Meinn freuntlich dienst mitt wunsch alles guettenn zuvornn, gestrenger, edeler unnd ehrenvester gunstiger lieber her unnd freundt, e. gestr. am 2. augusti datirtes schreibenn hab ich enttfangenn, unnd daraus, das e. gestr. auff derselbenn gegenn mir beschehenes erbietenn, bei der kun. matt. zu Dennemarckenn etz. meinem gnedigstenn hernn, wegenn hernn Bartholomei Tinnappels seligers nachgelassener widtwenn, underthenigste befurderung angewendett, auch erhaltenn, das gemelter widtwenn vonn ihrer kun. matt. eine havenn in Ißlandt gnediglich vorguntt unnd nachgegebenn worden, dienstlich unnd gantz gernn vormercktt, dafur ich dann e. gestr. nicht alleinn gedachter widtwen wegenn, sundernn auch vor meine personn geburlichenn fleissigenn danck hiemitt sage, was aber anlangtt, das sich vielgeregte widtwe erkundigenn solte, welche havenn ihr gelegenn unnd sunst inn ander wege nichtt vorsagt sein mugtenn, weis ich micht zuerinnernn, das mir vielgemelte widtwe sampt ihrer freunttschafft, denen die Islandische haven kundig, hiebevornn beide schrifftlich unnd muntlich berichtett, das die inn meiner hiebevorn e. gestr. ubergebenenn supplicationn namhafft nemlich der Adnervörde, Tolckevörde unnd Patrisvörde, dieser zeitt noch nicht besiegeltt werdenn, auch keimants vorpfacht oder versprochen seinn sollenn, daruff ich auch gedachter widtwenn wegenn, gemelte havenn, auff ihr begernn, der kun. matt. underthenigst furgeschlagenn, derwegenn gelangt ann e. gestr. mein gantz dienstlich fleissig bittenn, nachdemmale hochstgedachte kun. matt. vielgeregter widtwenn eine havenn gnedigst zugelassen, die auch vonn ihr gebettene unnd vonn mir furgeschlagene havenn, dieser zeitt in ander wege, unsers wissens, nicht vorsagtt, e. gestr. wolle mir doch mitt kurtzenn worttenn zu ihrer gelegenheitt schrifftlich oder muntlich zuvorstendigenn unbeschwertt seinn, ob nichtt offtgemelte widtwe vorgesatzter havenn sich zuerfreuwen habenn, unnd daruff die begnadung ihr leben lang oder sunsten ein zeitt vonn jharenn, zurichtenn sein muge, e. gestr. gunstige anttwortt, wes disfals geschehen mag, unnd vonn der kun. matt. gnedigst nachgegebenn wirtt, zum furderlichstenn abermals gantz dienstlich bittendt. Datum am 4. augusti anno etc. 67.

E. gestr. w.

Johann Brokes