele nhakamenn unnd volge dhoen wurdenn; unnd beden derwegenn gans denstlich unnd uppt flytigste, dath ohre gnedigster herre sodæn gebott unnd bovell synen underszatenn upp Iszlandt ohre szegelation hebbende ock medegeven wolde: welckenth de heren rede Ko. mt. to gescheen gelaveth, szo drade alsze ohre gnedigster herre van Juwen Er. wisz. unnd deme Er. rade van Bremen verstendiget unnd vemisset were, dath dathsulve szo by Juwen Er. wisz. unnd to Bremen gescheen is, unnd hebbenn unns dathsulve upp ohre wort ahn Juwe Er. wisz. vnd den Raedt to Bremen to verschrivende befhalen et. Hiruth mogenn nu Juwe Er. wisz. to betrachtende hebben, wo dersulvigenn breve upgenamen, woher de sich Ko. mt. to Engelant der szake annympt unnd wath unns derwegenn hir boiegent unnd wedderfharenn szy, dath wy Juwen Er. wis., upp dath de sehenn mogenn, in wath bedrugke wy syn, guder wolmeynunge nicht hebbenn willen bergenn, unnd biddenn desulvenn upt aller flitigste unnd frunthlikeste, de willenn sich doch dathsulve latenn to hertenn gaen unnd tho sullichenn anthwordenn unnd wegenn trachtenn, dath Ko. mt. to Engelant, unsze gnedigster herre, unnd ohre und erszatenn tofredenn gestelledt werdenn, unnd denn Juwen ohre szegelation upp Iszlandt nemende gebedenn unnd bovelenn, dath sze sich fredeszam iegen de Engelscken holdenn unnd dathsulve, wen eth gescheen, Ko. mt. to Engelant schrifftlick vermeldenn, upp dath Juwe Er. wisz. unnd wy dusser moye eyn mhaell avich werdenn unnd dergeliken unluste henfurder nicht dorffenn gewartenn. Szo awer Ko. mt. tho Engelant nicht better dusser szakenn berichtedt unnd beanthwordeth werdt unnd de klegers nicht tofredenn gestelledt werdenn unnd sich eyn ander mhaell sulliche unnd dergeliken unluste in Iszlande geboerdenn, will eth unszes bedungken nicht alleyne darhenne sehenn unnd khamenn, dath sich Juwer Er, wisz. burgerkyndere unnd Copgesellenn dusses Cuntors entholden musten, dann ock dath villichte uterliche verderffynge unnd destruction dusser offlikenn residentie daruth erfolgenn muchte; welkent doch Juwe Er. wisz. den Juwenn unnd gemeynem dudescken copmanne hir verkherende thom bestenn woll willenn behertigenn unnd demsulven helpenn vorkhamenn. Dath synn wy nha unszem vermoge umm Juwe Er. wisz. deme allmechtigen bevalenn to verdenenn in allem flyte gans gewilliget unnd geneigt. Schreven tho Lundenn in Engelant amm XXIII. dage Decembris anno etc. XXXIL

Olderman und gemeyne Copman dudescher Anze to London in Engelant residerende.

Supplement on f. 95:

Dar wurdt ock van denn herenn redenn Ko. Mt. angetagenn, dath eth denn Juwen unschetlick synn scholde, dath de Engelscken by ohnenn inn Iszlandt in denn havenenn legenn, denne dhe Engelsckenn værdhenn nattenn visck, denn sze sulvest visckeden, uth deme lande unnde dhe Juwenn drægenn; welkent ifft eth den Juwen beswerlik, werdenn Juwe Er. wisz. dussulvigen in ohrenn anthwordenn, dar eth denn geradenn duchte, mede gedengken etc. Wy vermergkenn ock dath etlike fulmechtigenn van hir inn der Iszlandescken szaken ahn Juwe Er. wisz khamen und aldaer van Wegenn ohrer principalenn edder constituentenn justitiam et restitutionem damni furderenn werdenn. Imm valle szo eth geschege, stelle wy Juwen. Er. wisz. heym, ifft eth geradenn sy, dath gy dersulven clage des jegendeyls anthwordhe dhe Sententie unnd dher gantzenn szaken richtliken procesz uptekenn letenn unnd ohnen schrifftlick under dher Stadt Szegell mithgevenn, upp dath sze sich inn ohrer wedderkumpst mith erdichtedem, unwarhafftigem berichte der rechtsweygerung edder eyniger anderen ungeschigklicheit alhir nicht to beclagende hedden unnd ethwes beswerlichs alsze reprisalia tho biddenn unnd tho erholdenn unverorszaketh blevenn etc. Willeth ock dhe Juwen, szo sze beclagenn werdenn, vermhanen, dath sze sich frunthlich unnd alszo jegen sze schigken, alsze eth sich iegenn fromde luedhe getemenn unnd ohnen unverwithlick syn will, Ko. Mt. to Engelant hefft ock inn bewustenn szakenn eynen doctorem ahn Ko. mt. to Dennemergken, Juwe Er, Wisz unnd den Er. radt tho Bremen uthgeferdigeth, welkere, er he in den Steden werveth, sick ahn Ko. durchluchtigheit to Dennemergken verfhugenn werdt unnd dar vor erst syne werve unnd befhele affleggen, darup wy Juwe Er. wisz. guder wolmeynunge willen verwarneth hebbenn, upp dath dhe darvor mægen synn, dath den Engelscken van Ko, W. to Dennemergken nichts ingerumeth werde, dath denn Juwen preiuditiall syn muchte etc. Datum ut in litteris.