Triplica anwalths dw. anwald unnd procurator Johan Beling, Brun Oldenborges et litis consortium cleger(en) contra anwald Gerdt Brekers beclagedenn.

Vor juw erbarnn hochwisenn herrn borgermesternn unnd raidtmannen der erntriken stadt Bremen erschinet Diderick Wittinck, anwald und procurator der ersamen Johann Beling, Brun Oldenborch und dersulvigenn litis consorten, wedder und jegen anwald(en) Gerdt Brekers unnd sine jungest producerte duplicen und conclusion schrifft.¹ Secht dar jegen triplicando et concludendo, dat clagendes anwaldes principaln mit des beclagenden anwalde nicht hebbenn tho disputeren wo unnd wattergestalt sich de unwille tusschenn sinen principalen unnd zeligenn Corde Hemelinge thogedragenn daran onen ock gans und gar nichts gelegen, und wor beclagts anwaldts principal dess angetagene 101 statuten vor der overicheit dar under solch doitslach geschen stadt gehadt und angenamen werenn, clagendes anwaldes principales mit orer gedaner borge schafft vorschonet gebleven, und dewil dan grotgunstige hochwise gebedende herren nun clagendes anwalden principalen up bitlich anholdenn gedachtes Breckers umme sin levent tho erreddenn vor ome uth christligem medelidende (dewile ohme noch frunde off mage gewesenn siner handlung und sachen ock nichtes tho donde gehadt) borgen geworden und one dar nicht tho gedrungen, wo he wedder de warheit angifft doch i. erb. w. uth vorigenn ingelechten sinen missiven anders gunstichlich hebbenn thoersehende, biddet derwegenn clagender anwald in namen siner principalenn i. erb. w. in rechtsprekenn unnd erkennen wolden dat beclagtes anwaldes principal sinen gegevenen obligationibus ful tho donde unnd clegere der borgerschafft tho benemende von rechtes wegen si schuldich welch clagender anwald mit repeterunge inkamener voriger siner acten und entlich slutende, hirmidt tho i. erb. w. richterlichs erkentenisse wil gestellet hebbenn.

Aller richtlichenn nottrufft unbegevenn.