Ithem de wynter laege ys vor dem aff gestelt de synne guedt dis somerß ann sick holt unnd nycht verkoepe wyll ock heefft de ffagett koi. matt. bevelhebber versecht unnd versegheltt datt he wolde geyne gueder verkoepenn edder synn volck unnd wolde ock nycht mer in dem lande hebbenn als he mytt synenn volcke konde denn wynter aver ettenn unnd drinckenn.

Ithem als uns de fagett beklagett datt wy in koi. matt. lande schollenn mordtwyllich ghehandelt hebbenn wylle wy stellenn in datt gerichte dar de mordtwylle gescheynn is unnde dar unss rechts gewardenn sampt denn drenn gesellenn de de ffagett utt dem lande hefft gefordtt.

Ithem als he wydder klagett datt wy dem lande unnd unnderdanenn tho schadenn unnd tho nae dele syndtt datt solve synn wy nycht sunder de fagett myt synenn anfanghe ereghenn mitt tho soeckenn als he unnde de synenn gedann hebben anno 47 do wy erst in datt landtt quemenn op Petri unnd Pauuels dach unnd he vor uns indt landtt waß 6 weckenn doe gevenn se eyne smale tunne bottern vor 500 vyscke 1 tunne mels vor 90 vyscke eynen ganck hoeffyserenn vor 10 vysck unnd so fordt ann.

Ithem daer nae als wy thor have kemenn heefftt uns de fagett denn koep gesettet nae aldem gebrucke des wy gerne ann genamenn hebben de tunne botternn tho gevenn vor 100 vysck eynn tunne mels vor 30 vysck eynenn ganck hoeffyserenn vor 4 vysck unnd so fordt alle waer daer nae etc.