Durchleuchtigster greissmechtigster kuningk euwer kunigliche may. seinn unsere underthenigste willige dienste altzeidt zufur gnedigster her. E. kunig. may. gebenn wir undertheniglich zuerkennen, das wir venn Hermann Schemacher, Herman Kechtingk, unnd anderen irer magschaefft burgerenn zu Bremmenn gleubwirdigk bericht, das sie unnd andere schepleuthe jhe daselbst sich lange zeit unnd jhar hero, der schefferdt venn Bremenn nach Eisslandt, unnd daselbst inn Esslandt [!] zwee kleinen haffen dero eine die Kippelwick, der ander die Grindewicke genandt, gebraucht habenn, unnd sich inn dem mit ire fuer guther unverfalscheder whare unnd verrichtunge der zollenn also verhalthenn den inen selichs bei e. kunig. may. unnd derselbigenn amptenn unnd bephelichhabernn, unvorweisslich gewesenn, als inenn aber ver etzlichenn jharenn¹ inn belagerunge der stadt Bremenn, ire schieffe verbrandt, unnd sie sich derwegenn angeregter schieffart, dermaßenn wie hiefur nit habenn brauchenn kunnen, das die Hamburger mittlerzeit sich derselbigenn schieffardt unnd obbenenter haffe angemast unnd undernheemenn unnd inenn dardurch ire gewerb unnd hantirung nith ahne irenn geringen schadenn, abgestrickt, unnd ob sie well neuwelicher in Eißlandt abgefertegt so sei idoch dero eins daßelbs in obberurter haffe die Grindewicke genandt durch storm unnd ungewetter umbkhommenn, aber dah etzlicher irer guther daruff gebergt unnd zu lande gebracht, derwegenn dann ire notturfft erfurderthe, ein schieff nach Ißlandt gegebenn zu lassenn, solche unnd ander wahre anhero zubringenn, erpiethenn sich auch gantz leich unnd milde, gude unverwechselthe whare ider zeit e. kunig. may. unnd derselbigenn underthanenn zuzufuhrenn, mit gantz dienstlicher unnd fleissiger bitt sie ahnn e. kunig. may. underthenigst zuverschriebenn unnd zuverbittenn das e. kunig. may. umb unser underthenigstenn furbitt willenn, gnedigst geruhenn muchte, inenn auff geburlichenn zollenn, unnd das sie ider zeit e. kunig. may. unnd derselbigenn underthanen guthe whare zuzufuhrenn erpoetigk, die angeregte haeffe ver anderenn gnedigst zuvergunnen unnd einreuhmenn, als wir nhuenn obgemelthe Herman Schomacher, Herman Krechtingk unnd ire masschaefft als die unns vor fromme lude bekandt, in irenn gewerb unnd nharinge gerne befurdert sehenn mochtenn, so habenn wir inenn dieser undere verschrifft nit wissenn zu weigernn, unnd ist demnach ahnn e. kunig. may. unsere underthenigste unnd dienstliche bitt, e. kunig. may. wellen obgedachtenn burgernn auß Bremmen, die obbenente haiffe in Eisslandt, kegenn ire beschehenn erpiethen auch darleggunge der gepurlichenn zollenn ver anderenn gnedigst einreuhmenn, unnd dero zu mehrer befurderunge gemeiner hantirunge unnd erer furhabendenn segelation unnd scheffardt gebrauchenn, und sie dieser unser underthenigst verbitt geniessenn lassenn, wie wir unns dessenn, unnd sunst aller gnedigstenn furderunge zu e. kunig. may., ungetzwivelt vertrostenn, das erkennenn wir unns umb e. kunig. may. nach unserm euserstenn vermugenn unnd ungesteart(?) leibs unnd guits in aller underthenigheit zuverdhienen schuldigk. Datum under unser pitschaefft denn 6ten septembris anno etc. 1565.

E. Kunig. may.

underthenigste

Her Ludolff van Varendorp, thumprobst der kirchenn zu Bremmen etc. Georgenn van Helle, Hilmar van Monnickhausen, beiden oberstenn, und Adrian vann Steinbergk.