Erwerdige, hochgelerde unnd erbare her domdeckenn juwer erw. unnd hochg. gst. sin unse gantzwillige deinste iderer tidt thovoren, grotgunstige her, i. erw. unnd gst. geven wy deinstlick thoerkennenn, wat gestalt unse vorolderenn unnd verwandten, inn verruckten jaren ohre handteringe unnd kopenschup in Ißlandt geforet, welcke dan thom deile etlicke jare, dorch affbernendt, unser schepe, so anno etc. 47 in der belegeringe dußer stadt Bremenn, geschehen, geschwecket unnd gemindert. Dewile averst wy ungerne sulcke handteringe gantz unnd gar fallenn, sunder vele lever in unser vorfharenn votstappenn tredenn woldenn, darmede wy unnß unnd unse wisser unnd kinder christlick unnd ehrlick ernerenn unnd underholdenn mochten, hebbenn wy vergangen 65 jareß twe schepe, mit guder, unvorfelscheder wahre darhenn in Ißlandt thosegelenn uthgerustett unnd affgeferdigett, de ock beide dar indt landt gekhamenn, unnd in den havingen Kibbelwieck unnd Grindewieck gelegen, under welcken dat eine, so in der Grindenwieck gesettet, thom dele dorch geferlickheit der bosenn havinge, thom deile ock dorch ungestummicheitt deß wederß ummegekamenn unnd gebleven, jodoch, de ungeschepedenn gudere mehren delß geborgen unnd aldar domalß vorhandelt und darvor fisch vorbutet wurden, so von dar dorch mangell deß schepeß anher nicht hefft kinen gebracht werdenn, darher wy dann unnß umme ein ander schip beworvenn, in meinung datsulve darhen avermalß affthoferdigen. Wann wy nhu de vorsorge dragenn, dat andere schippere obgenandte havinge vor unß innehmenn, edder sick an andere, den havingen thobehorigenn ordenn setten unnd ohre schepe anleggenn mochten, so unnß in unser kopenschup tho beschwer gerekenn konde, unnd wy dan unß tho i. erw. unnd gst. (alß de unnß by der kon. mtt. tho Dennemarcken (dewile desulve i. erw. mit gnadenn thogedaen) in dußem, unser verhapendeß, beforderlick sin konenn) alleß gudenn versehenn.

Alß biddenn wy deinstlick, i. erw. unnd hochg. gst. sick nicht beschwerenn willenn, dersulven befordernuß unnd vorbitlicke schriffte an de kon. mtt. tho Dennemarcken, unsenn gnedigsten herenn, gunstichlick mede tho deilen, darmede wy von ohrer kon. mtt. mit einem schrifftlicken versegelden schin gnedigst versehenn, dat unß obbenante beiden havinge, edder jo thom weinigsten de Kibbelwieck und dersulvigen thobehorige ordere, jegen entrichtinge geborlickeß tollenß, vor andere, unse gudere, alse mehll, beer unnd andere gude kopmanß wahre, so deß ordeß deinlick, aldar thovorhandelenn unnd darjegenß von den luden darsulvest, fisch unnd anderß, so ohnen de leve godt, uth der sehe bescherenn werdt tho kopen, frig gelaten werdenn moge, dat willenn wy tho i. erw. unnd gst., alse de unnß unnd andere borgere, in rechtmetigen hendelnn gerne befordert sehen, unß gentzlick vortrosten, unnd sind id na vormogen thovordenenn gantzwillig. Datum Bremenn, denn 29 martii, anno etc. 66.

I. erw. unnd gst.

gantzwillige

Herman Schomacker
Herman Krechting
sampt unse marschup.