Ernveste hochgelertte, erb. hoch unnd wollweise großgunstige gepietende heren.

Alse wir, neulicher tage, nach abgerichter beschwerlicher reise, durch gottes gnade beholden, auß Islandt wiederumb anhero gelanget, ist uns der koen. maytt. zue Dennemarck etc. unsers gnedigsten hern an e. erb. hochw. unserntwegen mit obgangene schreiben durch dero deputirte ernstlich vorgehalten worden, dessen wir uns, in hoechster betruebnus, deweill wir godt lob in unseren gewißen vorsichert sein, das wir anders nicht gethan unnd gehandlet, dan darauf wir koningliche paß handt und siegell in handen haben, nicht genuegsamb konnen vorwundern, unnd soll wils godt e. erb. hochw. unsere onschult kunfftigs freitagh umbstentlich unns ausfurlich also kundt gethan werden, das da koeningliche handt und siegell recht und billigkeit gelten soll, wir zu ehren woll wollen antworten. Dieweile aber doch in unseren schiffen allerhandt vorderbliche ware vorhanden, welliche ane hochsten unseren schaden in den schiffen also nicht vorbleiben koennen, unnd wir uns demnach zue e. erb. hochw. als unserer von godt vorgesetzten obricheit getrosten, dieselbe werden unseren alß ihren gehorsamen burger, die wir kein ubelthat ueberwiesen, schaden mit nichten begeren, besondern unsern wolstandt helffen befordern, unnd in unsern billigen sachen uns grosgunstig beispringen und vortretten, alß bitten wir undertheniges, dienstliches fleisses, e. erb. hochw. wollen uns grosgunstiglich verstatten, das wir die in unseren schiffen vorhandenen vorderblichen waren aus unseren schiffen in unsere gewarsamb bringen lassen muegen, des sein wir erboetigh, alles was auß den schiffen gebracht wirt, gebuerlich vorzeichnen zue lassen, und das ein jeder vor sein part e. erb. hochw. genochsame borgen stellen soll, daselbe was wir werden empfangen zue jederzeit wieder einzubringen, und dieweile diese unsere bitte denn rechten unnd aller billigkeit gemeeß, alß wollen wir uns zue e. erb. hochw. großgunstige resolution unndt wilfaringe getrosten, unnd sein denselben angeneme gefellige dienste zu erzeigen bereithwillig.

E. erb. hochw.

Underthenige dienstwillige,
Curdt Weimer, Hans von Huteln, Harmen Weimar, Jurgen Jordan, Henrich Eggerdts, Gise Kopman, Henrich Ordt.