Wy borgermeistere unnd radtmanne der stadt Bremenn, bekennen unnd betugen apenbar inn dußenn breve, dat up gerichtlick erforderens schipper Johann Schullenn, Frantzen Schomakerß, Luder Brummers, Johann Antemanß unnd Arendt Belinges, vor sick unnd inn nahmen ohrer anderer matschupsfrunde, hude dato vor unnß persönlick erschenenn sijnn Eler Brede unnd Ladewich Wickboldt, ock unnse borgere, unnd hebben mit ohrenn upgerichten lifflicken fingeren gestaveder eyde tho gade eindtechtichlicken¹ bekandt unnd wahr gesecht, dat se vor dren jarenn vor sick unnd van wegen hern Carsten Stedinges unnses mede borgermeisters, Carsten Brinckmanß, Oldtman Willers, Cordt Hilmerß, Gerdt Wicherlings, Cordt Hollers, Berwardt Volmerß, unnd anderer ohrer der tydt gewesener matschupßfründe, eineß rechten bestendigen kopeß hebbenn verkofft, alle ohre der tydt der berörden matschuppie inn Hyttlandt uthstande schuldt unnd unschuldt mit sampt denn bodenn unnd bötenn (so alse thovor ohr schipper Segebade Detken, und se inn Hidtlandt gehatt unnd gebruket, unnd Segebaden Detken sampt Brun Reynerß, unsem mede radtman, Gerde Gerbaden, Hinricke Esick unnd Diricke Pestorp ock unsen borgerenn, desulvige luth eineß derwegen anno etc. 72 den 4. martii upgerichteten schynes, ohnenn denn upgemeltenn verkoperen, darbevor verkofft, unnd verlaten) denn upgedachten Johann Schullenn, Frantz Schomakere, Luder Brummern, Johann Anteman, Arende Belingen, und anderen ohren matschupßfrundenn, vor hundert unnd sostich daler, de ohnen ock tho guder genoge unnd dancke entrichtet, unnd betalet, also dat nhu se de kopere itzgemelt, alle solcke an sick gekoffte schulde, boden unnd böte, vor sick unnd ohre medevorwanten fry, unnd ungehindert möchten inforderen, und ohrer besten gelegenheit nah nutten und gebruken, daran se ock de verköpere upgemelt nicht hinderen, noch ohnen tho vorfang syn scholen noch willenn, alles ane argelist unnd gevehrde, unnd deß inn orkunde hebben wy borgermeistere unnd radtmanne upbenömpt unßer statt secret hirunder upt spatium witliken gedrucket, nach Christi unses leven hern und heylandes gebordt dusendt viffhundert, darnach im viff unnd soventtigesten jare, am veerden dage deß manteß maii etc.