Vor juw erbarn wisen unsen gunstigen unde gebedenden hern und geborender overicheit borgermestern und rathmannen der stath Bremen, bringen wy Johan Knippe, Cordt Hegewisch, Gerdt Westerwold, Frantz Steffens, Johan Lanthrede und Lambert tor Widen, mit unsen tostendern, clagende upt entfoldigeste vor, jegen und wedder Harmen Oldenße, Wolder Graschern, Bartold Moige, Bernt Boleman, Johan Eddelman, Boske Bosken, Johan van Reden, Ropke Repsleger und Johan Slochtern, na folgende articulerde clage, biddende, ße sampt edder dejenen so jegenwardig sin, tho rechte antoholdende darnup by orer warheit wes ße des gestendych sin, edder nicht antwordt tho geven, wat dan des van onen nicht bekent, erbeden wy uns de daet, idoch ane aversloth, darvan wy protestern, tho bewisen wo men sollicke felle to bewisen schuldich.

Erstlich seggen wy dat wy etlicke jar her ene haven im Holme genant in Ißlande besegelt und gebrucket, dar wy unse kopenschop gedreven.

Item seggen dat de upgemelte beclagten vorschener jare etlick mal mit uns dare gesegelt umb hure und anders, dat se de kuntschop in der havenn gekregen.

Item seggen dat sick de beclagten dussen vorgangen sommer to enen Lubschen man (de went her des ordes nicht to segelen plegen) geslagen mit dem in Ißlande gelopen und de upgemelte unse haven, dar wy unse schulde uthtestande hebben angenomen.

Item dat wy darna, na unsem olden gebrucke ock myt unsem schepe dar sulvest angekamen in meninge uns an unße gewanlicke stede to leggen, unse schulde to manen und hanteringe wo van olders tho driven.

Item dat de beclagten sampt den dar se mede im schepe weren, und de ße ane twivel darhen geforet uns in de have nicht staden wyllen, sund(er) na uns mit graven geschutte geschaten und so to rugge gedreven.

Item dat wy darumme wycken unde vor der have setten moste, dar wy an ße geschicket, mit beger dat wy by onen liggen mochten, dan wy unße schulde dar utestendich de wy gerne inmanen wolden.

Item dat se uns entlich to entbaden, se konden und wolden uns dar nicht lidenn.

Item dat wy daruth und uth weders noch unße liff, schip und gudt tho bergen, gedrungen, ene ander have tho keßen.

Item dat de beclagten und or ander schepes volck darna ohr both mit geschutte barßen und ander wer, ock mit folcke, tho gerust, uns umb ein eylandt under ogen geroiget, und alße wy van nenen lede geweten tho uns ingeschaten und na live und levende gestellet, aver do ße an unse schip nicht kamen konden wedder affgeweken, und wedder na orem schepe geroiget.

Dewyle se nu alße mede borgern tho Bremen uns mit den fremmeden unbyllig an unser neringe gehindert, und de fremmeden dar ingeforet dar wy unße neringe to soken plegen, dat ße billicker to erholdinge dusser guden stath wolfarth und segelation affgewendet scholden hebben gehulpen, und ße darenbaven uns na live und levende gestellet und gerne schip und gudt umme den halß gebracht, vorsehn wy uns dat ße sollichs mit nenen beschede gedan und darvor der overicheit alße i. er. w. in straff und brocke vorfallen und uns vor de overfaringe und to gefogeden vorhinderinge unde schaden, den wy up de acht hundert gulden ane de iniurien achten, affdracht tho macken und allen schaden tho wedderkeren schuldig und plichtig sin, bidden dat sulve ock to erkennen edder wat desfals recht sin wert.

In gelicker mate clagen wy Bert Schulte, Hinrick Trupe, Brun Reimerß, sampt den andern schepes redern aver den avermoth, dat de upgemelten beclagten uns unße schip, dat wy den upben(ante) clegern vorfrachtet, umbringen wyllen und idt an oren wyllen nicht gemangelt, wen onen ohr vorhebben nicht were mit der jegenwer gebracken, denenth ße ock unßes vorhapens, in billicke straffe vorfallen, ock uns affdrafft to donde schuldig und stellen dat tho i. er. w. rechtlicken erkentniße mit anropinge ores richterlicken ampts und aller hulplicken middelen des rechtes.