Coppei des breves van Oleff Sinckeler, vagtt in Hitlant.

Si kundt unnde witlick allen unde idermennichlick weme dusse breff vorkumpt, als van mi Oleff Sinckeler vann Havero, kemener, bevelhebber unnde princepall hovetvagett in Hitlandt vor eine tidt, mit wolvart sampt eines fredesamens reigerunge etc. Vort dewile idt van der overicheit in strenger ordinantie is bevalenn gerechte tuchenisse der warheit ider mennichlick to gevende, dat dar dorch deme rade unnde overicheit geine besweckunge odder beswerunge vorkamenn odder vorgestelt werdenn, derhalvenn do ick kunt unnd geve to erkennenn, als der hochgedachtenn universtetenn odder wome it anlangenn is, unnde in sunderheit de principall unnde wolwisenn herenn borgermeistere unnde radt der stadt Bremenn, so hefft sick de sake also to gedragenn, im jare nha der gebort Christi 1562, des maentes aprillis offte dar umbtrent van wegenn einer havenn alhir in Hitlandt genompt Baltosunt, welcker gelegenn is in einem eilande mit nhamenn Unste, unde ein schip van Bremen is in de sulvigenn haven gekamen unde sick understande unde vorgenamenn kopmanschup aldar to holden eine tidtlanck, under de schipper des schepes genompt Johann Runge unde de kopmann gehetenn Johan Kordes, desulvigenn twe parsonenn sint vor mi, bevelhebber des landes erschenen unde orleff begert mit orenn schepe in der havenn Baltosunt (wo vorgerort) to liggen, unde erenn handell unnde koepmanschup aldar to gebruckenn. Darup ick geantwordet unde onen vorgestelt, den koer hiruth to hebbende van dussen havene eine kopmanschup to holden als hir na volget. Int erste de haven in Schalewage, de haven in Lassevorde, de havenn in den Brussunt, de haven in den Quallsunt, de haven up Drostenes, de haven van Sunte Mangens eilandt, de haven in Wallosunt, unde de haven in Papposunt, welcker sint de principall haven im gantzen lande, dar alle andere fromede unde uthlender ere kopmanschup unde hantterunge gemeintlick hebben, unde de vorgesechte schipper unde kopman hebbenn dit alle uth geslagen unde vorsmadet yn nenerley wiß in nener haven to liggen, behalvenn in den vorbenomedenn Baltosunt, welcker ick onenn nicht hebben willen vorlovenn in keinen wege, umme dusser cauße unnde orsake willen wo volget. Erstlick darumme dat se sick understundenn unnde entlick besumet in der vor benomedenn havenn to liggen, dewile it nen gemene havenn odder suß nen gebruck is schepe aldar to liggen, unde hebbenn sick in der matenn bewisett wie bevelhebberenn. Thom anderenn darumme dat dat gantze landt behovich unnde knap was vitallie halven unde allerleie hande ware, unnde in sunderheit den ortlandes dar dusse vorbenomeden achte haven inne belegenn sint, welcker is meistich voetvast landt, unde de eilande als Unste, Jelle, unde Fetlo hadden to der tidt ein schip liggende in den Oegesunt, de schipper geheten Dirick Foege, unde in Jelle in der haven in Borwage ock ein schip, de schipper gehetenn Segebade Detken, unde de kopman Johan Schulle, unde in Koldewage ein schip, de schipper geheten Johan Michelis, welcker dre eilande nicht geholdenn wart vor dat verde part lanndes na amparte, unde de dre eilande hadden als to der tit mer vittalie unnde gudere (unnde alles wes dar gebreck was) van den dren schepenn vorbenompt, den de gantze reste des landes hadde. Ick mi derhalvenn bedacht unnde geradtslaget mit denn gemenen volcke des voetvastenn landes, dat de vorbenomede schipper und kopman untemelick unnde unbillick begert hebben, er marcket unde koepmanschup aldar to holdenn, in dem orde des landes welcker doch so verne gelegenn is vam voetvastenn lande, dat se nicht konden den eddelenn unnde gemenen entsettinge don, mit erer ware unde kopmanschup. Deshalven mi recht bodacht mit rade itlicker eddellude des landes (umme der vorbenomeden orsake willen) onen gein orleff odder vulmacht to gevende kopmanschup to to bruckenn in denn Baltosunt vorbenompt, sunder eine andere haven wo vorgeschreven onen to vorloven was to orer koer etc. Darbovenenn is mi vorgekamenn, dat de vorgerorde Johan Runge unnde sin kopman sick hebben vorludenn latenn vor deme rade der stadt Bremenn, dat de vorgesechtenn Segebade Detken, Dirick Voege unde Johan Michelis (ere kumpanie unde mede parttie) hebben ein orsake eres henwech tendes gewest, unde se vorweldiget unde gekofft uth den Baltosunt, welcker ick klarlick eropene dat it untrewlick erdichtet sy, wente it is gedan bi mi als overste unde bevelhebber, van wegen der hochgedachtenn frewlin der koningynnen orer gnade etc., welcker bewust is der gemeinte des gantzen landes. Darup ick mi will vorantworden vor godt unde unser hochgelavenn princesse in to kumpstigen tidenn. Dit ick betuge unde eropene mit aller billicheit vor alles weme, unde insunderheit vor dem borgermeisterenn unde radt der stadt Bremenn, unnde vor idermennichlick deme it anlangenn is etc., to merer tuchenisse der warheit dusses baven geschevenn mit miner handt under tekent als hir under geschrevenn steit, unnde vorsegelt mit minen segell. Gegevenn unnde geschrevenn in Hitlandt up Bru, denn 18 augusti, unnde im jare na der gebort Christi 1563.

Oleff Sinckeler vann Havero, mit miner handt up de vedder geroret unnde bi minem dener Hinrick Nachti geschreven na minen heten und bevele.