Christian der dritt von gots gnaden zu Dennemarcken. Norwegen. der Wendenn unnd Gottenn konig. hertzog zu Schlesewig. Holstein. Stormarn unnd der Ditmarschen. grave zu Oldenburg unnd Delmenhorst.

Unnsern gnedigstenn grus zuvorn. Ersamen lieben besonndern. wir kennen euch gnedigst nicht unangezeigt lassen. das unnser vogtt. so wir uf Islanndt vorordent. unns bericht. wie ewer burger unnd kaufleutt. als gemelt unnser lanndtt ersuchenn. sehr vil falscher unnd untuchtiger wahre dahin verfurenn unnd denn armen leuthenn unnsern underthonen doselbst dieselbe gleichwol inn hohem werdtt. als wann es rechtschaffene gutte wahr were. ufhengenn. zudem auch falsche masse gebrauchenn. unangesehen das sie dargegen gutten fisch unnd anders erlangen. domit den unnser arme underthone doselbst mercklich verforteilt unnd ihne zu schadenn gehanndelt. das dann sich in ufrichtigenn kauffhendelln mit nichte geburtt. Unnd will unns auch unnser underthanen halbenn nicht zu geduldenn sein.

Wiewoll wir nun wustenn. was uf solche handlunge. die mit verfelschter wahr gebraucht. geburtt. hetten auch aller pilligkeit nach wol fuge. die jhenigen als dermassenn befunden inn geburende straff zu nehmen unnd die falschen gutter antzuhaltenn. Wir habenn aber aus der gendigen neigunge. domit wir euch gewogen. solchs nicht fürnehmen lassen wollen. ehe wir euch bevor davon bericht hettenn. unnd begern demnach gnedigst gesynnende. ir willet euern burgern und kauffleuttenn. so unnser lanndt Islandt aus unnser gnedigsten zulassung besigeln. anzeigenn unnd verwahrnen, das sie gutte unnd unverfelschte wahr furen. auch rechtebestendige masse gebrauchenn unnd mit unnsern armen unnderthanen ufrichtig handelln. Wurde solchs annderst befundenn unnd einer mit falscher wahr unnd masse betroffenn. der soll seins guts verlustig sein und wie ein solcher inn geburende straff genohmen werden. Wiewol wir sonnst. so mitt gutter wahr ufrichtig gehandelt. niemandtz zu beschweren gemeint sein. Werdet dem kauffman solchs fürhaltenn. sich darnach zu richtenn unnd vor schadenn zu huttenn. das wir euch der notturfft nach nicht mugenn unangezeigt lassenn. Sinndt euch als unsern lieben besondern mit gnaden unnd allem gutten geneigt. Datum uf unserm schlos Coppenhagen. den X. Februarii anno etc. LVI.

Christian.