Wy, Christoffer Wydekindt, der rechten doctor, und syndicus Johan Holste, und Berendt Kolstenberch, radtmanne und verordente richter, und bystuten des keyserlichen neddergerichts tho Bremen, bekennen und betugen apenbar in dußem breve, dat hude dato vor unß erscheinen syn Erick Arendeß uth Ißlandt an einem, und Heine Ratke anderß deelß,und hefft de itzgemelte Erich Arendeß sick aver Heinen Ratken beklagett, wo dat he ohme hirbevor alhir tho Bremen viffhundert Ißlander fisches vor eine genante summen, der gestalde verköfft, dat he ohme derteinhundert in Ißlandt, up de koepstede leveren wolde, daruth he viffhundert stucen gefallen nah uthlesten und endfangen scholde, mit bede ohne Heine Ratke rechtlick thobefragen, dewyle ohme de fische also in Ißlandt up de koepstede geleverde he, ock darvan de 500 endfangen, wohr dan de overige fische gebleven?¹ Thom anderen sick aver ohne, etlicher iniurien und scheldtworde halven, de he aver ohne scholde hebben uthgegathen, alße oder van wegen eineß tho Hamborch mit ohme gemakeden klanestrichte? geholdenen kopeß, bekleget, etc., und dat darup Heine Ratke soveel den ersten punct anlanget sick gerichtlick edderet, und bekennet, dat alße he de 500 fische endfangen, einen guden windt bekamen, he alsobalde darvan geßegelt, und de overige fische in Ißlandt up der koepstede ligen laten, soveel averst de angetagene iniurien anlangete sick jegen unß apentlick edderet, dat he van dem gedachten Ericke Arendeß anderß nicht, dan einen ehrlichen frumen, und uprichtigen gesellen thoseggen muße, darby idt ock also de gedachte Erick Arendeß bewenden alse ock sunst syne klage von wegen deß koephandelß so tho Hamborch gedrepend syn scholde, gewillich fallen laten und also damede de parte berörden puncte halven verdragen worden. Up welckenß alleß dan de bemelte Erick Arendes unß denstlick ersucht, und gebeden, ohme deßen weß also van bemelten Henrick Ratken vor unß bekennet, und thogestanden, einen gloffwerdigen schyn under unsen pitscheren, gunstichlick mede tho deelen. Was wy dan der warheit tucheniße thogeven sonderlick so wy danue ersocht unß schuldig erkennen, und de berörde klage, frage, bekenteniße und verdrach in maten vorschreven also vor unß geschehen und ergangen alß certificeren wy damen hirmede in macht deßes breveß den wy verordente richter und bystutene deß keys. neddergerichts upgemeldt mit unsen gewonlichen pitscheren witlick bevestigen. Gegeven nach Christi etc. 1578 am ersten dage des manteß martii.

Certification des niddergerichts etc. in causa Erick Arendeß contra Heinen Ratken etc.