Erbare unnd wolwise grotgunstige gebedende leve herrnn, negest erbedung miner gantzbereidtwilligenn unnd unvordratenenn dienste, khann ich miner hogenn nottrufft nach hiemitt ungeclagt nicht lathen, wo dath ick iuwenn erb. w. burger Roloff Gerdes mitt synn gude schip ein hollich vann sostich lastenn unnd 7 jar alt wesennde, vann der Elve, na Ißlandt tho segelennde vorfrachteth hebbenn unnd ehr sich domalß vorredeth, datt he teytlich genoch mitt sin gude schip up die Elve kamenn, aldar ick ehm so fele Holsteinische unnd Dennemersche guder inschepenn scholde, so fele dat gude schip foeren moege. Unnd offt ich mi mi[!] well dartho eigentlich vorlatenn unnd sollich minenn rederen thom Kile unnd andern thogeschrevenn die mi ock tho fulenbringung miner reyße gelt thogesandt, darmitt ich die wahr so darhen diennstlich bitiden kopenn, unnd also mine angefangene reyße fullenenden mochte, so hebbe ich albereitt ein stadtliche summa geldes, ahn Luneborger behr, mell, laken, lennewantt unnd andernn so mi darhenne dienlich bestedigtt. Wahnn ich denn nun i. erb. w. burger Roleff Gerdes mitt sin gude schip alhie voranndenn geweßenn, darmitt he mitt sinem gudenn schepe fordich unnd sine angenhamene reyße fullenfoerenn mochte, so khame ich doch inerfehrung, dat he sich in dehme achter unnd weß he sich also vorredeth, nicht nach thokhamen willenß sy. Wahnn mi denn alher einn grote summe geldts albereitt darup gelopen unnd noch donhlichs fele mehr darup ghan wertt unnd also wegenn siner nicht holdung in mercklichen groten schadenn gefuertt werdenn schalde, alß hebben i. erb. w. alß die hochverstendigen thoerachtenn, dath ich sollichenn schadenn, by i. erb. w. burger Roleff Gerdes wurde soekenn, unnd ehme unnd sin schip ahn watt enden und ordenn ich dat selvige averkhamen wurde, antotasten tho behemmen unnd so lange vorwaren lethe biß ich minen schadenn, darhen ich seiner nicht holdung halvenn geradenn, genochsamb ergetzeth wehre. Unnd darmitt gedachte Roleff Gerdes sich nicht besorgenn dorffe dath he andere guder alß Holsteinische unnd Dennemarkische guder innehmen und foeren scholle, so erbede ich mi hirvor genochsame burgenn alß Gerdt Aldach, Michell Betkenn, Berent Peper unnd Hanß Holste hirvor tho stollen die samptlich davor geholdenn sinn schollen, dat he keine ander guder alß Dennermarcksche unnd Holsteinische guder foeren und desfals ahnne schaden blivenn. Belangt derwegen hirmitt ahnn iuwen erb. w., nun gantzdienstlich biddent diesulvigenn wollenn ehren burger Roleff Gerdes mitt ernste darhenne halden, dat he sine angenhamene unnd mitt einem gadespenning bestedigte reyße wie unnß abrede geweßenn vollenendigen moege, alß denn will ich ehnn, weß ich ehme tho stracht? gelaveth uprichtig erleggen, unnd bethelen, inn dehme geschutt die billicheitt gemethe, unnd ich bin ide umb iuwen erb. w. henwedderumb thoverdienenn ider gantzwilligen unnd geflissenn unnd weß ich im dessen tho iuwen erb. w. schall hebbenn thovorsehenn, des bidde ich i. erb. w. richtige andtwertt darnha ich mi tho achten. Datum Hamborch ahm 19 martii anno 77.

E. erb. willige

Jurgen Tymme