Ernveste, hochgelarte, hoch- und wolwise, i. erb. hw. sin unsere inn burgerlichem gehorsamb, underdenige denste thovornn, grotgunstige herrn, dewile unser unvormidtliche notturfft erfurdertt, diße unsere gelegenheit, i. erb. hochw. underdenig thoclagende, als wollen wi uns beharlich getrostenn, i. erb. hochw. alse unsere hohe overicheitt, werde uth hochdragendem andsett, uns hirinne gunstige hulffe, unnd befurderung wedderfaren lathenn, unnd is nu i. erb. hochw. und menniglichen bekandt, datt uns samenden mittburgern, schiepernn, unnd kopludenn, de wi der fardt up de haven in Ißlanndt gebrukenn, eine tidtlang hero, nicht alleine dorch grodt storm, unnd ander bi solcher navigation tho velligem ungelucke, sonder ock wegen allerhandt ungewonlicher beschwerlicher beeindrechtigungh, die insonderheitt so woll die kuniglichen maytt. zu Dennemarcken etc. unsers gnedigsten hern, underthanenn darsulvest in Ißlandt geseten, als uns vonn den Ongelischen wedderfarett, wo denn ock die ingesetene in Ißlandt sulvest daraver thom hogsten clagenn, so ferne kein insehen hirin geschehenn scholde, datt als dann se sulvest tho grunde vordervenn, unnd wi ock unsere gewönliche navigation up Ißlanndt uth hochdrengender nodth instellenn mostenn, dann gnugsamb wahr, unnd erwißlich, dat die Engelischen vonn jharenn tho jharenn sich mith ehrenn schepenn unnd volcke ann underschiedliche ortter, unnd haven in Ißlanndt sterckenn, und dem landtrechte darsulvest tho weddern umb datt gantze landt her luggerie? tho der tidt am meistenn gebrukenn, wann de fischfanng anghan, unnd am meisten vorhandenn, welchs dem ganntzen lande tho unvorwindtlichem schadenn, und nadeil gerekett.

Inmathenn dann gnugsamb kundtbar ist, datt die Engelischen sonderbare grothe bothe dartho angerichtet, unnd gebuwett hebbenn, datt se darmith with vonn dem lande, und ofer aff in die sehe lopenn, unnd den kuniglichenn underdhanen inn Ißlandt thom groten vorfange, dewile desulvigenn mit ehrenn kleinenn schepenn so widt nicht in die sehe lopen konnenn, denn schonesten fisch wegfangenn, und die kleine ardt fisches, als die ruchenn, butte, die grotenn hokell, steinbiter, und handtfische, nicht alleine ganntz vornichtenn, sondern erbarmlicher wise in stucken howenn, unnd averbordt werpenn, unnd also de gave gotts schendlich mißbruckenn, ock sonnst allerhandt list dartho vorsokenn, datt se denn visch vant lanndt asenn mogen, darmitt die kuniglichenn underdhanen, de nicht gar witth mit ahrenn kleinenn schepenn vom lande afffaren konnen, ann ehrem visch fange so veel mehr mogen vorhindertt werden, unnd sie alleine die denn gantzen strom belodenn, unnd besettenn, des fisches alleine mechtig sin mogenn.

Insonderheitt averst hebben sick deßes twe Engelische alse Ethmundt Lock, und Runeke Torloßen, vor andernn mit hogster vormetenheitt underfangenn, dann alse desulvigenn in vorschienenn jahre vor sudenn in die Dureshave mith ehren schepenn, unnd volcke anquemen, hebbenn se ehre lode in die 1800 direr aver de sehe, wo solches die Ißlander gnugsamb betugenn, ann de sede dar de fisch sinenn dorchganck hedde, gesettet, alles dem landtrechte, unnd dem wolhergebrachten gebruke des ordes tho weddernn, des sick ock de Ißlander sulvest wegen des kuniglichen publicirten mandats enthaltenn, unnd in der wehr tidt keine lode, oder settwergk settenn mothenn, dar doch den de visch dermaten is vornelett, datt wo woll vor der Engelischenn ankumpst die Ißlander der ortts einen temelikenn fang bekamenn, herna dose sin mith ehrenn schepen angelanget, nichtt hebbenn fangen konnenn, daraver den de kuniglichen underdahnen an ehren narung dermathen sin behindertt, datt se uth mangell der fische, welchs (wo bekant) ehre einige narung ist, na der Tureshave mitt solchem ihver gelopenn, datt se ock beth inth hale liff int water gelopenn, und de kabbelaw koppe, de [die Enge]lischen hupig innth water geschmetenn, tho ehr[e] notturfft uth dem water haleden, und bedrupt(?) twar datsulvige ungelucke vas[t] de gantze gemeine in Ißlanndt, dewile die meistenn sich na demsulven suiderdeill wegenn des fischfangs jharlich begebenn, inmathenn ock uns, und unsernn mitburgernn, de up suiden na Ißlanndt segelenn solchs tho schinbarem schadenn gerekentt, dann als wi im vorschienenn sommer dißes 92 jhars darsulvest mit unsern schepenn, und warhen anquemenn, unnd befundenn, dat dorch der Engelische eigentliche vorbadene handlung die fisch des ortts avermal weggenhamenn sin wi woll vorhebbens gewesenn, mitt frischem water unns thobesorgenn, unnd unser reise wedder tho huß thonhemen, dewile wi nu etzliche jhar veel gudes, unnd warhenn inth lanndt gefordt, und weinig fisch dargegenn gekamenn, averst dewile de Ißlannder so sehre sich ehrer notth beclagedenn, hebbenn wi uth christlichem mitlidende unser meel unnd warhen ehnen wedderumb avergelaten, unnd mehresdeils ehnen up guden gelovenn vorborgett, wi averst wo i. erb. hochw. bekanndt sin vast mitt leddigenn schepenn wedder tho rugge gekamenn, wo denn ock de Engelischenn sich hiran nicht ersedigenn lathenn, sonder wann se unser schepe mechtig werdenn, desulvigen fiendtlich anfallenn, plundern, und roven, wo solchs etliche unser schipper, unnd mitt borger mit ehrem hogsten schadenn erfarenn, de dermathen sin spoliert, datt se ock nene scho aver de vothe beholden, thodeme so is ock genochsamb bekandt, datt die Engelischen nicht mitt einem sondern mitt 10, 20 unnd mehr schepenn vor, unnd in die Isevorde have lopenn, unnd darsulvest ehre vischerienn handterung, unnd kopmanschop frevendtlicher wise drivenn, des gelikenn ock umb denn jokell, twischenn den [ha]fenn Stappenn, unnd Reff ehre koplude tho 3 [..] und mehren in denn wersteden an landt settenn, unnd ehre kopstede denn ganntzen sommer aver dar jharlich holden, ungeachtet dat wi mitt kuniglichen paßbrieven des ortts gnedigst begnadett, alles tho unserm vast underglichenn schadenn, unnd nadeill, dardorch wi twar wen hirinne keine enderung scholde vorgenhamen werden, in utersten vorderff geradenn, ock vonn dißer navigation dar dennoch diße loffliche stadt aver 100 und mehr jhare ehre frie segelatie hengehadt, genntzlich affgeschregkett, unnd affgewisenn werdenn.

Wann nhun grosgunstige herrnn, diß alles in warheitt also geschaffenn, unnd uns in dißer unser beschwerung i. erb. hochw. grotgunstige assistentz hochnodig, de wi ock hirmitt underdenig anropenn, als ist unser underdenige bede, i. erb. hw. wolle die gelegenheitt dißer sake gunstig behertzigenn, unnd diße unsere beschwerung der kuniglichenn maitt. tho Dennemarcken etc. unsers gnedigstenn herrnn, mit einer flitigenn vorschrifft gelangenn lathen, nicht twifelende, diewile die kuniglichenn underdahnenn in Ißlanndt uth hochdrengender noth durch einenn abgesanthenn, solchs der kuniglichen maytt. vorgedragenn, idt werde ock die kunigl. maytt. hirin ein gnedig insehen dhon, unnd solchenn frevell, unnd avermodth der Engelischenn mitt geborlichen gegenmittelln werhenn, unnd unns bi unser christlichenn oldenn narung sr. kunigl. maitt. underdanenn, unnd dem gantzen lande thom bestenn, gnedigst schutzenn, und handthavenn, darmitt wi na aldem gebruke ahne der Engelischenn fedtliche beeindrechtigung, so woll unns sulvest, als ock der kunigl. maitt. underdhanen thom besten, unser geringe narung vordann darsulvest hebbenn, unnd continuiren mogen, solchs sin wi umb i. erb. hochw. mit unsern underdenigen burgerlichen densten thobeschulden, und thovordenen, willig, und geflißen. Datum Hamburgi, 10. octobris anno etc. 93.

Juw erb. hochw.

gehorsoma burgere,

de sich der schipfardt und handlung up Ißlanndt gebrukenn etc.