Erbare Hoch unnd Wolwysse unsere underdenige gehorsame unnd gantzwillige dienste syn juwen Erb. W. mith besondern vlite thovorahn bereidt. Grotgunstige gebedende leve Herrn. I. Erb. W. konnen wy unsere nottrofft nha nicht bergenn welcher gestalt von Kon. Matt. tho Dennemarcken unserm gnedigstenn Herrn Christoffer Voegler Amptschriver up Segeberge ist gnedigst begnadet unnd vorlehnet wordenn. mit twen Havenn alsse Dureforde unnd Isseforde in Isslanndt belegenn.¹ dergestalt dat he diesulvigen besegelenn latenn mach. wo I. Erb. W. uth avergevene Copey. so die Kon. Matt. darup gegeven gunstichlich thoersehende hebbenn. wormitt vormalss der Erbar her Bartholomeus Tinappel ethwan Burgermeister tho Lubeck iss begnadet unnd vorlehnet gewesen² Nun iss idt ahn dem dat ethliche Lubische Burgere alhir tho Hamborch ein schip uthreden unnd afferdigenn. der meynung up gerorte Haven. darmit Christoffer Voegler von Kon. Matt. gnedigst vorlehnet tho segelenn. Welchs unnss den tho mercklichen schadenn unnd affbrock unnser kopmanschop gerekenn worde Dewyle den gedachte Christoffer Voegler und niemandt anders von Kon. Matt. tho Dennemarcgen unserm gnedigsten Hern tho disser tydt mit den Haven gnedigst belenet und begnadet ist unnd ehr ock ein schip darhenne tho segelende gefrachtett unnd geredett. Alss ist tho I. Erb. W. alsse unsere geborlicke Vevericheyt unser gantz dienstlich bidden I. Erb. W. wollenn unnss mith einer gunstigen vorschrifft ahnn einem Erb. Rade der Stadt Lubeck van rechtes wegen mit thodelende unbeschweret synn. darmit ein Erbar Radt der Stadt Lubick darsulvest ohren Borgeren manderen und gebeden latenn. dat sie sich solcher Segellation up berorter beider Havenn entholdenn. unnd wy hir dorch nicht in schadenn gefoeret werdenn mochtenn. den dar sie sich jo baven thovorsicht der Haven nicht entholdenn unnd unss schade daruth entstunde. dat wy densulvigenn by ohnen soeken unnd weten werden. den wy unnss der Kön. Matt. tho Dennemarcken etc. unsere gnedigstenn Hern vorschriving. So Christoffer gantz gnedigst mit gedelet. und ehr Christoffer solchs in syner affreisse na dem Nedder Lande mith unss vorlatenn. up offte gedachte haven tho thorustenn. gentzlich wollen referert hebbenn. unnd dor den baven dit alles kene frucht by gerorten Lubischen Burgeren finden edder stede hebben moge. wyllen wi unss disse warning vorbeholdenn hebbenn. Den wy mit nichten geneigt up hogstgedachter Kon. Matt. verschriving sie darsulvest tho segelen. ock felich koepenn und ohre Hantierung driven tholaten. Unnd iss wahr dewyle her Bartholomeus Tinappell darmit begnadet unnd vorlehnett gewesen. unss nicht einen man so unsere schulde in forderenn muchte mit int Landt avernemen wollen. wo I. Erb. W. ethlicher maten twivelss ahn noch woll bewuch ist. und sie nun alhir dewyle wy die verschriving hebbenn. gantze schepe darhenne wollenn redenn. Derwegenn werdenn I. Erb. W. unnss dar die saken anders kemen (den wy nicht anders den die billicheit soeken und ohren schaden. den ohnnen hiruth bejegenenn konde. gerne verhott sehenn wollen) unnss hirinne ferner schuttenn unnd handthavenn. Der underdenigen thovorsicht I. Erb. W. werden sich hirinne gunstich ertvegenn. Dat synn wy umb I. Erb. W. alss gehorsamen unsers vormogens thovordienende gantzwillig.

I. Erb. W.

gehorsame und gantzwillige Burgere

Jurgen Wegener
Hans Elers
Hieronimus Voegler