Eyn korte Summa ghenamenn vth den vornemestenn brreuen des werdyghen legates van Englanth. myth buckstauen ghedeleth.

Dath schyp ghenameth Thomas van Lyn.

A1

In dussem ersten breff, ysz eyn rekenschop des schepes genameth Thomas van Lyn.

Item dath ydt schyp ys van eynem Hunderth vnd xx. t.

Item wo Lutke Smyth nam den suluen schyp, vnd dar na alse he eynen groten stucke vth den syde des schepes gesneden hadde, nam he ock alle syne gheschutte vnd guderen.

Item wo dath sulue hefft inth erst gekosteth tho makende — 2000 m. lub.

Item de gheschutte vnd andere wapen dem suluen Schepe tho behorende ysz gerekenth — 500 m lub.

Item de vracht — 800 m. lub.

Inth kortesth hyr van tho redende szo ysz hyr gerekenth vth dussem breff eyn stucke na dem anderen van allerleye gudt dath In dem suluen scepe gewest ysz so dat de Rekenschop ysz erst — dusanth xxij li. sterlinge ysz — teyndusanth ij c xx marck lub. Hyr bauen ysz ock gherekenth vth dem suluesten breff van ghewynste des grauen soltes dath In dem schepe was wormede de kopluden wolden vordeneth hebben (hadden sze myth leue tho husz gekamen) vele gelde¹ Also dath de gantze Summa des suluesten breues (eyn myth eynander gherekenth ysz — eyn dusanth iij c vnd xxx li. sterlinge; — ysz xiij dusanth vnd 300 m. lub.²

Dat Schyp ghenometh Thomas van Lyn.

A2

De Summa dusses breues ysz, wo Johan Wheler Maister vp dat schyp genometh Thomas van Lyn, vnd Thomas hamonde meyster vp eynen anderen geheten Anna van harwiche quemen beyde tho szamende myt eren schepen tho Boteswane, des dingesdages In dem paschen dar Lutke Smyth leth schaten Jegen en v grote stucken van geschutte ane hackbutten vnd rooren, er se myth eynander gespraken hadden vnd wo Thomas hamonde Meister vth der vorbenometh Anna, was myth eynen hantbussen dothgeslagen Also dath de sturman vth frucht was van dem Rudder gewyketh wor dorch dath Schypp quame vp lutke er se by eynen ancker kamen konde Do leth lutke ere kabel snyden In stucken, szo dreff dath schypp na dem lande vnd alsz de vorgemelde Thomas van Lyn wolde hebben by lutke vtgegan Sze was myth lutkesz kabel beholden Szo quame lutke vp de northen syde vnd leth Thomas ock na dem lanth dryuen so lach he by dath ander schyp genometh Anna van harwich vnd alsz dath volck vth den vorbenomeden Thomas wolden eer boote vthgesetteth hebben dath ancker vmme tho werpende vnd dat schyp wedder van lande tho bringende lutke behelde em dar bynnen myth gheschutte vnd des morgens dar na nam lutke dem meister van thomas vnd den kopluden In synen eghen schyp vnd alsz he en gekrygen hadde In dath schyp tho sick do dwange he en alle ere gheschutte eme bryngende vnd do dath water gefallen was, do leth lutke vthsnyden dath syde des schepes vnd nam dar vth alle ere vytallie vnd guderen do gynghe de engleschen vth dem Thoma sick suluen tho erreddende szo volgede lutke en na doch helde he vp eynen wytte³ nese duke thom schyne des fredes do se ouersth In erem gewalth weren, slogen se twen van en dode vnd ander twen lethen dar lyggende gewundede alsz thom dode Sze nemen en ock ere gelth vnd kleydere.

Dath schyp ghenometh Thomas van Lyn.

A2

Item In dem suluen breff betugeth eyn ander man³ genometh Raffe Downis vnd noch xiij botesluden des suluesten Thomas van Lyn na der wyse vnd ghelyck alsze de meister hyr bauen bekenneth hefft.

Ock bekenneth Wylliam brown des gelyken sunder he kan nicht tugen wo Johan Tomson doth geslaghen was alsz se wolden dath boote vthgenamen hebben wente he was dar by nicht By dussem breff hangeth ock ko. Ma. Mandatum an twen Ryddern vnd an dem borgemeyster van Lyn de szake vmme tho fragende wo ydt darumme ysz.

A2

Hyr hangeth noch by eyn Supplicacyon an ko. Ma. gemaketh van etlyken kopluden van Lyn den dath schyp tho horede welckere Supplication beholth In sick de werdt des schepes vnd van allen guderen de dar In gewesen synth, so wol dem Schyp alsze den kopluden belangende, vnd ysz gherekenth tho eyne dusanth punth sterlinge vnd noch meer dartho.
ys - 10 000 m. lub. vnd dar bauen.

B.

Dath Schyp genometh Thomas van London

Eyn gedechtnissze geuen dem legate van allerleye handelynge desses dondes In Islande van den perszonnen vnd guderen de vth dussem Schepe genometh Thomas van London genamen weren.

In dusser Schryfft ysz gemeldeth wo dath volcke van dussem Schype hebben eren boote vthgesanth tho eynen Schyppere van hamb. genometh hans hughe de sulue lach In eyner hauen de hete Gambylweke dem suluen schipperen hebben se gebeden dath sze mochten Inth hauen kamen he wolde ydt ouerst nicht lyden. Szo gyngen se van dar xij mylen weges In eynen anderen hauen de hete gronderforde, vnd lach dar suluest wol dre weken So lange wente dath dar quame eyn schyp van bremen de bracht myth sick ock den vorberorden³ schyp van hamborch de beyde legen dar dre effte iiij daghen In frede wenth vp de 20 daghe des moentes Maij Do quame de van hamb. vnd Bremen by xl effte l manne vp dath lanth dar de englisch koplude weren myth eren kopmanschop In eren boden vnd nemen en, vnd druwede sere en vmme tho bryngende vnd tho dodende vnd do gyngen de van hamb. vnd van Bremen In der englischen boden vnd breken vp eren kysten vnd nemen en eren guderen. De Summa der suluen guderen ysz Inth sunderheit geschreuen In eyner papyre welckere tho dusser schryfft ys genygeth des de vogeth van Islande de Copie hefft. Dar na gyngen se In dath schyp vnd nemen darvth alle ere gheschutte myth bussenkrute.

In dusser schryfft ys ock geuateth de stucken van den guderen welcker dem volcke tho behorde de In dem suluen Schyp weren.

Hyr In ys ock begrepen de stucke van dath geschudt, vnd anderen guderen dem suluen schep thobelangende De gudere van den kopluden vnd myth allen dingen dem vorbenomeden Schyp belangende thohope gerekenth maken In eyner Summa — ij c xxxv li ij s sterlinge. Ane dath gewynsth der suluen gudere welckere ysz gerekenth tho eyn hunderth punth sterlinge.

De gantze Summa ysz - 3000 300 51 m. lub.²

Dath Schyp genometh Peter Gybson.

Item In der sulue schryfft ysz ock gemeldeth eynem Englischen schyp myth name Peter Gybson welcker quame In eyner hauen de hete grenewick vnd lach dar viij weken vnd meer dede ock nemande schade Thom lesten quemen de van hamb. vnd Breme de sick vorsammelde hadden by ij c vnd lxxx manne de quemen vp den Englischen do sze noch vp dem bedde legen vnd slogen doth xv perszonnen vnd nemen beyde schyp vnd gudt welckere stucke vnd gudere ysz gerekenth tho — lij l. — viij d. sterlinge.

Ane dath vordenst vp den suluen gudere efft dath se hadden myth leue wedder tho huse gekamen, dath suluesth ysz gerekenth tho xl punth sterlinge De gantze Summe ysz — xcij li viij d sterlinge² ys — 900 20 m. v. s. iiij d. lub.

C.

Dat schyp genometh Anna van Harwich

Hyr In ysz de Summa van allen stucken Inth sunderheit der guderen ghenamen dorch Lutke Smyth vth eynen Schyp myth namen Anna van harwiche, welckere Schyp myth guderen vracht des folkes lon vnd gelth den kopluden genamen, ysz gerekenth tho — iiij c lxxix li xvj s. x d. sterlinge Ane dath vordensth vnd profyte vp den suluen guderen effte dath sze hadden myth leue wedder tho husz gekamen. welcker ysz gherekenth tho — iiij c li sterlinge.

Item hyrin ysz ock gerekenth dath geschudt alsze Bussen, bagen, pilen, myth alle anderen krygesche wapen tho eyn hunderth xvij li viij s. viij d. sterlinge.

De gantze Summa ysz ixc xcvij li. v s. x d. sterlinge ysz — 9000 900 72 m. 14 s. 8 d. lub.

Dath schyp genometh Anna van harwiche

An dem suluen breff hangeth dar noch eyn bewysze wo de vorgemeldeth schyp quame In eyner hauen myth name Botsande dar Lutke Smyth lach vnd wath de ortsprunge vnd orszake desses dandes gewest ysz, vnd wo lutke em hefft gedwungen eme eynen quytannce tho makenda na synem wolgefallen vnd wo lutke sede, dath engelschen weren morder vnd szerouer vnd vnder dem schyne nam he alle dat ere was, De sulue(st) lutke hefft dar suluest ock gesecht Wo eyn Erbare Radt van hamb. hadde eme vnd alle den Schipperen van hamb. beualen dat se scholden eynen Ider eyner hauen bewaren vnd dath neen Englischen scholden kamen dar sze Weren. wente wo se dath deden (sede lutke) So hadden sze macht en doth tho slagende vnd ock alle ere guderen tho nemende.

D.

Dath schyp myth namen Peter Gybson.

Hyr In ysz gemeldeth wo vij perszonen weren geforderth by erem eede vnd geswaren vor dem borgeirmeister van london dath sze scholden warafftich tuchnissze geuen van eynen schyp myth namen peter gybson In welckere schepe was eyn kopman myth namen Johan bray De sulue schyp was genamen dorch lutke Smyth hans tymberman vnd ere geselschop. hyr ysz ock geschreuen wo de ortsprunge dusses dondes was vor iiij c stokfysche welckere de vorbenomede Johan bray genamen hadde vnd alsze he sede suluesth, he hadde de fysche gekofft In Islanth In den vorgangen Jaren, ouersth de van hamb. vnd Breme sede dath de fysche horeden en tho

Nomina testium

Robert grymbytt	anner 42
Willm payne	— 21
Thomas godfray	— 35
Jeram a lye	— 26
Rolandus wintmer	— 35
Petrus Sanderszon	— 22
Willm Driuer	— 41

E.

Dat schyp myth namen Peter gybson.

In dussem bokeschen ysz beschreuen de gudere vnd kopmans ware myth allerley laken, kledere, bedde tugh vnd gelth dath dem volcke tho kumpt vnd den kopluden dede weren In dath schyp genameth peter gybson van london vnd vp eynen Iderem syde des registers⁴ steyth eyn sunderlick Summa. hyr ysz ock geschreuen wo vele werdt de schyp ysz gewesth, van ankeren kabille, Szegel boote vnd vn aller ley dath dem schyp tho behorede, De Bussen vnd allerleye krygeszwapen syn dar ock gherekenth

De Summa des schepes allene dem erue(n) tobehorende ane der koplude guderen ysz gerekenth to iij c xxiij li sterlinge Ane dath vordenste vnd profite des schepes vnd der koplude gudere, effte dath sze hadden myth leue wedder tho husz gekamen welckere ysz gerekenth vp iij c li sterlinge

Szo ysz de gantze Summa dusses bokes eyn myth eynander gerekenth — xj c lvj li vj s. ijd. ob. q. sterlinge, ysz — elfen dusanth 500³ 63 m. 22 d. lub.

F.

Dath schyp genomith Maria Jacobi.

In dusser schryfft ysz gherekenth de groth schade vnde nadeel, gedaen tho eynen schepe myth namen Mary Jamys van Lyn dorch lutke Smyth vnd hans kewes van hamb. welcker Schade ysz gerekenth tho — ij c vj li xvij s. viij d. sterlinge. ysz — 2000 68 m. 13 s. + d. lub.

Ane anderen noch groten schaden de de sulue schypp krech van lutke vnd Hans wenth sze wolden nicht lyden dath sze fyschen scholde, szo vakenth alsze Sze gerne wolden alszo dath de sulue schyp hefft nicht meer alsze viij last fysches tho husz gebracht, dor se plegen vormals xl lasth tho bryngende.

Tho dusser schryfft ysz geuyget eyn Supplicaty an ko. Ma. gemaketh dorch Thomas leighton van lyn, dem dath Schyp myth namen Maria Jacobi tho horeth, dar he Jn beclageth dath lutke Smyth hefft syne schyp dor gheschaten In sundergen steden, noch was eme neen orsake dar tho gegeuen van den englysschen de In dem Schyp weren. Wen de engleschen doch begerde frede, eyn van lutkesz volke schate dem meyster des Schepes dor myth eynen hanthbussen dar na quemen sze vp dath Schyp, woundede vnd schamferde vele van dem volcke, nemen ock enwech eren grotesten geschutte myth cameren de den Slangen tho behorden. Sze nemen ock vth dem Schip eynen veerdel bussenkrutes myth xvij wollen laken vnd ander dynge meer alsze dar steyt In dem breue syner rekenschop.