Triplica et conclusio anwalds Greten Embdemans clegerinnen contra Hinrick Sprenger an stede sines broders boclagten.

Wedder de ungerrumbte, stoerige und unvorschamede duplicen Hinrick Sprengers der gebor nha tho triplicern segtt clagender anwaldt, sowel eins erbarn rades bevhel welcker van twen heren des rades Christoffer Sprenger vorwittiget und insinuert belanget, datt datsulve aller machen, we im libel vormeldet ergangen, wil men sick tho densulven heren, als h. Cordtt Wachman und h. Roleff Reynecken, getagen hebben, de des jegendels nasewise und avermodige schriffen oft he glick noch so trotzigen und hoverdigen thrasonitzerde, nicht unmundich macken wertt.

Dar aver Christoffer Sprenger twe rocke mith sick in Hittlandt geforet, und sin dichter datsulve als were id mith grotem rechte geschehen, understen thovordedigen, und tho der behoff, darmith nhemandt deincke ich hebbe ein schlicht dudscher doehor erfunden, einen gewaldigen textem juris herthu foret, aldus ludende, cum utrisquisque rerum suarum sit moderator et arbiter, were demsulven dichter tho raden gewesen, he hedde datt blatt noch ein mhal umme geschlagen, dan dar hedde he vellichte wider beschreven gefunden, nisi parto aut lege prohibeatur. Nhu wuste Christoffer wol, datt de guder samptlick inventert, eins erb. rades vorbot darihn gelegt, ergo volget datt he mith siner dättlicken hennoeg forung, des rades vorbott averreeden und vorachtet, wan ock des jegendels dichter de nase noch so hart daraver runselde, wes van clenodien Christoffer umme smeden lathen, oder sunsten vorutert, hebbe wy in unser replicen tho sinem ede gestellett, lathen id nochmals dar by bliven.

Watt averst utherhalven der hovetsacke up principal clegerinnen person spotziger wise van wegen ohrer averfarung, gesmehet, offt wol anwaldt nhuweel so unbedacht gewesen, datt he sodans wolde billicken, oder ihn deme se willen vortreden (we dan adversae partis advocatus sinen principal ihn all sinem vornhemende byfeldt), scholde dennoch de jegendel datt gemeine sprickwort, nosce te ipsum, item, tecum habita et noris quam sit tibi curta supellex, billick bedacht hebben, dann offt wol van unnoden allem datt jenne so mith warheitt konde gesegt und dargedan werden, tho erhalende, moth he dennoch wol wethen, datt desser sich de weg, eines andern schande tho reppende, even so wol apen stunde als ohme, sed in iudicio litigare est argumentis et probationibus certare, non conviciis. Deme sick dusser sich anwaldt ider tidt gemet geholden, und were darsulve ock henfurder gerne don, so he van den jennen, so tho hus wol einen schincken im solte funden, unbemoit mochte bliven, dar darsulve averst nicht konde geschehen, wert ervolgen terentianum illud qui dicit ea quae vult, necesse est ut audiat quae non vult. Ut, quemadmodum Salustius, si quam maledicendo coepit voluptatem cum male audiendo amittat. Dan id hedde vornemlick des jegendels sinem dichter nicht gekortt, dat he dußer armen schamlen personen de im elende vorwiset, und ohrer averfarung halven gestraffet worden, so gar mith hefftigen smelicken worden scholde tho gesetten hebben, cum afflicto non sit addenda afflictio. Vele erbarer aver were id eynem doctor gewesen, datt he gedacht hedde, als thais ad adolescentem Terentianum segtt. Si ego hac contumetia digna fui maxime, ac tu indignus qui faceres tamen. Ock weth he sick tho berichten datt he sunst dußes fals milde barmhertigheitt ertoget.

Watt wider upgemelte dichter uth hoger vormetenheitt und vervorschamden stolten mode, up clagerinnen schriver uthspiet, als gekorde demsulven nicht tho advoceren, und hedde etlicke wort in des jegendels conclusion vorendert, segtt schriver darwedder wan es by jegendels advocaten stunde, wol advoceren scholde offte nicht, hedde vele advocaten tho besorgen datt se vorstott mosten werden, darmit he alleine de armen clientulos nha sinen lusten hedde tho beschatten, und van einer geringen sacke, de kume up ver daler sick erstrecket, twintich pro honorario (ick meine aller machen wol vorehret), hedde tho fonderende, dwil aver avocatura dignitatis oficium ist, und in iure sunderge personen darvan excludert, ock sunsten sine laesione damae, dessulven naemandt kan endtsettet werden, wil sick clegereinnen schriver vorhapen, dar des jegendels dichter, also sin gude geruchte bedacht were ahnthogripen, ith scholen billick sine jurede gehort werden, und sine causae cognitione sunsten nichtes darihnne geschehen, dan gott loff, ohne rhom tho reden hefft dersulve schriver sine jura ock studert, ock sinen parthen dermathen gedenet, datt he id vor gott und idermenniglickem mach bekant sin, und were ohme leith, datt dar jenige, wes he sine levedage gelesen, geschen, und gehoret, by ohme vorredest vorsonen scholde, achtet id ock darvor, datt sodans enen erbarn rade, nicht so gar angenhem sin wurde, dan ein schlecht vidimus oder dergelicken, konde ock wol ein vinger schutze scheinen, watter gestalt he aver tho dusser sacke gekamen, scholen ohme des gude ehrlicke lude tuchnisse geven, datt he id mher Greten Embdemans als einer vorlatenen bedroveden wedwen tho troste, als sines gewinstes halven gedan, dar he aver segtt den schriver hebbe etlicke wort ihn der beclagten exception vorendert, schal he tho ewigen tiden dar don, datt der schriver den vingesten punct in des jegendels producten vorendert, sunder segtt dar wedder, he wille den dichter vor sodanen mhan holden, dat he ohme sodans averbringe, wedderumme aver watt wort he in sinen egen oder der clegerinnen producten gebrucket, gift dem jegendel ock nicht tho schaffen, [?]te ware seiner parthie sacke und lathe ock eynem andern siner parthe sacke waren etc. Mith denstlicker bitt i. e. w. wolden in recht sprecken erkennen und erkleren, we im clag libel und sunst allenthalven bedeiden, i. e. w. richterlich ampt hohstes vlites ahnropende, hirmith thom ordel ihn gotts nhamen schlutende.

Salvis ulterio(ribus)