Unsern frunthliken gruth mit erbiedung alles guden tovorn, erwerdiger beßunder gunstiger her und frundt, unser borger ersame Heyne Sander hefft uns klegende berichtet, wo dath he ungeferlich vor seß jaren bischoppe Oggemunder juwer w. vorfaren, alhir ethlich gelt, alßo XV daler, to siner notturfft vorgestrecket und gelent hebbe, darvor he ohme druttich wete visckes in Ißlandt thobetalen gelavet hedde, darup ane de abbet tho Hilgefelde twintich wete visckes betalet hedde alßo dath ome noch teyn wete visckes unbetalet resteden und nastendich weren und wowoll he darumme jerlikes sunt her velfeldige und instendige pedinghe gedan hedde he doch sine betalinge der teyn wete visckes nicht erlangen konnen, unnd were doch van juwen w., alhir vertrostet worden, wanner juwe w. int landt queme, dath desulve ane so siner betalinge verhelpen wolde, derhalven he uns bidtlich angesocht ome unsere vorschriffte ahn juwer w. midthodeylen, de wy ome in anschungen der saken billicheit nicht gewust tho weygeren, dewyle wy, dene gedachten unseren burgeren tho deme dato he foge und recht hefft gerne verhulpen seghenn ock billich und recht is dath gemakede schulde gebortig betalet werden. Szo begeren und gesynnen wy gudtlich und frunthlich juwe w. wille van wegen des stoltes edler domkercken tho Schalholt verschaffen und gunstige versoginge don, dath Heyne Sander unserm borgere, de X wete visckes ahne langere vertogeringe upholdent und besweringe by jegenwerdige Peter Betken moegen enthrichtet und betalet werden, darnach wy van deßwegen unsers burgers halven nicht verorsaketh werden by ku. mtt. to Denemarke und Norwegen unsere gnedigsten landesfurst und herren wyder to klagende den syn wy umme juwe w. frunthlich tover geliken gudtwillich. Schreven sub signet donnerdages na judica¹ anno XLI.

B. und r. der stadt Hamborch.