Duplica Segeba Deitken und syner mitbeclagten, contra Johan Rungen vormeynten jungest ingelachten replica¹ und syner mitcleger.

Der jungest ingebrochten gefarlyken replicen in aller eintfolt duplicando tho bojegende, neme ick Segebade Deitken neven mynen mitconsorten alse beclagten erstlick vor bekant an, so wat darinne uns tho drechlick tho funden, wedder dat overige so und wedderwerdich und nadelich gemeyne jurede gevende (mit dusser herlyken protestatien, dat wo in der negesten unser reception oder responsion (einn exceptio etiam dicatur responsio) etwas von unsem patrono uth misvorstende gesettet, dar unsem berichte nicht gemete und uns tho nadele flucks angenhamen edder uthgelecht werden wolde, off scholde wy dar inne keynes weges gefulbordett, sunder solliches nicht gesettet, und unsem jegendell, dardorch nichtes ingerumet hebben willen, angesehen, uns sollichen error facti (den wy ock also balde hirmede revereren don) nichtes preindiceren moege, bewustes rechten.

Demena dewile id de cleger so hoich begeren, wille wy hirmidde den krych expresse bevestiget hebben und seggen dat wy der angestelten vermeinten thogenodigten clage, allermaten de vorbracht, nicht gestendich. Und geven ferner anthogende, dersulvigen ungrundt, doch dath alle tyt wedderhalet und verbeholden, dat wy ohnen wat se van der haven ankumpst und dat se den alle tho lyke erlangett, item dat wy den mottwillich vorlaten und ick Segebade Deitken van dem vagede scholde gefragett syn off ick den lenger beholden wolde, und darup neyn gesecht hebben etc. Wie dat na der lenge van ohme tho vordell angetagen und uns dardorch (weil dat unse patronus nicht recht ingenhamen), gerne geferen wolden, mit nichten gesen, edder nageven. Dussen warhafftigen bericht darjegen se nichtes erhevelichs wils godt tho ewigen tiden, upbringen scholen dat sicks mit dussem stridigen handell volgender gestalt und anders nicht begeven und tho gedragen, hebbe. Nomlich dat anno 60 de wy in dem lande up und aff getagen eyner under den clegern, mit namen Johan Kordes, so dathmal unse eigen dener gewesen, und nu idlicke jare under mynen dirick toegen brode gewesen wat ick ock geholden alse mynen lifflyken sone ohme alle myne gelegenheit wetten laten, und derhalven my wol ehr hemmelsfals alse sollecker hinderlisticheit the ohme verstehen hadde, tho gefaren is und sick hinder unsem rugge stilleschwigende tho des landes undervoegeden gefoegeth hefft und mit deme sovele practiceret und understeken dat se ohme entlich by deme hovetfagede eyne verschrivinge der haven Baltesunt² tho wegen gebracht hebben.

Welcke ohnne doch de hovetvagett alse eyn vorstendiger, der dissen dingen wider nagedacht und uns ahne twyvell dardorch erwecken wollen, wy unser saken beter warnhemen, nicht lenger den up dat 61 eynige jar stellen und erstrecken lathen, des wy uns uppe dat rechte originall, der vorschryvinge so up Schottisch geschreven willen beropt hebben und kunnen noch willen, unerwiseth keynes weges geloven dat de ingelechte Dudesche copie mit demsulven recht originall avereynkame, dewyle darinne befunden wetth dat de have Hynrick Byleken tho gebrukende ingedaen syn schall, je wy dath andre kunschap hebben und der jegendell sulvest bekennet dat de verbenompten unsem fromen knechte Johan Kordes up syn hinderlistich solliciteren, wie gehatth dat jar erlovet worden, weßhalven dan ock den clegeren disse herliche collectio sose underanderen vor eynen gruntfest ehre klage holden nicht angeit, dat se so argumenteren, ein borger is des anderen synes wolgewunnen haven tho entsetten nicht befoegett Hinrick Byleke alse eyn borger hefft de haven Boltzunt van dem vagede thogebrucken rechtlick erlangett, darumme hefft he des nicht entsettet werden schollen etc. Dewyle de minor indussen sylligisme bwfellich und van uns nicht gestanden, ock und dem jegendell, minder unduchtigen unwarhafftighen vorgebrachter abschrifft des rechten originals nicht kan gesterckt und probieret werden, sinthemal dat originall nicht up Bilcken sunder Johan Cordes wysen und ludent is.

Und darmede tho groterem berichte i.e.w. erfaren mogen welcker gestalt datt Hinrick Byleke tho dusser vorschryvinge kame und tho derhaven will borechtyget syn, so kunne wy i.e.w. nicht verholden wie dat vorgedachten unsen truwe dener itzung mitcleger alse he hir tho Bremen mit synen expracticerten breven ankamen, und dar nach besorgede dewyle he hir wedder bur noch borger was, dat ohme nemant lichtlick guder vertruwen und schepen wurde, tho gefaren und uns tho vorfange und nadele sick mit Hinrick Byleken voreynygett dat ohme desulvige ethlicke syner frunde tho gewysett und daraver vorgetlichen wyse dessulven namen an syne stede in de angegeven copien hett setten laten, mit welcker unbilliken unde tho rechte hant vorbadennen practiken de frunde tho schepen vororsaket nicht anders meynende, de haven volgedachten Hinrick vermoest[?] der losen und nichtigen copien thogeseth were, welck he und syne consorten ohme ock wolgefallen laten und uns dardorch in merckliken schaden gesett hebben, weynich achtende wat soliche motwillige vorfelschynge sodaner bachbreve vorgefar up sich hebben und de so sick der gebrucken vor ehre darvan tho erwarden.

Tedussem kunne wy i.e.w. duth ock nicht bergen, dat velgedachte Johan Cordes andeme dat he de borgere also tho unsem vorderve erwecket noch nicht gestedigett, sondern up dat he uns noch groteren schaden tho foegede und unse schult alse de umme alle unse hendell widste des orths stoppede so dat he noch eyn ander fur upgeweigett und itliche buren hir tho lande them Ottersberge wanhafft an sich gehengett, de he etliche guder vorhandelt hefft, alse weren de syne und ander borger gudere, und welcken ock idtlick vorby geschepet, offt dar eyn erbar rath dat syne van gekregen geve wy tho bedencken.

Und dat duth war is, so hefft Dethmar Brelo tho dertyt kemener, densulven Johan Kordes alhir tho Bremen beslagen korth vor synem uththage, der menynge ohmedusses mothwillen halven thobespreken.

Uth welcken nu i.e.w. lichtlich tho erstehen dat id umme disse sick vele anders gedan is und der cleger angeven allerdinge nicht alse speyell glat is, wo se lude darvan ropen, und uns by i.e.w. thom hogesten besweren. Bidden demena darmit entlich unse unschult und de warheit tho gelyke an den dach kunnen moege i.e.w. so darhenne holden willen, dat se dat rechte Schottische original tho lichte bringen moten, so werden i.e.w. nach flitiger sesichtigung und averlesunge dessulffen hell und klar befunden wat dat vor lude syn den de have dat jar tho gesecht, und offt de vorschryvinge uppe de nachfolgende jare und alle de wyle de tolle geven werde we de cleger vormennen tho duden und tho theendesen.

Wo denne erschynett und der bockstaff mit sick bringett dat de have Hinrick Bylcken Johan Rungen oder anderen borgeren dartho den gestalt und solange wo gemeldet tho gebruken tho gesecht is, wille wy uns aller gebore wisen laten.

Wo avernicht (alse wy den gentzlich vortruwen und dessesfals wol scher den clegeren trotz beden wollen), so wil wy ock wedderumb menen und hopen, dat unse unschult eynmall tho gude kamen, und sollicher unbilligen uplage billich schollen loß getelt werden.

Und fechtet uns alles nicht gan wat de clegere van dem bewynkopen der have na der lenge und wyde infoeren, dewyle se des keynes bewisen edder up uns bringen mogen und alle macht und gewalt des landes by der overicheit ohne welckes willen nemandt dar in gelaten edder daruth verwiseth werth.

Dewyle uns dan der erbar vagtt Oloff Synckeler den orth landes darumme wy beclagett werden, uns darin wy lange jar thovorn kopenschup gebruckett und dene jarlich mit gude vorsorgett (wo dat den clegern sulvest nicht unbewust is) na vorlopenner tyt unsem framen knechte thogesecht, welcke ohme ock geholden, dat se ohne und synen anhanck by eynem witten bethalen moth uns des ordes wedderumme mit den luden tho handelen mit synem guden wetten und willen erleveth unde vorgunnet hefft und sede clegere daruth entwiken heten, so kan jo ahne groten affbrake der warheit nicht dar gedan werden, dar wy de cleg(ere) van uns sulvest des entsetteth und vorweldiget hadden oder ock lisitchlich hinder ohm her gehandelt, dewyle ohre tyt vormoge der vorschryvinge umme und wy uns ohrdes tho dem lande nicht genalet hebben, und mochte hirmede dat wy ohne van unsen vorhebben nicht gesecht dat se uns thor vorkleninge und ungelimp so hoich es mutzen ser woll stille swighen, und dar jegen holden wy velbemelten framer knecht alse he de haven by sich bracht sick jegen uns geholden, und dat he des willens wehre uns ock keyne breve thogeschreven, welches by allen schepesfarern unser und andern nation ock noch neyner tyt solicher fintlichen tho nedigung gewalt und unrecht, welkes wy tho gelegenner tyt neven den anderen schaden dar in se uns motwilliger wise gesettet wider uth tho foeren nicht willen vorgetten heff [!].

Dat aver in dussen alten wolgedachten vagt dat he uns na uthgande des 61 jars des ortes landes wedderumme tho handelende vorgunstiget und se nicht tholaten willen tho vel edder tho weynich, segge wy noch wy vor, dat se ohne hirumme bespreken moegen und soeken ohren warder, kunnen se den dardon, dat he ohnen wat tho gesecht achten wy den man der ehren, dat he ohne sollickes ock woll holden warth und willen se dersulven nochmal darhenne vorwiset hebben, des vortruwens i.e.w. alse de cleger meynen solliches nicht vor unbillich erkennen werden.

Dat ock spottisch vor auch werdett werth, id sy eyne even woldaett, dat se de vaget in andere haven vorwisen willen, late wy up synen werde berouwen, holden dennoch dar aver id syn noch mer poggen dartho eten gewest alse de erberen des orts wesende vorteren moegen, hebben se sollichen nicht annhemen, sick ohres besten befliten und vorsoeken willen moegen, se hirdorch verorsakeden unrath ohne sulvest wy billick thometen, und secht uns weynich an off se deraver na Bergen in Norwegen edder na Compostell in Spannyen gelopen syn, dewyle wy des unsen wargenamen und se nergenth henne geyaget hebben.

Deme allen na und dewyle den uthe dissen rechten gevarlyken warhafftigen berichte claro clarius tho befinden dat is erstlich mit der ankumpst des haven nicht degelegenheit hefft alse were de Byliken Rungen oder anderen borgeren thogesecht. Tom anderen dat dusse thosage unsem fromen knechte gescheen alleyne van eynem jare gewesen. Tom drudden und entlich dat wy se uth dem lande nicht gedrengett noch gewuppet edder gewaltsam vorjaget hebben, des uns ock tho undersam vele tho weynich achten und godt loff beter weten und uns de vorbenompter vagett by welcken und wegen der ko. werde alle macht und gewalt disser dynge sett, des angelandes tho handelen und tho wandelen alse dat jar (wie thovor velmall gerogett) umme gewesen gunstichlich erlovet und tho gelaten hefft, des wy uns up syne unstrafflyke vorschriffinge refereren don.

So wille wy ock tho godt und denn rechten vortruwen, dat wy sollickes alles mith gudem boschede woll don moegen, und den clegeren disses halben wo geklagett keyne rechtmesige ansprake wedder uns gebore derhalven bittende i.e.w. uns und desulven angestalter klage krafft itzunt ingebrachten mit erleggunge aller unkosten entbynden und loß wollen stellen solliches ock tho rechtlyker erkentenisse.

Verner notrufft unbegeven.