Erbare, wolwise unnd vorsichtige herenn, juwen erb. wish. syn unsere gehorsame unnd vorplichtede denste, mit allem vlithe stedes bereyt thovorn, grotgunstige heren, up des durchluchtigsten grotmechtigen, hochgebornen fursten und herrn, herrn Christiano tho Dennemarcken, Norwegenn, der Wenden und Gotten konings hertogen tho Schlesewigk, Holstein, Stormarn und der Dithmerschen graven to Oldenborch unnd Delmenhorst, unsers gnedigsten herren schrivent, so ohre ko. mat. up bericht ohres vagedes als vorordentenn bevelhebbers aver Islandt van der vorfordeilunge unnd beschedigung ohrer underdanen darsulvest ahn juwe erb. wish. hefft latenn gelangen, wellichs juwe erb. wish. uns, als de wy unse hantteringe up Islandt gebruken vorgeholdenn unnd lesenn laten, hebben wy allenthalven inholdes vornamen, und syn darvor juwen erb. w. denstlich danckbar.

Wy konnen averst densulvigen darup tho einem warhafftigen jegenbericht, der notturft na, in andtwordt nicht vorholdenn, dat hochgedachte ko. mat. darvan, wat also unsers deils vann vorfelscheder ware unnd sunst angetagenn, tho milde berichtet wordenn, dan wy kennet godt nicht levers segen als dat christliche, ehrliche unnd billiche hantteringe in Ißlandt geholdenn mochte werdenn, so dat ein jeder uprichtige unnd unvorfelschede guder unnd ware handelde unnd vorkerede, darmit nemandt vorfordeilet, sondern de gelickmetige billicheit mochte geholdenn werdenn, unnd so vele de valsche mathe belanget, wetenn sick juwe erb. w. tho berichten, dat men in vorschenen jarenn eine smale thunnen bottern hir to lande vor soess, soeven, acht, negen ock tein marck Lubsch hefft koenen kopen, und hebben unse vorfaderen tho den tiden, den underdanen der ko. mat. in Islandt eine smale thunne bottern vor einhundert visckes, im geliken eine thunne seinhonniges gelevert, und na advenanth andere grave whar alse meel, molt bëhr, osemundt, de in vorigen tidenn de helffte, ja nicht den drudden penninck ßo fell en koste alse godt betert nu thor tidt, nu willen de inwaner des landes by dem kope, so aver minschen gedenckent gewest is, bliven unnd vorharren up dem oldenn kope, unnd averst solckes wolde der billicheit jo nicht gemete syn, eine thunne botteren de wy itzundt aver XX m Lubsch betalen mothen, vor eynhundert visckes togevende, dat hir baven negen m nicht kan geldenn, dar men thom geringesten noch thor fracht und ungelde ock einen gulden van geven moth, bidden demnha underdenichlich, dat de billicheit des kopes van der graven ware by den underdanen hochstgedachter ko. mat. durch den vaget mochte vorgenamen werden, idt wert ock ferner mangel darahnne befunden, unnd darher vornemlich vorosaket, dat gemelte der ko. mat. underdanen in Ißlandt uns van jaren tho jaren de gyldinge des visckes unbilliger wise, baven den gebruck, so van olders gewesen vorkortten, und den groten visch voruth thën, und mit dem kleinsten viscke uns gedencken, genochsam gildinge thobetalen, wo wy denne etliche jarher, hebbenn tho unserm schaden in betalinge nemen moten, daranne wy denne wo idermennichlich bewust, mercklich tho unserm vorderffliken nachdeill beschediget unnd vorkortet werdenn, dewile denne grotgunstige heren, uns also keine genochsame gildinge gegeven werdt, welckes uns tho mercklichem grotenn schaden unnd entlichem vorderve gereiket, darmit denne nu nemandt mochte vorfordeilet offte bedragenn werden, so were unsere entliche boger, bede unnd forderinge, dat de ko. mat. sampt ohrem bevelhebbere unnd vagede in Islandt eine wicht des visckes so woll vor sueden und osten des landes alse vor westenn vorordenen wolden, up dat einem jederen rechtmetige wicht und mate darsulvest wedderfaren mochte.

Darjegenn willen wy wedderumme, sodane whare und gudere aldar bringen unnd vorhandelen de unstrafflich syn schall und welckere darbaven mit valscher offte bedrechliker ware bedrapen werdt, desulve schall van uns nicht gehandthavet werden, sondern geborliker straffe wo billich underworpen syn, und willen demnha juwe erb. w. denstlich unnd mit vlite angesocht unnd gebeden hebbenn juwe erb. wish. solliche unsere ansoekinge und forderinge gunstiglich mede behertigenn unnd erwegen, und in ihrem wedderschriven ahn hochgemelte ko. mat. mit beforderen helpen willen, dat ohre ko. mat. uns tho vorberorter behoff, de begerte gewicht in Islandt vorordenen unnd vorgunstigen wolden, unnd also henfurder unser gnedigster koning und herre syn unnd bliven, solchs umme ohre ko. mat. in aller underdenicheit, mit live und gude, unserm geringen vormogen na thovordenen, wille wy tho jeder tidt gantzbereithwillig erfunden werden, unnd syn eth ock umme juwe erb wish. gehorsamlich thobeschulden geneigt, dhe wy hiemit dem almechtigen tho heilsamer lanckweriger fristunge in geluckseligem regiment thoerholdenn dhon bevelen. Datum Hamborch frigdages post oculi anno etc. LVI.

Juwer erb. wish.

gehorsame borgere

schippere unnd koplude up Islandt hantterende.