Cristian von gotz genade Erbe zu Norwegen, herzock zu Sleswig Holstein, Stormarn vnnd der Ditmerschen, graue zu oldenborch vnnd delmenhorst.

Vnnsern gunstigen gruz zuuorn, Hochgelerten, Ersamen, vnnd wolweysen lieben getrewen, Ewer widervmb anthwort, auf vnser Jungest an euch getanes schreiben¹ das wir euch mit sampt dem Engellischen orator auff negest kunfftigen Sontack einen tagk ernennen mochten, haben wir entpfangen, vnnd allen Inhalt lesende ermergkt, Darauff geben wir euch genediglich widervmb zuerkennen, das wir euch, dem Engellischen orator vnnd dem vaget zu Bramstede einen tack als auff negest kunfftigen freytack zu Segeberge auff den abent Ein zukamen vnnd volgendes tages Handelung zugewarten zugeschryben haben vnnd vnns als hewt[!] dato von hirab zuerhebende willens gewest Szo mussen wir disen tack auch vnser handelung halben daran vnns nicht weynigk, Sunder vil vnnd gros angel is vnnd dardorch vorhindert worden das wir euch nicht ehr, alze wir gern wolten getan haben Einen tack haben konnen ernennen derhalben gelanget an euch vnnser guethlich ansinnet Ir Wellet auff disen negest kunfftigen sonnabent zu Segeberge In komen vnnd volgendes tages handelung gewarten, vnnd dem orator vnnd dyderich Bramstede anzeygen lassen, das sie sich auff denselbigen Sonnabent auch dahin vorfugen Solichs haben wir euch genediglich nicht Bergen wellen dan wir euch mit gunstigen gnaden gewogen Datum Ratzeborch Mithwoch nach Doratee anno etc. ihm xxxiijen.

Manu propria scriptum.