Erbare hoch- und wolwise grotgunstige hern, i. erb. w. weten sick ane allen twivel gunstigest thobescheiden, wo dat wy mit Carsten Langwedell von wegen twier jaren hinderstelliger renthe thokamende der armen Ißlandesfarer broderschop in seligen Helmeken Wittenbargeß erve in rechtfertigung geraden, und ehnen darumb vornest in i. erb. w. nedderen gerichte boclaget hebbenn, uth orsacke dat he solck erve in de 13 jaren alse vorerst in hure 5 jar und darnaher 8 jar lanck vor ein eigendhomer bewanet unnd bosetenn, und averst darnaher am vorschenen osteren ahne entrichtunge jemande einige rente, solck erve leddich gelathenn, daruth gefahren, und in vorachtinge deß erb. hochw. hern Evert Mullerß burgermeisters gebott by peen twier hundert dalern, datsulvige erve nicht tho spolierende, jamerlichen berovet hefft, alse nomelicken twe korn prame so tho demsulvigen erve gehoren tho sampt den wulff under der pannen, einen kum effte kleinen stock up der loeven, und etlicke kuven dem bruwercke thogehorich, wech genhamen, darentbaven de trallien van den beslagen, de bencke im huse unnd dornsen, ock de pannelinge in der kocken, thogelick den gevell up den multebohnen langest der lucht her, ock de kammerdohre mit den hengen, unnd dat gantze behrschap affgebraken mit sick gefohret und wechgenommen, und also solck erve unnd guß anhe jenige vorworth effte anthoginge, leddich vorlathen und thogeslathenn, also dat Joachim Wichman alse ein mit rentener dessulvigenn erveß so verne wy in dat huß wesen wolden den Carsten Langwedell vor ideren hußslotell 2 s Lubsch hefft bethalen unnd vorrichtenn mothenn, welckeß den samenden creditorn unnd sonderlickenn der armen Ißlandesfarer broderschop, so de lesten rente in dem erve hebbenn, und so with se nicht affstan willen dat erve thom latesten entsetten mothenn, tho hogem mercklichenn schadenn uth sonderlicken mothwillenn und wrevell thogefoget heffet, so alleß ogenschinlick thobeschinende iß.

Unnd offt woll ernenter Langwedell dar jegen in wolbemelten i. erb. w. nedderen gerichte negative anthogen lathen, dat he nene eigendhomer besonderen ein hurling, und siner frouwen moder de eigendomer gewesen sy, darup ock ein hurbreff in gerichte vorgebracht, item ock dat he de prame hebbe maken laten, unnd bavenn dat noch 490 m 13 s vorbuweden und vor reparerenden geldeß, ane dat he sinen hovetstoll in gedachtem erve misset etc. So hebben doch wy incontinenti vor wolbenentem gerichte dargedhan unnd bowiset, vor erst mit sines Langwedelenn sulvest producerten furbreveß, dat he solck erve van siner seligen frouwen vader nicht mehr den 5 jar lanck so van vorleden osterenn vor 8 jaren unlangest gepasseret unnd vorflathenn wehrenn, gehuret hebben, und dat he darnaher de folgenden achte jar ein eigendhomer gewesen sick ock darvor geholdenn und nomen lathen hebbe, solckeß hebben wy bowiset mit einem vordrach breve sub dato anno etc. 70 den 28en maii twisschen Jacob Kopman und Peter Losekann dem olderen eineß gangeß halven by ernentenn Wittenborgeß erve herghande upgerichtet. Dartho ock mit einem zedell, dat bomelter Langwedell alse ein eigendhomer tho allen mahlen de 8 jaren hero vor dat erve twe marck graven geldeß vorrichtet dar he sonsten wan he ein hurlinck gewesen were 3 m hedde vorrichten mothenn, unnd darnaher thom druddenn dat he alse ein eigendhomer vor dat erve geprovet hefft.

Und nademe wy unß woll denstlickest vormodet burger und dincklude scholden solck aballegirten unseren bowiß tho rechte genoch unnd bundich, und wider darup erkant hebben, dat ernenter Langwedell ane allen middell, alse ein eigendhomen den armen Ißlandesfarer broderschop ere hinderstellige twe jar rente bothalenn, dar beneven ock by dem erve alle dat jennige so darvan baven deß hochgedachten hern burgermeisters penall gebades spoliert wehre, alse vor erhalet iß restitueren schole, so hebben dennoch burger und dincklude hindergesettet de restitution deß spolii, nicht wider dan up de der vaken gedachten broderschop twe jar rente, erkant na ludt der findinge, dat ernenter Langwedell desulvigen thobethalende schuldich, edder averst by sinem eide beduren scholle, dat he nein eigendhomer deß offt bomelten erveß gewesen sy, welckeß ernenter Langwedell in i. erb. w. geschulden, in hopeninge eines beteren boscheideß tho erlangen, welcke sake darnaher per appelationem vor i. erb. w. in fruntlicken handell vorwiset und tho commissarien de erb. und wolwisen hern Jeronimo Huegen, und hern Warmbolt Schroderen vorordenet, sint wy vor demsulvigen i. erb. w. thogehorsamen erschenen, dar sick der Langwedell mit gar ungehoreden und ungestumeden worden, jegen unß upgelacht, unnd den handell gantz affgeslagen, wo darvan i. erb. w. der erb. und wolwise her Jeronimus Huege relation dhon werth.

Und dieweilen den grothgunstige hern, wy unß gantz woll mit nichte van ehme in fruntlicken handell etweß vormodenn, alse ock vor unsere personen der armoth etweß thovorgevende nene macht hebbenn, besonderen wat unß deß van i. erb. w. thoerkant werden mach.

Also tho i. erb. w. gelanget hiemede unsere gantz denstlicke bidde, in namen und stadt ernenter armen broderschop i. erb. w. wollen den vorernenten unserenn im nedderen gerichte wolgefohrten bowiß van rechteßwegen by werden erkennenn, angesehen nemant jegen helle und klare bowiße in sinem eigen nutte sick etweß thoswerenn kan, vele weiniger dartho gelate mach werdenn, und dat he derhalven de obgedachten twe jar rente unß thobothalen, ock alle dat gespecificerte spolierte wedderumme tho erstadenn, unnd an sinen orth wedder thobringende schuldich sy, wat bolanget de broeke der 200 daler, und deß hochernenten hern burgermeisters geboet darnevenst dem vorkorteden graven gelde, darvan in der findinge meldinge geschutt, darsulvige werden i. erb. w. wol zu gedechtenisse nhamen, und dartho dhon wat i. erb. w. sulvest werth geleven, und sint demnha hirup i. erb. w. gunstige sentendtzie in anropinge i. erb. w. gerichte avericheit ampt gewerdich. Datum den 26 novembris anno etc. 73.

I. erb. w.

gutwilligere

Vorstendere der Ißlandesfarer armen broderschop.

On a separate leaflet:

Carstenn Langwedel hefft nicht meher alse anno 71 und 72 ock de etliche jar thovorn nicht meher alß 2 m Lubsch tho gravengelde uth sinem erve inn dem crammen belegen gegeven etc.