Anno etc. 80 den 1. septembris, nhamiddages umme 4. schlegen ungefehr hefft Joachim Kollinck tho Bremen in Harmen Brockmans behusinge under andern hinc inde vorgefallenen reden vermeldett, datt he hirbevoren van ungefehr in Roleff Gerdeßen sines schwagers huse anhe deßulvigen vorweten einen breff, darvan jetzendt Heine Ratken allerhandt geschrei errogede, gefunden tho sick genhamen unnd gebraken, und densulvigen (will ohme Heine nichtt allene tho Bremen, sondern ock in Ißlandt allerlei wedderwillen ertögett, und nach sinem uthersten vordarve gestanden) dem hovetmanne in Ißlandt, alß des midt ehrenrorigen worden, darinne gedachtt where uth sinen egenen vornhemen ock wedder sines schwagers Roleff Gerdeßen weten und willen, uth billichen iver fosentarett und behendigett, derwegen datt vorgemelten sinem schwager midt unfogen und gesparter warheitt thogemeten wurde etc. Welches mi alßo neven den getugen Roleff Gerdeßen darsulvest tho jegen ingedenck tho sinde ermanet, und im fall der not daraver einen penenschin mitthodeilen begheret. Geschen im jhare und dage wo vorgemeldt in bisin der ersamen Michael Rascken und Hinrick Berman als erforderten getugenn.

Und will ick Conradus Mimehsen van pawest und keyserlicher macht apenbarer ock ahn den hochlofflicken keyserlichen cammergericht approberter notarius bevorgemelter relation und bekantnuß neven der getugen gewest, hebbe ick daraver jegenwardichen schin upgerichtet doch widere extension in eventen vorbohaldich.

C. M. B.