Copie.

Wy Borcherdt Hemelinck, Thomas Haverkamp, unnd Berndt Kolsenberg, radtmanne tho Bremenn, weren dar jegenwardich an unde aver, datt Luder Wedeman, Johan Reynekenn, Luder Meyer, Hinrick Pundt, Martenn Lösekanne unnd Hinrick Oßnabrugge, sambt unnd sonderlick apenbar vor unns thostundenn sedenn unnd bekandenn, wowoll se mit schipper Berndt Losekanne, partt unnd dele an synen schepe hedden, unde mederederenn werenn, dat se doch nicht anders dan alse andere slichte boßlude, de noch partt edder deill an den schepen plegen tho hebbenn, umme eine bonoemede hüre, sick tho deme schippere, mit ohme tho segelen, verplichtett heden, verplichteden sick ock hiermede vor uns in krafft dusses breves, so lange tho düren alse se ohre masschup mitt einander holden, unnd willenn demenha nicht anders ohre schepes werck doenn, watt ohnen geboere tho donde, unnd andere boßlude vann rechtes wegenn tho donde schuldich syn, sick vor frame schepes kindere holdenn, deme schippere gehorsam unnd willich syn, synenn bevell truwelick uthrichtenn, nicht darjegenn seggenn, ock nicht antehenn dat se mederedere syn, sick darup tho dregenn. Sonder idt schole Berndt Losekanne de schipper, alleine unnd ahne se, in dem gantzenn schepe, fullenkamene regimentt unnd bevell hebbenn, wo ein schipper aver syne schepes kindere billick hebbenn schall unnd tho hebbenn plecht. Unnd wor einer edder mehr under ohnen weren, de deßfalß muyterie anrichtenn, dem schipper nenen gehorsam leistenn, edder nicht doen wolden, watt einen boßmanne (einen jedern nha syner geboer) thostunde unnd egede, alse se doch nicht hapenn, dat einer under ohnenn sick des understan scholde, so schole de schipper gantze vollenkamene macht hebbenn, ungeachtett syner rederschup, denn edder desulvenn, alse einenn andernn schlichtenn boßman endtlick tho vorlöevenn, affthosettenn, andere anthonemenn, wo ohme dat bohage unnd gesellig sy, darinne de andern ohme nichtes inredenn edder verhindernn, sonder byplichtenn und thofallen willenn unnd scholen.^a Unnd offt sick einigen twist manck ohnen erhove, umme watterley sake idt were, dat schal by dem schipper stahn, se daraver tho vordragenn, unnd se scholen ohme darinne gehör gevenn. Unnd allent wat se in Ißlandt kopenn, fangenn, edder fordeill don werdenn, dat schole alle in gemeine buthe gahn, unnd nemant wes sundriges darvan upstekenn. Se willenn ock alle sambtlich, tho profyte ohrer marschup, ein jeder na synem vermogenn, nha vordeile gahnn stahn, unnd trachten, nicht anders dan offt ein jeder den vordeill vor sick alleine hebbenn scholde. Alle de wahre de in Ißlandt in idt schip gebracht werdt, desulve schall de schipper edder syne volmechtige ock alle wedderumme alhier up der Wesser, in mathen de darin gekamen, besichtigenn unnd dar wedder uth leveren. Deß schal ock nemandt van ohnen, mit jemande frömdes, so ock mede in Ißlandt segelenn mochte, einige marschuppie hebbenn edder holden, noch heimlich offt apenbar, ock mit nemande in Ißlandt edder up dem schepe kopslagenn: besondern wolde he der marschup thom bestenn an gemelten örderen, mit jemande frombdes handelen, solcket scholde mit der anderen frunde, so mede segelen, ohrem rade, wethen, willen, unnd fulborde geschehenn, unnd datsulvige denn frunden na gelegenheit tho willigen edder tho verbedenn fryg stahn. Imgelicken schole nemandt der frunde, so mede segelt, jemande van den Ißlandernn uthe dem lande fuhrenn edder fordernn, sonder dar jemandt des bogerde, de schole sick derwegen der marschup thom bestenn, mit dem schipper vordragen. Were averst sake, dat kunfftiglick gedachtem schippere Berndt Losekannenn nicht wolde gelegenn syn, mit ohrer etlicken der sy ein edder mehr, dusse marschup lenger tho holden, so schole he jeder tyt, tho welckerem jahre ohme dat gelevet, denn jennenn, de ohme nicht anstahn, upthoseggenn, ohnen ohr part, uth der marshcup tho geven, unnd anders in ohre stede thonemen, frige macht unnd gewalt hebben.^a Konden se sick aver umme denn partt, den se hebben scholdenn nicht vorlykenn, so schole de schipper twee van synen frunden, unnd de jenne, den he vorlathen will ock twee van synen frundenn, kesen, de darup erkennen, watt de schipper ohme vor synen deil uth der marschup geven schöle, dar averst de veer sick darumme nicht vorlykenn kondenn, so scholenn se mechtich wesenn, einenn unparthiegenn averman tho sick tho kesenn, unnd weme de byfelt, darby schole idt blievenn, unnd beide parthe datsulve unweigerlick annemenn. Imfalle ock jemandt van den frunden in gemein, so woll der jenigen de mit segelenn, alse de hir binnenn Bremenn blievenn bedacht unnd tho rade wurde, synen part uth der marschuppie, entwedder tho verkopen, edder nothhalvenn dat he nicht mede reden khonde einenn andern thovorsetten, und also einenn frömdenn in syne stede reden lathen, desulvige schole der marschup solckes erstlick anbedenn, de dartho vor einem andern de negeste syn schole, unnd dar solckes nicht geschege, so scholde sodane koip offte uthsathe unstede, unnd van deme, de also gekofft edder gehandelt, nein gelt edder wahre ther uthredinge gehalet noch gefordert, edder ock van deme schippern unnd frunden syn gudt nicht vorhandelt, veleweniger he upt schip sick mede tho bogeven vorstadett werdenn. Also ock schole nemandt ingeliken gestadett werdenn, sick des segelendes up dussem schepe, tho begevenn, der gestalt, dat he up ein ander schip treden, unnd in syne stede einenn andernn vorordenen unnd redenn lathenn wolde, sonder dar sick jemandt ein solckes understan wurde, demsulvigen schole men syn part uth der marschup betalenn, unnd imfalle sick de schipper mit ohme daraver nicht konde vordragenn, so scholde idt darmede geholdenn werdenn, wo baven angetagenn unnd vormeldet is, by dem puncte: offte dem schipper mit jemande dusse marschup lenger tho holden nicht gelegenn, unnd se sick dessulvigenn anpartes halven mit einander nicht kondenn vordragen, datt idt danne tho beider dele freundtschup, unnd up dem nothfall eines unparthiegenn avermannes erkentenisse stahn scholde. Offt ock jemandt synen anpart der marschuppie wolde jemande vorschenckenn, so schole doch desulvige, deme de also geschenckett, in de marschup nicht angenamenn werdenn, dan alleinn mit der sementlicke frunde gemeinenn consent, fulborde unnd willenn. Welcke vurß(chreven) puncte unnd artickell, alle unnd einenn jedern insonderheit, nicht alleinn de bovenberoerde frunde, so sick mede upt schip tho segelenn bogeven, neven dem schipper Berndte Losekannenn sulvest, sonder ock de anderen marschuppie verwandtenn, so alhier tho Bremenn syn, mit nhamenn Herman Wedeman, Johan Luderß, Christoffer Meyer, Johann Harst, Luder Losekanne, unnd seligenn Reynekenn Strotemannes, Reineken Winters, unnd Gerdt Tylebarenn nagelatene wedewenn, vermiddelst Johanne Reynckenn ohreme in sampt hier tho gebedenem vormunde, also vor unns sampt unnd sonderlich mit handttruwen einhellich bewillet, belevet, unnd angenamen hebben, sonder argelist unnd alle geferde, by ohren ehrenn, gudenn truwen, unnd gelovenn, stede, vast unnd unverbrakenn woll tho holdenn, unnd unns Borcherdt, Thomas, unnd Berndt, rathmanne upgemelt, dussen vordrach thovorsegelenn gebedenn. In mathenn wy dann ock umme solcker ohrer allersydes bede willenn unse ingesegele, tho orkonde unnd merer getuchenisse der warheit, hier under upt spatium gedruckett. Geschehenn nha christi unses levenn herenn gebordt vofftheinhundert, darnha in dem twe unnd soventigestenn jahre, den sosteinden dach des mantes aprilis.