Wy Hinrick Steecke, Cordes Wachman, und Dethmer Bredelo, radtmanne tho Bremen, weren der jegenwardich an und over, datt Berndtt Losekanne, Reinek Swachman, Reineke Winters, Luder Wedeman, Volckertt Frese, Gerdtt Tilebare, Johan Reineken, Christoffer Meiger, und Hans van Osßenbrugge, samptt und sonderlick apenbar vor uns tho stunden seden und bekenden, wowoll se mitt schipper Harmen Wedeman parde und deell an sinem schepe hedden, und mede redere weren, szo hedden se doch nicht anderst, dan alße andere schlichtte boselude, de noch pardtt edder deel an den schepen plegen tho hebbenn, umme eine benomede hure, sick tho dem schippere, mitt ohme tho segelen vorplichtett, vorplichten sick hiemede in macht desses brevess, ßo lange tho duren, alse ße ohre masschop mitt ein ander holden, und willen demna nicht anders ohre schepes werck doen, watt ohne geborde tho doinde, dan alße andere boßlude van rechtte tho donde schuldig sin, sick vor frame schepeskindere halden, dem schipper gehorsam und willich sin, sin bevell truwelick utrichtten, nicht dar jegen seggen, ock nichtt antehen, dat se mede redere fur sick darup tho dregen, sunder idt schole Harmen Wedeman de schipper allene und ane se, in dem gantzen schepe vullenkomen regiment unnd bevell hebben, wo ein schipper over sine schepes kinder billick hebbenn schall und tho hebbenn placht, und wor einen oder mher under ohnen weren, de desfals muterie anrichten, dem schipper nenen gehorsam leisten, edder nicht doen wolden, watt einem kopmanne (einem ideren nha siner gebore) tho stunde unnd egede, alße se dath nicht hapen datt einer under enen sick des understan scholde, szo schole de schipper vullenkomenne machtt hebben ungeachtt siner rederschup, den edder de sulven, alße einen anderen schlechttenn bossman, entlich thovorloven, afftho setten, andere anthonhemen, wo ohme datt bohage, unnd gesellig sy, darinne de anderen ahme nichts inreden edder verhinderen, sunder byplichten und thofallwillenn und scholen, unnd offt sick einige twiste manck ohnen erheve, umme watterlei sacke idt were, schall by dem schipper stan, szo darover thoverdragen, und se scholen ohme darinne gehen geven, und allentt watt se in Ißlandtt kopen, fangen, edder verdeell don werden, datt schall all in gemeine bute ghan, und nemandes wes sundeiges darvon upstecken, szo willen ock alle sempttlick tho profite ehrer maschup, ein ider nha sinem vermugen, na vordele, gan stan, unnd trachten, nicht anders dan off ein ider den vordeel vor sick allene hebben scholde. Ihmfall aver kunftiglich dem gedachtten schippere Harmen Wedeman, nicht wolde gelegen sin, mith ohrer ethlicken, der sy ein edder mher, dusse maschup langer tho holden, so schole se ider tydt, tho welckem jare ohme datt gelevett, den jennen de ohme nichtt anstan, upthoseggen, ohnen ohr pardt uth den maschup tho geven, unnd andere in ohre stede tho nemen, frige macht und gewaldtt hebbenn, konden se sick aver umme den pardt den se hebben scholen, nicht vorlick, se scholen de schipper twe van sinen frunden, unndde jenne den he verlaten will, ock twe van sinenn frunden koßen, do darup erkennen, watt de schipper ohme vor sinen deell, uth der maschup geven schale. Were idt sacke datt sick de veere darumme nicht verlicken konden, so scholen se machtich wesen, einen unpartiegen overman tho sick tho keßen, und weme de byfeldt, darby schole idt bliven, und beide partte datsulve unweigerlick annhemen, allentt sunder argeliste, by eren guden truwen, und geloven, stede vast, unnd unvorbracken woll tho holdenn. Und dusse tho tuge, szo hebben wy Hinrick Steecke, Cordt Wachman, und Dethmer Bredelo, radthmanne upbenomptt, umme der gemelthen partte orer samptt und frundtelicke bede willenn, unse ingesegele hirunder gedruckett. Nha christi unsere hern gebortt dusendtt viffhundert, darna im negen und vertigesten jare, am mandage na judica.

Dusse jegenwardige copei, deechtt mitt dem rechten versiegelthen originall overein, und ludett van worde tho worden also, datt ick Blasius Muller van bapstlichen, und keysenlicher machtt unnd gewaldtt offenbarer notarius, mitt dießer minen eigen handtt bekenne und betuge offentlich.