Artyckel gehandelt up der reysse in Engellandt anno etc. xxxiiij, Mr. Cromwel avergegeven int lattin.

Artikel szo de heren Sendebaden der Stadt Hamborgh in szunderheit myt kö. Maiestet tho Engelandt gehandelt.

Erstlyck erbede wy vns, kö. Maistet, in allen byllyken, erlyken, vnnd Christliken dingen anhangen vnnd bystandt tho don, sziner Mayestät, na vnszem hogesten vormogen alle tidt gerne denen.

Bydden derhalue thom ersten, szyn kö. Mayestät, wylle sick, vnsse Stadt Hamborch vnnd vns, alsze siner Mayestät willige dener, alle tidt laten besalen szin, vnnde der alletidt mit dem besten gedencken.

Thom anderen, bydden wy szin kön. Mayt. wyl den Dudeschen kopman, szo hir tho Lunden, ock szus siner Mayt. ryke szyn, in sziner Mayt. gnedige beschuttinge an nemen, densuluigen gnedichliken vordegedingen, vnnd nicht to laten, dat de priuilegien, welker de gedachte kopman der deudeschen Hansse, van sziner Mayt. hochgelaueden vorelderen entfangen, jenigerleie wisze (wo wol vor gesehen is) geseriget edder vorringert mochten werden.

Szin och geneget szampt den heren sendebaden der stadt Lübeck, kön. Myt. etlyke artikel, darmyt de kopman wedder den rechten inholt der priuilegien besweret wert, auer to geuen szo doch dat szuluige myt kön. Maiistät guden wyllen, vnnd am schaden der priuilegien, geschen mochte, vnnd dat wy nicht geschen werden, schaden edder nadel den gedachten priuilegien, inbringen, bidden wy kon. Mayt. schrifftlike tuchnisse, dat wy vp kön. Mayt. forderent, vnnd nicht van wegen des kopmans in Engellandt gekamen szint.

Thom drudden geuen Wy Kon. Mayt. denstlich tho erkennen, dat ein erbar radt szampt den borgeren vnszer Stadt Hamborch, na der tidt, alsze by vns gades wort geprediget is worden, hefft ethlike myszbruke vnnd vnchristliche sermonien in der kerken affgedan, derhaluen wy van vnszem wedderpartie de van den papisten vor kaiserlik Mayt. angechiget sin, Were idt nu szake, dat kaiserlyke Myt. de gedachte papisten wedder vmme in eren vnchristlyken vnnd godtlosen leuende restitueren wolde, vnnd vns, de wy szolkes nicht to laten worden, wedder alle byllicheit (dat Godt vorbede) condemneren vnnd in de acht don wolde, Szo bidde wy sin Kon. Mayt. wyll vns vnnd vnszen borgern, ein frige vnnd seker thoflucht tho sziner Kon. Mayt. vorgunnen, alszo dat wy by sziner Mayt. hulpe vnnd ratszoken vnnd finden mogen, ock dem dudeschen kopman vorgunnen, dat sze dit, siner Mayt. konickryk, na olde gewonheit beszoken mogen.

Thom latesten sint wy ock geneiget sziner Mayt. etlyke artykel van sziner Mayt. legaten hern Doctore Legio, den Iszlendischen farern thom besten gemaket, auer tho geuen,¹ dorch welkere szo se gepubliceret vnnd den Islendischen farern in Engellandt vorgestellet werden, vorhapen wy einen bestendigen freden tho maken, twischen sziner Mayt. vnderszeten vnnd vnszen borgeren de in Islant segelen. Bidden der haluen szin Kon. Mayt. wylle dessze artykel edder ander dem gemenen frede muthszam, ordineren, vnnd Wat szin Kon. Mayt. myt vnszer bewyllinge hirinne decerneret, dat schal vnnd wyl vnsze Stadt Hamborch alle tidt stede vnnd fest holden.

Bidden ock, szin Kon. Mayt. wyl vnszer Stadt gnedige konige vnde here szin vnd stede blyuen etc.