Tonniges pinxtenn vnnde hinrick Martinus beyde Schippernn vnnsze erffszetene horger tugedenn by erenn geswarenn edenn, do sze dyt vorgangenn Jar Jnn Jszlant Jnn de haueuorde myt eren schepen vnnde volcke gelegen, dat dosuluest itlike van eren koepluden van den Iszlanderen sodanen visck wo vp grindewick gestann, gekofft Vnnde do ener van den koepluden Jochun hinrickes genompt, synen knecht. vmme den visck den se geguldenn vnde betalt, Jn de haueuorde to halende, vthgeschicket, Js eme sulkent dorch enen engelschenn mann Joen brey genompt, de ock den visck an genamen, manck synen visck by synen stapell gelecht vnnde myt synem marke gemarkt, ge weigert worden, welker engelsche, ock dem knechte gesecht, se krege nenen visck dar, dat he synem huszbunden alszo scholde anseggen vnde do de knecht sulkent synem werde anshede, hadde Jochun hinrickes de kopman datsulue den vorscreuen schippern vnde kopludenn alle geclaget, de nichteszdeweyniget enen sunderligen baden an Joen breye affgefertuget, vnde eme anseggenn laten, wat orszake he darto hebbenn mochte, dat he ehnn eren visck den sze gegulden vnde betalt, ock darto gemarket, alszo vorenthelde, Dar Joen geantwordet he were ock aldar vmme visck to hebbende gekamen. Wolden sze den visck szo he by sick hadde betalt hebben, wo aldar wontlick, konde woll geschen, wolden sze ock de ware nicht entfangen, den den visck Jn Engelant auerscriuen laten vor dat hundert ene nabell to entfangende, daruor mochten she radenn dar ock nicht, mochten she ere euentur stan, ifft she van dem vyscke wes wedder kregenn edder nicht, he hadde busszen lode vnnde kruth welck he myt ehnn delen wolde, vnde hadde darup schantze vpt lant gemaket dar jnne he dach vnde nacht de wacht leth heldenn etc. Dyt alle, haddenn de schiperen vnde koplude dem vagede geclaget. ock dat ehnn ere visck alszo vorenthelden vnde darup synen rath, dewile sze eren gewontliken thollen betalt, begeret, gedachten eren visck nicht to missende, Worup de vaget geantwordet Jdt were war he hadde eren thollen entfangen, konde auerst nichts darto dhon, denn wolden sze eme alsze ko. w. beuelhebber ere volck vorlenen, he wolde vorschaffen orhe vysck scholde ehnn wedder ton. handen kamen, he wolde ock dat volck bewilligen vnde beszolden vnde alle de guder szo Jeest breyen tokwemen ehnn volgen laten, desuluen vndel[!] sick to delende welck ere besoldunge synn scholde, Auerst dat schip myt der tobehorige vnde wes darjnne synn mochte scholde vor ko. w. synen gunstigsten hernn synn, Ehnn ock wider belanet, myt schrifftenn beuestet vnde sick myt hant tastingen vorstricket, Wes wider daruann entstunde daruor wolde he vann wegen ko: w. gesoldenn synn Worup de vaget myt erem, ock synem egene volcke dar Jn alle nicht mer den jc lxxx man gewest, alszo vorth getagenn vnde myt Joenn breyen, de Jnn der schantze woruth he sze alle erwoegenn wolde, gewest, to wederwere, dewile Joenn vor erst to ehnn Jngeschatenn, gekamenn, dar auer itlike vann leuende gebracht, auerst de Jennen de sick nicht tor were gestellet, synn nicht geszeriget worden denn vnbeschediget gebleuenn.

Tugedenn ock forder dat de anderenn dre engelschenn szo by Joenn breyenn Jnn de grindewick gelegenn, an Lutken Smydt, geschacket, vnnde ehnn gebedenn, dat he an de andernn Schipern Szo Jn de haueuorde legenn schriuen wolde, dat idt ere deuth, dat ehnn ere visck vorentholden, nicht en were, Wente Joenn breye hadde sulkent vorhandenn, dat she der haluenn mochtenn vmbeschediget blyuenn

Martenn russze vnsze erffszetene borger de to der tidt myt Hinrick martinus vor kopman szegelde tugede gelick wo vorscreuenn

Clawes Jermers vnnsze borger de to der tidt myt hinrick martinus ock vor kopman geszegelt tugede gelick wo vorscreuenn

Martenn knoepp, Hans Smyt, peter dreiged, Henning luter vnnde hinrick remensnyder, alle koepgeszellenn, de tho der suluenn tidt vann vnszer borger wegenn mith Hinrick martinus vor kopman szegelde tugeden gelick wo vorscreuen

Peter rike vnnsze borger vnnde Alert heyhuszenn vnsze erffszetene borger, de ock desuluest myt Tonniges pinxtenn vor kopman Jnn Jszlant szegeldenn; tugedenn gelick wo vorscreuenn

Hans rodewolt, Dytmer Wynberg Erick arndes, Hanns kremer, Hans vresze, hans van lubbeke, Jochim ogrundes vnde Dytmer loenn, alle koepgeszellenn de to dersuluen reysze myth Tonniges pinxten vor kopmane geszegelt tugedenn alle gelick wo vorscreuenn.

Jasper klippinck vnnsze borger de ock to der tidt myt Tonniges pinxten vor kopman geszegelt tugede gelick wo vorscreuenn

Schipper Hinrick Berndes vnnsze erffszetene borger tuget by synem gesworenn ede, do he dyt vorgangenn Jar myt Lutkenn smydt Jn Jszlant Jnn Busszande gelegenn, dat dosuluest de vaget szo van ko: W. tho dennemarken dar geschicket, ehnn laten anszeggen, ock gescreuen, Jfft sze gelick andern schippern vnde kopluden szo Jn der haueuorde gelegen ock dem bremeren vnde vth dem. holme Wolden bystant dhon, dem mothwilligen engelschen, de wedder ko. w. gehandelt to straffende, Worup sze sick besprakenn vnde Lutke smyt gesecht, dewile twe engelsche by ehnn legen, dar eze van ere schepen dem vaghede volghedenn, mochten de engelschen ere schepe anuallen, dat ehnn derhaluenn nicht to radende, alle van dar tho ghande, Jedoch vnder sick alszo geslatenn, dat Lutke myt itlikem volcke to schepe bliuenn scholde, vnnde hinrick berndes scholde myt dren kopluden van beidenn schepen na dem vagede reyszenn, Do nu Hinrick berndes myt dem volcke tho xxxiiij mannen to, vth eren schepenn tho dem vagede, Jedoch vp overige bodescup gekamenn, hadde ehnn de vaget enen breff vorgeholdenn vnnde geleszenn, darjnne allenthaluen vp gedecket, watt schadenn vnde nadell de engelschenn, ko. w. togeseggett Darumme wolde nodich synn, de mothwilligenn to straffende, de vaget wolde ock dat vollck darto vorwilligen scholde he ehnn och van ko. w. wegenn geldt vnde besoldinge vth synem egene budell geuenn, Vnnde Wes wider daruth entstann mochte daruor wolde he vann ko. w. wegenn geholdenn synn Worup de vaget dat volck alszo vowilliget vnnde darmyt na dem Engelschenn, de ene schantze, worjnne he myt enem vpgerichtedenn venlyn gelegenn, vnde de dudeschen alle daruth erwoegen wolde, gemaket, getogenn vnnde sick iegenn densuluen, dewile he vorerst tho ehnn Jngeschatenn, erweret, darauer itlike vann leuende gekamenn, vnnde de sick nicht erweret, synn nicht geszeriget edder beschediget wordenn, Ock dat des volckes jnn alle nicht mher denn j c Ixxx man, dewile she alle getellet vnde gescreuenn gewest, Welkent alszo geschenn vnde vorhandelt

Actum Mandages na Appolonie vrginis Anno etc. xxxiij presentibus dominis Hinrico Hesterberg et Dytmaro Khoell,

Ex commissione totius Senatus hamburgensis