Endlicke wedderbericht unnd beslütt Christoffer Meigers unnd siner consorten, contra Berent Losekann und sine adhaerentenn etc.

Erbare, hochgelerde unnd wolwise, günstige gebedende herenn. Nachdeme Berent Losekann jüngest denn 6 düsses¹, einen vast langen, ungegründtenn, unnd mit allerhande hülperedenn unnd underfindtlick erdachten fürgebenn thosamenn gesoppeldenn jegenbericht ingebracht, alles der meninge, dardorch einem langwiligenn proceß inthoförenn, unnd so woll i. ehrb. w. alse uns darmede so lange upthoholdenn, dat he middeler wile sick mit sinenn consortenn uthredenn, unde daraver er, unnd bevor i. ehrb. w. unß derwegenn im rechte geschedenn, wedder van hinnen wech makenn, unnd uns gelick wo vorgangenn jare geschehenn, ferner dorch synenn wrevell unnd notwillenn, im forfange synn, unnd entlick uns arme lüde, ock eines deles hochbedrövede elende wedewe, gantz unnd alle verderbenn, unnd nharingloß makenn möge, unnd averst unse gelegenn, unnd vermögenheit nicht is, uns inn einigenn witlofftigen proceß intholatenn, alß willenn wy hirmede i. erb. w. unsenn endtlickenn wedderbericht, unnd wo sick de van öhme mit vast gespareder warheit angetagene dinge im gründe erholdenn, körtlick ingebracht, unnd darmede de gantze sake i.erb.w. alse unser vann godt geordenter overicheidt bevalenn, unnd heim gestaldt synn latenn.

Unnd is demnah, großgunstige gebedende heren, inn warheidt ann deme, dat wy unnd unse vorfarenn de havinge inn Islandt, dar ann uns itzo vann Berende Losekann indrang, unnd affbräke geschüdt, vor 50, 60, 70, ja 80 jar besegelt, unnd darmede dermatenn berechtiget gewesenn, unnd noch, dat wy nur keine pacht, gelike andere doen möten, darvan gegevenn, sünder alleine mit entrichtinge des tollens, fry gewesenn, desulvige havinge ock mit dem breve, so wy darup vann der kön. maytt. tho Dennemarcke gehadt,² vor jedermanne, woll de ock gewesenn, bethertho vordedigett, inn matenn dann ock de schipper Berent Losekann sulvest ungefehr vor 2 edder 3 jarenn, alse he noch inn unser marschup gewesenn, einenn Hamborger schipper mit berordenn unsem hebbenden könninckliken breve, uth der sülvigen unser havinge gewiset, de sick ock thor stündt, alse öhme de breff getönet, dar uth gemaket, unnd uns wikenn mötenn, inn matenn dan je Berendt Losekanne, dar he anders noch einich christlick gewetenn hefft, nicht kan verlöchnenn etc.

Unnd offte nhu wol Berendt Lösekann sovell solckenn konninchliken breff anlanget, gernn dat olde leedt, so he nu vorm jare ock thosingen sick undersandenn, wedder halenn wolde, alse, dat de gedachte breff up de berörde unse havinge siner personn, unnd nicht unser madschup van dem koninge scholde gegevenn synn, so achtenn wy idt doch darvor, nahdeme sülcker punct vorm jare ock genochsam disputeret, unnd verandtwordet, dat derwegenn widerer vorandtwordinge nicht van nöden, sonderenn dat sick i.erb.w. uth, unnd vor sick sulvest, genochsam tho erinneren, dat i. ehrb. w. meinung, der tidt, alse i. ehrb. w. unser gantzen madtschup tho güdem, dersulvigenn vorbitschriffte ann die kon. maytt. tho Dennemarckenn medegedelet, nicht gewesenn, Berende Losekanne darmede alleine tho beforderenn, unnd uns anderenn allen unse nehringe affthosnidenn, vele weiniger, dat Berendt Losekanne de mann, so dem koninge de grote denste ertöget, dat ohre konn. maytt. syne personn dermaten angesehenn, dat se ohme de havinge allein vorschrivenn, und unß anderenn, de nhu sampt unsenn vorfahrenn inn de 80 jahr (wo gemelt) solcke havinge besegelt, darvan vorstötenn, und derenn also endtsetzet hebbenn wollenn etc.

Unnd gifft hirby Berendt Lösekann genochsam ann denn dach, wat vor einenn grundt, unnd warheit, alle synn vorgevenn (wo gernne he ock datsulvige dorch allerhandt gesochtem schin, unnd geferwede wordenn smuckenn, und tzirenn wolde) hebbe, inn deme se sick nicht gescheüwet, i. ehrb. w. vorthogevenn, dat darumme, dat wy unß einiger uthdrenginge, edder uthbitinge vann der uns versegeldenn gerechticheit des berörden ordt landes inn Ißlandt nicht tho befahrenn hebbenn scholdenn, solcke breff, unnd gerechticheit in originali by hernn Jacoben vann Boberenn gestellet etc. Dardorch i. ehrb. w. ane unse erinneringe wol bewust, wo idt umme solckenn breff eine gelegenheit, alse nomlick, dat alse Berent Losekann vann i. ehrb. w. uperlecht, solckenn breff in originali vorthobringenn, he densulvigenn uns, unnd der madschup tho schaden unnd nadel, trötziger, modtwilliger, unnd bößliker wyse tho retenn, unnd de stucke van i. ehrb. w. secretario uth sinem huse gehalet, unnd tho der meininge, herenn Jacoben van Boberenn, alse domalß gewesenen kemmener behandiget, desulvige, beth up widerenn i. ehrb. w. bescheidt, unnd vorbehaltene straffe, wedder ermelten Lösekan, dat he uns, unnd der gantzen madschup tho nahdel, denn gedachten unsenn könninchlikenn breff, darmede wy uns billich inn verfallender not tho wehrenn, unnd unse erlangende gerechtigheit inn Islandt tho vorbiddenn, und tho vordedigenn gehatt, inn stücken gerethtenn, alse ock dat konnincklike segel darvann gebraken hedde, by sick tho beholdenn etc. und hefft sick Lösekann solcker herlikenn depositionn, unnd stellinge des gedachtenn breves, unnd originalß, nicht hoch tho rumenn, sonderenn sehen velemehr i. erb. w. daruth genochsam, mit wat gefarweden wördenn, unnd unwarhafftigenn angevende, he de sake gernn smuckenn und verdreyen wolde etc.³

Also wert ock vann Berende Losekanne, mit vast gespareder warheit, alleine tho besmuckinge öhrer sake, unnd i. ehrb. w. intobildenn, also offt se sick dersulvigen sententien, und geschede dermatenn gemethe verholdenn, dat dar se idt gelick nicht schuldich gewesenn, se dannoch umme fredes willenn, sick nicht alleine unser havinge, sonderenn ock der kopmanschap mit unsenn ludenn (allein wat se dessenn vermöge des landeß gebruck, wedder öhrenn willenn doen moten) gentzlick entholdenn, sick ock sünstenn jegenn unß, unangesehen wy se mit büchsen, spetenn, brennenden lüntenn, alse rasende wölffe dermaten gespenckett, dat, wo nicht ick Christoffer Meiger, solckes etliker maten gestillet, mordt, dodtslach, unnd ander unrath lichtlick dar uth ervolget), mit eten unnd drincken dermaten frundtlick endtfangen und geholden, alse getruwen mede borgeren thodonde geböret etc. und inn sümma de eintfoldige unnd frame schape sin willenn, die nahmals kein water bedrövet edder gelömet etc. vorgegevenn etc.

Dar doch unbeneintlick wahr, dat alse wy in Ißlandt kamen, des gedachtenn Lösekans anhanck, so ock inn de veerde wekenn vor uns inn Ißlandt gewesenn, evenn inn der sulvigenn unser havinge, derenn he sick entholdenn hebbenn wil, ock rechts, und billicheit wegenn entholdenn hebbenn scholde, mit einem bote, ungefehr vann 6 edder 8 lastenn, gelegenn, unnd also unse havinge vorlengest occuperett gehat, darher denn unse volck, dewile öhrenn solckes baven i. erb. w. sententz, unnd rechtlikenn beschedt,⁴ de facto und modtwilliger wyse bejegenet, etwas ungedüldich geworden, averst doch öhnenn kein leidt thogeföget etc.

Dat averst darjegenn uns vann gedachtenn unsen wedderdeden grote frundtschap ertöget sin scholde, hebbenn i. ehrb. w. lichtlick by sick sulvest affthometen, wat vor fründtschap edder gude wille, und vann denen, so uns nah alle unser nahringe, und tidtliker wolfart gestandenn, unnd getrachtet, wedderfahrenn köne, dann offt se woll geschehenn laten, dat wy unse koplüde, so tho unser havinge gehörenn, unß ock noch mit schülden vorhafftet gewesenn, des ordes, dar se gelegenn gesocht, so hebbenn se doch sülckes, gelick anderenn nicht unbillich lidenn mötenn, sintemalen uns ein solckes thodonde, by allenn anderenn havenn fry gestandenn, so wetenn wy unß ock nicht tho erinnerenn, wat vor grote ehre uns vann ohnen mit eten, edder drincken beweiset, allein, dat wol einer uth unsem schepe (wowoll ane unserm weten unnd willen) by öhnenn inn ohrem schepe gewesenn unnd mit ohnen mach gegeten und gedrünckenn hebbenn etc.

Unnd iß ferner unlöchbar wahr, ja ock mit Berendt Losekanß eigenenn schrifftenn, unnd der madschüp schüldtböke erwißlick, dat he nicht alleine mit etliken, sonderenn ock (bavenn twe edder dre nicht uth genamen) allenn unsenn koplüdenn, so uns mit schülden unnd sunst verhafftet synn, und by unse havinge gehörenn, sines gefallens gehandelt unnd gekopslaget, unnd uns darmede ann die 5 edder 6 hündert guldenn, an unser madschüp schadenn thogeföget, alles wedder i. ehrb. w. gegevenenn rechtlikenn beschede, ock sünst recht, unnd alle billicheit etc.

Unnd offt he nu wol solckes, nahdeme he idt nicht vorlöchnenn kann, sondernn mehr, alse thovell avertüget, thom dele darmede, dat he, vermöge des Ißlandeschenn^a gebrükes, dat wannehr de wahre vann dem vagede gesettet, men alsedann, ock wedder sinem willenn, de wahre denn buren, jegenn andere ohre rede whare, by straffe der overicheidt, vorkopenn, und henn doen moste etc. Thom deel ock, dat he unse lude, dar he je mit dennsulvigenn gekopslaget, nicht gekandt hebbe, unnd also unwetent mit ohnen gehandelt etc.

Synn wy öhme solckeß angetagenen gebrukes mit nichtenn gestendich, wert öhne ock mit nemande, so der segelation inn Ißlandt^b gebrukenn, bewisen könnenn, verwundert uns derwegen ock nicht weinich, dat he i. ehrb. w. solcke ungerymede dinge vorgevenn darff, unnd dat he mit unsen koplüden tho handelenn sick erstlick verweigert unnd affgeslagenn hebbenn, averst dartho van den bürenn, vermöge up angetagenen verneinten, unnd erdichtedenn gebruckes, wedder sinenn willenn gedrungen worden, dar doch velemehr wahr, dat he sick jegenn unse koplüde, alse he eer, alse wy inn Ißlandt^b kommen unnd wy etwas lange uthgeblevenn, mit erdichtedem vorgevende hörenn, unnd vornemenn latenn, dat wy vann den Engelschenn in grundt geschatenn, und nicht kamen wördenn, darmede he se also mit öhme tho handelenn, unnd tho kopenn, bewegenn möchte etc.

Also is ock nicht alleine frembdt, sonderenn vast lecherlich tho hörenn, dat Berendt Lösekann vorgewendet, dat he unse koplude, darmede he wedder i. erb. w. beschedt unnd sententienn gehandelt, unnd gekopslaget, nicht gekennet hebbe, dar he doch mit öhnenn by unser madschüp ann de 30 jare gehandelt unnd solcke havinge besegelt etc.

Dat ock sünstenn van Münstermans⁵ havinge angetaget, werdt he nicht dar doen können, dat de angetagene schippere, ohme inn sine havinge gelopen, vele weiniger mit ohme tho gelike darin gelegenn, unnd mit sinen lüdenn gekopslaget, sonderenn se wit van dersulvigenn, in anderenn havingen tho liggenn plegenn, wo dann ock Münsterman sülvest, uns datt he noch hudiges dages evenn dersulvige havinge, de synn vader selige vorlangenn, und velenn jarenn besegelt, noch ane jemandes insparre edder vorhinderinge, gebruke, moth seggenn und bekennen, ane dat idt ock sünst eine vele andere gelegenheit mit Munstermans unnd unser havinge hefft, sintemalen van Munstermans havinge, de pachte vann der unsen averst nichts baven den gewantliken tollen, gegevenn wordenn etc.

Unnd erret edder helpet hir by ock Lösekannen nichts, dat angetagenn, alse scholde numehr dat landt ein frie landt synn, dan offt wol de pachte der havingen affgeschaffet, so hefft doch ein jede syne gewöntlike havinge, de he süßlange vor 20, 30, unnd mehr jaren gehat unnd besegelt, noch beth up den hüdigenn dach, ane jemandes hinderinge, nah wo vor, tho gebrükenn, beholdenn etc.

Demnah dan ock Lösekann, sampt sinen adhaerenten, mit solcken öhrem gesochtene gehelpe, nicht können edder mögenn unß an unser vor 80 jarenn, van unß unnd unsen vorfahrenn, besegelder havinge unnd derenn thobehoringe unnd gerechticheit, mit fogen hinderenn, beindrechtigenn, vele weiniger uns tho vorfange sick dar in steckenn etc.

So vele ock lestlick denn ossemundt, unde darher so hoch upgemotzte iniurienn anlanget, bin ick, Christoffer Meiger, nicht gemenet gewesenn, jemande der halven tho iniuryerenn, sonderen hebbe slichtes tho wetenn begeret, dewile wy de tünne osemündes nicht in der bodenn gefünden, offt dann desulvige mit wetenn unnd willenn Berendt Losekanß darüth unnd worhenn desülvige gekamen, by welcker frage ick idt ock nahmalenn, ane einich iniuryerendt jemandes will bewendenn unnd Berende Losekanne sick darüp nochmalenn mit ja edder nein, tho erkleren, rechtes wegenn anthoholdenn, denstlick gebedenn hebbenn etc.

Unnd dewile nhu grothgunstige gebetende heren i. ehrb. w. uth dussem allem günstichlick thovernemen, dat wy und unse vorfharenn, de mehrgedachte havinge an de 80 jarlang besegelt, und ane einige pachte gebrücket unnd ingehat, dat de ock vann Berende Losekan tho retene breff nicht öhme, Berende Losekan, sonderen unser madschup gnedichst gegevenn unnd medegedelet. Darher wy dan ock billick wedder vann öhme, alse de vorlangst uth unser madschup geschedenn, noch jemande an solcker unser havinge, unnd deren gerechticheit tho beindrechtigenn gewesenn, unnd dannoch Berendt Lösekann so wol wedder angeregenden konnichlikenn breff, alse ock i. ehrb. w. gegevene sententz unnd ordell, uns ann solcker unser havinge, unnd gerechticheit dersülvigen modtwillichlick, unnd de facto beindrechtiget, mit unsenn koplüden tho grotenn vorfange unnd affbroke unser nehringe gehandelt, unnd unß armen lüden dardorch grotenn schadenn und nahdell tho geföget etc.

Alß biddenn wy hochstes flites denst, unnd demödichlick, i. ehrb. w. unnß, alse mehres deelß armen unnd ane dat hochbedroveden, unnd bekümmerden wedewen, schuniges gebörlikes rechtens, wedder up unnd mehrgedachten Berende Losekann unnd sine adherenten gunstichlick verhelpenn, se mit gebördendem ernste dar thenn holdenn, uns vor den an unser havinge und koplüdenn inn Islandt, wedder i. ehrb. w. beschede unnd ordel, beschenen modtwilligen indrang unnd thogefögeden schadenn, geborlike kar, wandel, unnd affdracht tho donde, unnd sick henforder solcker unnd dergelickenn modtwilligenn und frevendtliken beindrechtinge ann unser havinge unnd koplude, gentzlicken thoentholdenn, darmede wy also by unser hergebrachtenn gerechticheit gehanhavet, unnd uns armenn borgerenn, und wedewenn, dat brodt nicht uth dem munde genhamen werden möchte etc.

Ferner ock Berende Losekann sick des osemundes halvenn, inn matenn vorhen gebedenn, thoerklerenn, mit rechte anholden willenn etc.

Aver dat alles, unnd jedes i. ehrb. w. hochadelick milt ridderlick ampt, umme mededelinge geborlikes rechtens, demödichlick anropende etc.

I. ehrb. w.

Gehorsame borger und borgersche

Christoffer Meiger unnd sine consorten.