Clage libel Dyrick van Mynden, anwalden Gerth Brekers des clagenden, contra Gerth Hemelynge beclageden.

Erbare wolwise vorsichtige heren, de wyle yck Dyrick van Mynden anwaldt Gerth Brekers boclaget ys geworden van Johan Belynges, Brun Oldenborch, sampt den medekryges vorwanten,¹ eyner borgetucht yn Hytlant vor mynen pryncipal geschen, dar up eyne sentencie² vann erbarn rade gefelet, dar ynne mynen principalen unaffgesneden, den vorbeholden syner in actis angetagener ynsage jegens Cordt Hemelynges selygen broder unde fruntschup, dar up yck anwaldt ynstede mynes principalen, myn clage lybel avergeve wedder Gerth Hemelynck, mach i. e. w. clagender mate nycht bargen, dat mynen pryncipal sulke anforderinge der pennynge, der anderhalff hundert Bremer marck, van Gerth Hemelynckge unbyllick boiegent, sulkens uth dem bowys artikelen, so yck hyr boneffen aver geve, tho befyndent so der sulvigen ytwelke, vam yegendel vornenet, erbede yck my anwaldt tho bewysen, myth den schepes kynderen, do mals myth Cordt Hemelynge gesegelt, de men dar van bohebben kan, unde dewyle war ys, dat de schypper Cordt Hemelynck selyger, na dem slage de em van mynen principale up de fynger geschen, gegen gestan, myth dem folke ock myth Gerth Breker gegeten, gedrunken, tho lande gefaren, up der ohe, na den schapen sulvest mede gewest, vorhape yck my ganslyck tho gade unde dem rechte, myn principal scholle des 101 statutum geneten, men scholle mynen principal nycht hoger bosweren, alse myth slegen unde bulen na stadt rechts.

Wyder so ys mynen principal bolavet, ock eyne hantschryft den borgen gegeven, van Gerth Hemelinck, dat myn principal, bynnen unde buten Bremen scholle mogen gan unde stan, dar up syck myn principal vorlathen, unde der halven syck also ingelaten, dat syck nu anders befyndt, unde nycht van Gerth Hemelynck mynen principal kan geholden werden, dewyle den kan bowiset werden, myn principal Gerth Breker, Cordt Hemelink seligen, andere nargen den up de hantspiken geslagen, de slach uppe de fynger unde arm gegleden, unde dat de schypper vorhen mynen principal twe slege myth der hantspiken gegeven, dat he dar van gestortet.

Item dat de schypper Cordt Hemelinck selyger darna myth dem folke gegeten unde gedrunken, tho lande unde up de ohe gefaren, dar bygestan, do myn principal de boden up dat landt tymmerde, des gelyken de koien yn der boden, vor den schypper, dar he em ock sulvest thogelanget, wes Gerth tho donde hadde, van nagelen unde anderen, der halven ynkort vorhabet, wyl syck principal vor hapen, dat vorgenompte statutum thogeneten, unde kein dode hals up ohn konne gelecht werden, unde soden eyn dode hals up em gelagt, des yck my thom weinigesten, ya gar nychts vorsee, konde myn principal mynes vorhapens, myth eyner straffe gerechtferdiget werden, alse straffe des lyves, unde vorwisinge der stadt unde gebedes, (odder thom anderen del straffe yn synen guderen, scholde myn principal anderhalff hundert marck gaven, wyff unde kynder thom bedeler maken, dar tho lyvesgefar de stadt ydt gantze gebede eynes erbarn rades myssen, is dem rechte ungemes, wyl yck ynstede mynes principalen tho i. e. w. nadenken, unde thom rechte getagen, i. e. w. rychterlyck ampt denstlyck anropen.

Myth vorbeholt aller wyderer nothtrufft.