Durchleuchtigster, großmechtigster kuning, e. kun. matt. sein unsere underthenigste, bereitwilligste dienste, sonders fleißes zuvoran bereit, gnedigster her, wes sich weilandt unsers burgers schiffer Johann Munstermans nachgelaßene witwe, und kindere, sambt andernn mit rehdern, unnd schiffsfreundenn, sich uber Joachim Kolling, zu Jever wonhafftich, vast beschwerlich thuen beclagenn, unnd bittenn, daß habenn e. kun. matt. auß ingelegter derselbenn supplication schrifft,¹ gnedigst unnd nach der lenge zu ersehende etc.

Wann wir dann nun unnß zuberichten, daß die unsere die hafe Kummerwage unnd Neßewage, nicht alleine auff e. kun. matt. auff unsere undterthenigste intercession ihnenn mitgetheilte begnadigungh, sondernn auch bey lebzeitt e. kun. matt. hochloblichstenn vorfahrenn, auff gleiche kunigliche begnadigungh, solche havenn, vast undenckliche jahr hero, mit ihrenn schiffen, und deß ortts allerhandt dienlichenn kaufmans wahrenn besuchtt, versehenn, unnd vorsorgett. Sie auch bey solcher schiffarth, nun etzliche jahr her, in furtrefflichen schadenn, ungesteumenn wetters, unnd waßers halber gerahtenn, biß daß sie leider daruber endtlich in verlust schiffs, guter, unnd ihrer geliebtenn ehemänner, unnd also dadurch in hochstenn bedruck, unnd elend gesatzt wurdenn. Gleichwoll aber die vast trostlose witwen und waisenn, daranne jeh unnd allemahll nichtzuweiniger gewesenn, daß bemelte hafe mit allerhandt commoditet, unnd des ortts nottrufftigenn kauffmans wahren, nach wie vorhin, nottrufftiglich vorsehen, unnd versorget. Unnd daher unns gantz unnd alle keinenn zweiffell machenn, da e. kun. matt. solcher gelegenheit dero zeit, alß vonn beclagtem Jeverischen Joachim Kolling, auff seinem e. kun. matt. ungleichenn beigebrachten bericht,² als solten die unter ermelter haver daran doch alle ihre nahrung gelegen sich gantzlich end[.]eußen dieselbigen auch ferner zubesuchen nicht geneigt sein, e. kun. sonderbare begnadigungh auff seine personn mehrberurte hafe Kummerwage halber außgebracht,³ unnd erhaltenn, bestendiglich berichtet gewesenn, es worden e. kun. matt. solchem des Kollings unchristlichem suchenn keines weges beyfall gegebenn, noch gebilliget, sondern vielmehr mit so hochbetrubtenn wittwenn unnd waisenn, neben unns ein christlich mitleidenn getragenn, unnd demnach sie bey dabevor erlangter e. kun. matt. gnedigster begnadigung gnedigst geschutzet, unnd gehanthabet habenn.

Alß bitten wir undterthenigst, e. kun. matt. gnedigst geruhen, die unsere bey offt, unnd mehrberurter hafe Kummerwage, unnd Neßewage gnedigst zuerhaltenn, unnd dagegen die vonn obgedachtem Jeverschen bey euwrer kun. matt. suppressa veritate außgebrachte begnadigungh, gnedig zucassieren, unnd ihme darauff mit gnedigstem ernste undtersagenn zulaßenn, sich solcher hafe gentzlich zuenthaltenn, damit die unsern verlaßene arme trostlose witwen, und waisenn, so öhne daß durch denn abfall ihrer ehemänner zum hogstenn betrubt, ferner nicht betrubet, beschweret, noch bemuhet, unnd zum bettelstab entlich verweiset werdenn mugen etc.

Daß getrostenn zu e. kun. matt. wir unns underthenigst, unnd seint es umb e. kun. matt. (die wir hiemit inn denn gnadenreichenn schutz, unnd schirm des almechtigenn inn frolicher leibs gesuntheit, kuniglichem wolstande, unnd fridfertiger regierung lange zuerhaltenn, gantz treuwlich thuenn empffelenn) undterthenigstes fleißes zuvordienenn gantzwillig. Datum undter unser stadt secret denn 3 decembris^a anno etc. 80.

E. kun. matt.

undterthenigste, und bereitwilligste

Burgermeistere, unnd raht der stadt Bremen.